البداية عند مدونة شبايك

لما كنت في الجامعة درست تسويق أربع سنين ورا بعض ،

كان فيه أكتر من نوع من الكتب ، والمراجع باللغة الإنجليزية اللي كنت بدرسها  اللي بتتكلم عن التسويق ..

الحقيقة مفيش تقريبا كلمة فضلت متذكرها في دماغي  وفاكرها من أي كتاب فيهم ..

مع إن الكتب دي كانت في الحقيقة كانت قِيمَة جدا جدا ، وغاليه في تمنها ، وفي قيمتها .. بس ماكانش فيه أي رابط عاطفي خلاني أحب التسويق في الفتره دي  كعلم ، أو دراسة ، أو حتي عمل ..

الكلام ده هتسمعه كتير من أغلب الناس اللي درست تسويق أكاديمي في الجامعه.. بحكم الدراسة ، والإمتحانات.

  اللهم إلا  لو كان فيه دكتور  كويس وإبن حلال حببنا في المادة المهمة دي  ، وده كان نادر وجوده ، دايما كان بيبقي خلقهم ضيق ، ووقتهم محدود  ..

كانوا بيقولولنا دايما إن التسويق هو جزء كبير من الحياه ، ومن حاجات بنقولها ، وبنعملها كل يوم من غير مانعرف إنها تسويق  .. وأكتر حاجه هنستفيد بيها لما نخلص جامعه ، بس محدش منهم خلانا نحب التسويق  ، أو نعشقه ، فنقرر إننا هنكمل قراية وتعليم فيه .  

.

مرة من المرات كنت بعمل بحث علي الإنترنت عن موضوع معين ،

لقيت في نتايج البحث مدونة بتتكلم عن التسويق ، وصاحبها بيقول إن هدفه إنه يخلي الناس تحب التسويق .. وبعد تصفح مواضيع كتير هناك ، لقيت مقال بيتكلم عن ( لماذا يجب أن نعشق التسويق ؟ )  ..

تقريبا دي كانت أول مرة في التوقيت ده أشوف حد بيدعو لحب علم معين ، وبيحث الشباب وبيحضهم علي حبه.

كان إسلوب الكتابة مختلف ومميز .. وفيه صدق واضح في عرض المعلومة .. وده بيوصل للقارئ بسهولة

..  قلت لنفسي يبقي أكيد الموضوع يستاهل ..

المهم قررت أقرا التدوينة دي للآخر ، والموضوع طلع تمهيد لكتاب لطيف جدا من تأليف شبايك .. وطبعا شدتني موضوعات كتير في المدونة ، وبقيت من متابعيها لفتره طويلة  ، بس بدأت تتنوع قِرَاءَاتُي جدا بعد كده  ..

عايز أقول حاجه هنا ..

المدونة دي كانت البداية في إنها عملتلي attraction  ، أو شدت إنتباهي  لفكرة إن التسويق مهم وجميل ، بس لسه رجلي ما راحتش ناحية التراك اللي المفروض أمشي عليه .. 

كنت محتاج أعرف أكتر  ..  الناس اللي بيشتغلوا في التسويق بينفذوا كل الأفكار دي إزاي ..

يعني م الآخر  كنت بدور علي   actionable steps   ،  أو خطوات عملية ..

وده خلاني أدور أكتر   ..

فيه ملحوظه مهمة هنا لازم أدونها .. وهي إن مدونة شبايك من الحاجات الجميلة اللي فيها ، إنها ماكانتش بتتكلم عن التسويق كوظيفة ، أو career .. لكن كانت بتتكلم عنه كفكرة ، أو أُسْلُوبٌ تفكير ،  كانت بتوريك التسويق علي إنه الحاجه اللي بتخليك تبص لأمور كتير في الحياة بوجهات نظر مختلفة ..

المدونة دي فعلا  قيمتها ،  والجهد اللي إتعمل فيها ، كل يوم يزيدوا مع الأيام ..

أنصح أي حد عايز  يُلْهم بمواضيع كتير بتتكلم عن التسويق وقصص النجاح عليه إنه يزورها بإستمرار  ..