مش هتكلم هنا عن تعريف التسويق ، بس هحاول أدور عليه في وسط حاجات حوالينا  سواء في الشغل أو في الحياه ..

تعالي نتخيل مع بعض إنك لقيت فكرة مشروع كويسه ، وقررت تنفذها علي أرض الواقع -offline ،

أو online ( علي الإنترنت ) ..  

بس محتاج شيء أو حد يساعدك إنك تتأكد إن الفكرة دي سواء كانت خدمة ، أو منتج .. إنها مناسبة للسوق ، وإن الناس هتتقبلها ، وتستقبلها كويس، و فعلا محتاجاها  ، وبالتالي رغبتها في الشراء ، أو الإقبال عليها هتكون كبيره ومشجعه  ..

طيب .. إذا إتأكدت بطريقة أو بأخري إن الفكرة مناسبة ، وليكن إنك عملت بحث مثلا ،،

 وخلاص لقيت نفسك محتاج تعرف إيه المفروض تعمله علشان تنزل السوق ، والناس تعرف إنك موجود وتبتدي  تتعرف علي شركتك و منتجاتك ، أوخدماتك  ، فأكيد هتحتاج تعرف إنت فين دلوقتي  ، ومحتاج تروح فين ، زي مثلا خطه كده أو خريطة طريق ..

مشيت شويه في السوق  ،والناس بدأت تعرفك ، وإكتشفت إنك محتاج تطور خطواتك ، وأفكارك أكتر ،

وتحسن  وتعدل من طريقة تقديمك للخدمة ، أو تعدل حاجات في المنتج علشان يناسب ذوق الناس أكتر ..

طب لو قابلتك شوية مشاكل زي مثلا  زي ضعف المبيعات ، أو إن الناس مش قادرة تتعرف علي منتجاتك كفايه ، أو تفهم خدماتك أكتر علشان يقدروا يستفيدوا منها ، أو حتي محتاج تكبر قاعدة العملاء عندك او الناس المستفيدة من خدماتك ومشروعك  ، وتوصل لشرائح تانيه مختلفه غير اللي كنت بتستهدفها في الأول ..

كل  اللي فات ده لو جينا نشوفه هنلاقيه  ، عباره عن أنشطة وجهود لازم تقوم بيها  ، كلها  التسويق داخل فيها ، وبيخليك تفكر فيها طول الوقت .. هتلاقيه  فعلا في كل تفصيله في حياة المشروع ، أو الفكرة بتاعتك ..

دايما بنسمع عن كلمة الmarketing solutions ، أو الحلول التسويقية ..

ودي معناها ببساطه شديده إنك هتلاقي دايما التسويق معاك في أي مشكلة بتقابلك ،، معاه الحل .. لأنه أصلا دوره إنه يحسن نوعية الحياة اللي إحنا عايشينها  ، ويحل أغلب مشاكلنا   ..

ليه كل ده ..

لو بصيت للتسويق علي إنه منهجية تفكير ، بتبص بيها علي كل حاجه في الدنيا بطريقة مختلفة  ، أو بتبص بيها علي الحاجه الوحشه علشان تخليها حلوه  ، أو علي المشكلة الكبيرة ،  علشان تفككها ، وتخلق منها صور جميلة أصغر ..

هتلاقي نفسك بتقع في حب التسويق ..

لو بصيت ليه علي إنه الحاجه اللي بتعلمك إن الإختيارات في الحياة كتير ، بس إحنا محتاجين نفهم كده ، ونبتدي ندور علي حلول .. هنحب التسويق .. وهندور علي كل  ، وأي  كلمة بتتكتب ،  أو بتتقال عنه ،  ونجري نتعلمها ونطبقها علي شغلنا وعلي حياتنا علشان نخليها أجمل ومكان أفضل نقدر نعيش عليه ..

لو بتحب التسويق زيي ، قولي إنت كمان بتحبه ليه ؟