حبيبتي وشلون اصبّحك بالخير

وأنتي صباح الخير والخير كلّه

صبح الندى والعشب والغصن والطير

وصبح الغيوم اللي علينا مطلّه

أنتي صباحات السعد والتباشير

على وجيهٍ بالرضا مسفهلّه

دامك صباحي وين مأروح و أسير

والله مأدوّر فوق راسي مظلّه

جيتي و صارت لك ضلوعي جماهير

ويتل منّها شوقي اللي يتلّه

ومدام جيتيني ف أنا حالي بخير

لو كان جرحي ما أسترته الأجلّه

جيّتك هذي غير وأنتي بعد غير

مثل الوسم لاجا فوقته وحلّه

تزهر بها قيعان قلبٍ مداهير

وترد معها روح خلٍ لخلّه

يامرحبا ي أغلى وأعز المسايير

وأغلى المشاعر ( بيت اهلها تدلّه )

عروق قلبي لك دلالٍ مباهير

صفيتها دلّه ودلّه ودلّه

تربعي بين الحشا والازارير

وأخذي على ترويقة البال فلّه

والا أصبري بأطيّر القلب تطيير

وأنتي تعالي وأجلسي في محلّه

سقت الغلا لك .والنوايا مغاتير

ولاهمّني حقد القلوب المغلّه

مدري صباح الخير والا مساء الخير

بس المهم أن وجهك الخير كلّه