ليه لأ؟
إيه يضمننا إن إحنا موجودين فعلياً؟ إيه مخلينا متمسكين بفكرة الوجود؟
ديكارت لما شك في وجوده إستدل بالشك، لكن لما تشك في الشك؟
ليه تفكيري اللي في راسي حاليًا ميكونش كلام كائن ما في كون ما ؟ الأفكار جت راسي منين؟ يمكن صوت كائن تاني وصل لراسي على هيئة فكرة.. دا لو كنت أنا موجودة .
لما سألت صحابي هو إيه مخلينا متأكدين إن اللي بنعيشه دا حياة ولما بننام دا حلم ضحكو واستهيفوني، لكن أنا لسة بسأل.
في كتاب البدايات لنيل ديجراس بيتكلم عن نظرية تعدد الأكوان.
يعني مش بس في حياة خارج الكوكب، ولا خارج المجموعة الشمسية ، ولا خارج المجرة .. في أكوان كاملة بمجرات وعلوم ومخلوقات حية، ممكن تكون بشر وممكن لأ، لكنها حية بكل تأكيد .. في كون وماديات تانية .. ممكن في كون موازي يكون الوقت شيء مادي زي الجماد وممكن نمسكه، في كون آخر يمكن أكون أنا.. أكون أنا في المستقبل أو الماضي ، أو الحاضر حتى .
ويمكن يكون الإنسان كائن منقرض، ويمكن الحيوانات اللي انقرضت من عندنا راحت تبدأ حياة جديدة في كون جديد.
ويمكن لما بمر بموقف وأحس إني مريت بيه قبل كدة أكون فعلاً مريت بيه في الكون الموازي.
على الأرجح لما بننام بنروح كون تاني، دا لو كنا بننام مش بنرجع لحياتنا الطبيعية.
حسب قانون الطاقة، ف الطاقة لا تفنى ولا تستحدث من عدم، ولو طبقنا الكلام دا عالروح بإعتبارها طاقة إذا مش جاية من عدم، يمكن كنا في حياة قبل كدة.. وأكيد طاقتي مش هتفنى، يمكن هتروح لحياة بعد كدة .
من الغير معقول أنك تقولي في برج عبارة عن 100 دور وكل دور عبارة عن 100 شقة وكل شقة عبارة عن 100 غرفة ومفيش حياة غير في غرفة واحدة من شقة واحدة من البرج، مش معقول.. مش معقول.
طيب الكائنات التانية بيدوروا علينا ؟ بيحاولوا يكتشفوا العالم ومش عارفين يوصلوا زينا؟ بيحبونا؟
سنة 1996 سقط نيزك في القطب الجنوبي، NASA حللوه ولقيو فيه آثار ميكروبات حية وحمض نووي، وكان يعتبر أول دليل على وجود كائنات حية في الفضاء، وساعتها الرئيس كلينتون هو اللي أعلن الخبر .
بتمنى لو خرجنا من الأرض ميكونش فيه هناك أمريكا، علشان مش ناقصة حروب.. ولا سعودية.. علشان مش ناقصة قرف، آه ولا مصر.. عشان مش ناقصة وساخة.
في 2009 حللوا جثة نابليون بونابارت .. ولقيو في راسه قطعة معدنية غريبة جداً، أكتر الأقوال ساعتها كانت إنه تم زرعها من كائنات فضائية .. وأكيد التفسير دا ليه إستنادات كتير مش مجرد آراء، ولو الكلام دا صحيح ف ده معناه إنهم مش بيحبونا وعايزينا نقتل في بعض.
لو حد من كوكب الزهرة وجه تليسكوبه علينا دلوقتي ، هيشوف فرنسا وهيا بتحتل الجزائر.
ولو كان من كوكب نيبتون .. فهيشوف الإنتفاضة الفلسطينية التالتة.
و عموماً اعتقد إن مفيش كائن فضائي أهبل عشان يضيع وقته في مراقبة الأرض، وعلى الأرجح مفيش كائنات في المجموعة الشمسية لأنهم لو موجودين كانوا إتحدّوا كلهم لإسقاط الأرض في الثقب الأسود.
