لما تيجي تفكر في مشروع جديد علشان تبدأه ، بييجي في دماغك كام حاجه ، أو بتسأل نفسك كام سؤال ..
ياتري هو السوق اللي أنا داخل عليه ده قد إيه ؟ .. وممكن أقسمه إزاي ؟ .. وبعد ما أقسمه هستهدف الناس اللي فيه إزاي ؟..
خلينا نبسط الموضوع خالص ونتعلم بنفكر إزاي فيها ..
لو إنت مثلا بتفكر تدخل سوق المنتجات الغذائية .. هتلاقي نفسك بتلاقي تقسيمة جملة ولا قطاعي ..
لأ هبيع قطاعي .. تمام ..
طيب إيه نوع المنتجات هل التموينات الأساسية زي السكر والزيت والمكرونة و.. مثلا ، ولا منتجات التلاجه زي الجبن بأنواعها ، والمخللات ، ولا اللحوم المجمده أو المبرده .. ولا المعلبات .. وغيرهم كتير من التقسيمات دي ..
لو إفترضنا مثلا إنك إخترت الجبن ..
هتلاقي نفسك دخلت في تقسيمة الجبنه الرومي ، الفلامنك ، الجبنة القريش ، المطبوخة ، الجبنة المثلثات ، والإستانبولي ، والبراميلي ( القديمة ) و.....
حلو .. لأ أنا هتخصص في بيع الجبنة الرومي فقط ..
هتلاقي نفسك بتدخل في تقسيمة الرومي القديمة ، ولا الوسط ، ولا الجديدة ..
لأ هتخصص مثلا في القديمة ..
محلي طيب ، ولا مستورد ..
لأ أنا بشجع الصناعة المحلية ، وهشتغل في المحلي ..
طيب فيه كذا مصنع بينتج المحلي ..
لأ أنا هشتغل في المضمون والنضيف .. هشوف براند كبير ، وليه سمعته في السوق وهاخد التوكيل بتاعه في البلد اللي هفتح فيها المشروع ..
تمام كده .. شوفت إحنا مشينا في الموضوع إزاي ، وفكرنا فيه إزاي ..
بتفضل تقسم تقسم ، لغاية ماتوصل لجزء من السوق هتشتغل عليه ..
اللي إحنا عملناه فوق ده إسمه segmentation ( يعني تقسيم السوق ) ..
في معلومة هنا مهمة حابب أقولها ..
وهي إن التقسيمه إسمها niche يعني مجال أو تخصص ( زي مثلا سوق المنتجات الغذائية ) ..
الجبنة القديمة محلية الصنع إسمها micro niche ( يعني تقسيمة صغيرة جدا جدا في السوق ) ..
الشطارة هنا بقي إنك تدخل الmicro niche دي وتبيقي براند ليه إسمه فيه ..
يعني تبقي أحسن واحد بيبيع جبنه رومي قديمة محلية الصنع ..
ياتري جه في دماغك دلوقتي تقسيمة صغيره جدا نورت في دماغك لmicro niche فكرت تبدأه ؟
