الامتحان الأول
س1( اجباري): من اغاني العندليب " بيع قلبك بيع حبك شوف الشاري مين"؟
ج1: الحمد لله سؤال سهل واي عيل دلوقتي بدون مذاكرة عارف الاجابة اكيد الشاري السعودية وللدقة تتمثل في الملك سلمان.
س2 ( اجباري برضه) من اغاني ام كلثوم " هل رأى الحب سكارى مثلنا"؟
ج2: بعد كام تنهيدة وهرشتين في الدماغ على كام بصة في سقف اللجنة اكيد الاجابة ان في سكارى اكتر من كوكب الشرق وحبيبها وللاسف يا ست الكوكب دول كتير اوي على سبيل المثال لا الحصر جمهور احمد موسى والغيطي والخياط ...الخ . وخدى عندك الكبيرة فى الفترة الأخيرة ظهر لنا سكارى جدد مجموعة من المبرراتية اللى طاحنين نفسهم في محاولات لاثبات ان تيران وصنافير سعوديتان مع ان والهي بعدهم لسه جاي من تيران وغطسان ( عامل ديفينج) ولسه لامؤاخذة لباسه على حبل الغسيل.
س3 (براحتك) من تترات المسلسلات القديمة " مين اللي ميحبش فاطمة"؟
ج2 بكل تأكيد لو المقصودة بنت ناعوت فكتير اوي من العاقلين لازم ميحبوهاش وبالأخص حبايبنا الجزارين اللي كانت عايزة توقف حالهم . ولأن لكل قاعدة شواذ فالشاذ هنا واللي لازم يحب بنت ناعوت هو مين غير مظهر شاهين.
س4 السؤال الأخير من اطلق الرصاص على هند علام؟
ج4: والهي كتير اوي نفسهم يضربوا اللي مثلت الدور مية رصاصة بس للامانة انا سمعت من واحد واصل اوي بالناس اللي فوق اللي اطلق الرصاص على هند علام كان اخوان وغالبا هرب بعدها ونزل في كرة تحت الارض وطلع منها على تركيا.
مع تمنياتي بدوام التفكير والكفاح