لو حصل صدفة كونية غير مبررة و إبتلعتني الثقب الأسود ورجعت في نفس اليوم هرجع وأنا عندي 152 سنة، هنكون ساعتها بتاريخ 2167 م .
وهيتغير على الأرض 5 أجيال.
يمكن وقتها يكونو الناس اتعلموا حاجة تخليهم يواجهوا الموت وأرجع ألاقي أهلي موجودين ، ويمكن ألاقي الأرض أصلاً مش موجودة والناس سافرت على الأكوان التانية، ويمكن ألاقي القطب الشمالي والجنوبي ذابيين والناس قررت تستسلم للموضوع وتحولوا لكائنات بحرية وعايشين زي السمك، ويمكن يكون الفضاء إضافة للأرض مش بديل عنها،
بمعنى إني هروح أقضي الويكيند في بحر ما موجود في بلد ما موجودة في كوكب ما على نظام ما في مدار ما في مجرة لم يتم اكتشافها ،
وممكن اركب تاكسي فضائي وأطلب منه يوديني هايبر ماركت فيجا الموجود في كوكب على مجرة اندروميدا.
بالمناسبة فيجا دا أقرب نجم لقلبي، في نظرية بتقول إن إحنا من بقايا النجوم .. و فعليًا مكونات أجسامنا مشابهة لحد كبير بمكونات النجوم، وأعتقد إني من بقايا نجم فيجا .
دا في حال كنت أنا كائن حقيقي، مش مجرد فكرة في رأس كائن آخر .. ويمكن أكون ريبورت واللي صنعني كائن فائق الذكاء.. ويمكن أكون حلم.. ويمكن أكون طيف.. ويمكن تكون حياتي دي غفوة، ولما بحلم دي حياتي الحقيقية .. عدم تشابه وتتابع وتواصل الأحلام مش دليل قطعي على إنها مش ممكن تبقى حياة تانية.
سنة 1954 في شخص وصل مطار طوكيو من بلد اسمها Taured والبلد دي مش موجودة حقيقي.
وكان معاه باسبور البلد وعملتها وحتى قال إنه اشترى جرنال من المطار هناك و وراهم الجرنال
وكان فيه أخبار وأحداث خيالية .. الشرطة اليابانية حجزته في فندق علشان يكملوا تحقيق معاه تاني يوم، ولما راحوله تاني يوم لقيوه إختفى بكل حاجته... جه منين؟ راح فين؟ ممكن يكون كائن فضائي جه يضحك علينا شوية ويمشي؟ ممكن يكون حد من حياة تانية كان بيحلم ؟
دي اهتزازات للبلازما الموجية سجلها مسبار فوياجر سنة 2012
https://www.youtube.com/watch?v=LIAZWb9_s
يمكن تكون دي أغنية مشهورة عندهم على فكرة.
بتمنى لو العلم هيتقدم ويكتشف طريقة للسفر بالزمكان دا يحصل قبل ما أموت، دا لو كان الموت إنعدام تام مش حياة جديدة هتبدأ في كون تاني .
بستغرب جداً من اللي بيستدل بالدين على إن مفيش كائنات غيرنا، وإن ربنا نزل الكتب السماوية ع الأرض بس.
يعني هوا معتقد إن بين 6000 دين في الأرض هو بس اللي صح، وبين 9 كواكب الأرض بس اللي فيها دين وبين كل المجرات دي درب اللبانة أو التبانة بس اللي فيها أرض.
تفكير عقيم ومتخلف.
بالمناسبة : كلمة (سبع أراضين) في القرآن وآية (والأرض جميعاً قبضته يوم القيامة ) و (الله الذي خلق سبع سموات ومن الأرض مثلهن).. لما فسرهم ابن عباس قال "هي سبع أراضين في كل أرض نبي كنبيكم وآدم كآدم، وإبراهيم كإبراهيم، ونوح كنوح، وعيسى كعيسى."
-بفكر لثواني-
شتتتتتت
يعني حتى الكائنات الفضائية عندهم حد بيسأل البخور بيفطّر ولا لأ يافضيلة الشيخ؟
خلاص خلاص، كنسلوا ع الموضوع و خلونا في الأرض ياجماعة محدش يدور عليهم .
