تعرف إنك شخص غالي أوي؟
الجملة دي تنقسم لجزئين: الجزء الأول وهو انت غالي أوي على نفسك كبشري.
والجزء الثاني أنت غالي يا معلم بالنسبة لأي تاجر أعضاء بشرية كبشري برضو
بس إحنا ها نتكلم على أول جزء إنهاردة وسيب الجزء الثاني لوقت زنقة.
جاهز؟؟ يلا بينا...
أنت ما تعرفش قيمة نفسك. أيوة ما تقرأش الجملة ثاني أنت قرأتها صح أيوة حضرتك ما تعرفش قيمة لنفسك مش للي حواليكم لا لنفسك. عمرك فكرت تصنف نفسك بين الناس؟ لو عملت كدا هتلاقي إنك فريد ومميز أوي كمان. كام واحد إسمه نفس إسمك؟ كام واحد بيشاركك تاريخ ميلادك؟ كام واحدة بتشاركك جمالك؟
كام واحد ربنا خلقه بيشاركك شغفك بالكورة وجنونك بيها لدرجة إنك ممكن تنزل الساعة 4:30 الفجر تلعب كورة في المطر الي حضرتك بتسميه ساعتها (أجواء أوروبية).
لو فكرت شوية هتلاقي نفسك مهم ومهم أوي كمان لأن أفكارك دي مش جاية من فراغ إيمانك بالأشياء الي بتتعايش بيها مجاش من يوم وليلة لا دا تدريب ويوم بعد يوم وإصرار هايل سعيت وراه لغاية ما بقيت أنت دلوقتي. كام واحد جاب نفس مجموعك في الثانوية العامة (لو كان مجموع عالي أو مجموع انت حابه) كام واحد معاك في الكلية شبهك وبيعمل نفس تصرفاتك؟
شوفت بدأنا نقلل الدائرة طيب نقلل أكثر ؟؟ تعالى..
كام واحد من صحابك بيعرف يعمل حاجات انت شايفها بسيطة وتافهة بالنسبة ليك؟
نقول 2 من أصل خمسة ممكن يعملوها وبرضو أنت لازلت تبدع في مكانتك والكل بيرجعلك في النقطة دي بالذات لأنك متميز فيها.
مين في العائلة بتاعتك قدر يحقق الحاجات الي قدرت تحققها في نفس الوقت؟
مفيش أراهنك أهو مفيش.
عارف ليه؟؟ لأنك مميز بس ما تعرفش قيمة نفسك بتحاوط نفسك على طول بالبوستات الي بتقول إحنا لوحدنا مع إن مفيش حد لوحده غير الي حبس نفسه في نطاق إنه لوحده مع إنه لو قال بس يا جماعة انا في مشكلة هيلاقي جيش واقف معاه. شجع نفسك قوم وجرب ثاني حارب وإخسر مليون مرة لغاية ما يجي يوم نجاحك ساعتها ها تحس به أكثر من أي حد لأنه نجاحك أنت.
في جملة بحبها أوي قالها واحد عظيم "أنا الي قولتها" بتقول: "لو شايف نفسك حلو الناس هتشوفك حلو لو شايف نفسك وحش الناس ها تقرف تقرب منك لو شايف لبسك أشيك حاجة هتلاحظ إن كله بيقولك اللبس دا تحفة عليك ولو كنت مداري هدومك ومكسوف كله ها يستعر منك."
الفكرة مش في الناس لا الناس كدا كدا بترغي الفكرة إنك تصنع من نفسك محور الناس تتكلم عليه حتى لو جايب 50% في الثانوية العامة إنجح وعافر ها تعدي وها يجي يوم تسمع في حد بيقول لأبنه شايف عمو / طنط دول جانوا جايبين 50% ودلوقتي أصحاب شركات.
أنت المهم بالنسبة لنفسك ما يهمكش كلام الناس كدا كدا بيرغوا زي ما قلنا.
الفكرة ايه؟؟
الفكرة إنك تقدر تعمل أي حاجة أنت عايز تعملها مهما كانت مستحيلة
الحاجة الثانية لو حبست نفسك في فقاعة إنك وحيد فإدخل كلمني حتى لو أنت ما تعرفنيش قبل كدا أنا حابب أكون صاحبك
الفيسبوك بتاعي: https://www.facebook.com/motarekX11
