Image title

بقالي فترة في شوية دوشه في دماغي عايز أفضيهم بالكتابه ..من زمان قوي أنا بحبها ، بحب أمسك القلم وأكتب  وبحب الورق الأبيض .. من قبل ماأعرف إن اللي بعمله دلوقتي ده بقي حاجه محترفة ومحترمة إسمها تدوين ..

كل يوم مثلا بقرأ حاجات كتير جدا ، وباأطلع علي أفكار كتير للأخرين بتتعرض قدامي ، زيي زيكم بالظبط ..

بس ببقي محتاج أسجل أفكار معينه ، أو فكرة جديدة خطرت علي بالي من فكرة تانيه عدت قدامي .. 

وبدور علي مكان حلو أعمل ده فيه ..

مش عارف ليه حبيت المكان هنا وإرتحت له .. المساحات البيضا هنا روعه ، وليها سحرها .

الأفكار زي ما إحنا عارفين بتجيب بعضها ..

كنت محتاج ورقة بيضا مش أكتر  ..

المدونة هنا جميلة جدا جدا وسهلة ، والمكان المخصص للكتابة بيقوم فعلا بدور الورقة البيضا اللي كنت بدور عليها ..

في أفكار كتير بحس ساعات إني مش محتاج أحضرلها كتير ، أو أعمل بحث علي موضوعها .. في حاجات محتاجة تطلع تلقائي زي ماهي كده  ، من القلب للقلب .. حاجات جاهزه من كتر ما أنا بفكر فيها علي طول ..

مش عارف يمكن يكون أي حاجه أكتبها هنا مش مهمة لحد .. بس أكيد هلاقي راحه كبيره ، وسعادة أكبر  ، لو عملت مشاركة لأفكاري مع حد تاني ، ووصلني إنه إستفاد ولو بكلمه  ، ده بيسعد أي حد بيقرر إنه يكتب  ، إن اللي بيقرأوا  كلامه يبقوا زي صحابه ..

قررت إني أكتب بالعامية المصرية ، ودي بحبها  ، وبحس بالونس معاها ، مع إني بأكتب بفصحي سليمة جدا ، بس العامية لايقة عليا أكتر ..

تقريبا كل اللي هتكلم فيه هنا هو عن التسويق ، ببساطه لأني بحبه  .. ولأنه أكتر حاجه بقرأ فيها يوميا وبدون ملل ، أو مابطلتش أقرا فيه  ، وأتعلمه من فترة طويلة ولغاية دلوقتي ..

هشارك هنا أفكار كتير جدا في دماغي عن التسويق  ..

وأتمني تشاركوني رأيكم  ، وأتونس بيه وأسترشد بيه طبعا ..

حاجه أخيره .. ليه بقي سميت البلوج هنا .. kick off ، أو ضربة البداية   ..

علشان البدايات دايما بتبقي حلوه ،  وليها زهوه وذكريات حلوه .. وعلشان كمان لو كنت لسه ما إبتديتش ، فيلا ندردش شويه مع بعض :)