كتاب Design Is a Job مش كتاب أكاديمي بيعلمك التصميم ولكن يحتوي علي خبرات وتجارب للكاتب. زي مثلاً إزاى تجيب العميل، إزاى تتعامل مع زمايلك أو الموظفين المختلفين داخل المكان اللى بتشتغل فيه ، إزاى تحدد المقابل المادي لشغلك وإزاى تاخد فلوسك. هدف الكتاب إنه يوسع مداركك ، في نهاية الكتاب هتكون فاهم وظيفتك بصوره أفضل.

لينك الكتاب علي goodreads  تقيمه 4.3. 

الكاتب هو Mike Monteiro صاحب شركة Mule Design أسسها من 14 سنه ، إشتغل في شركات كتير وإتبهدل الراجل صعبان عليه الطريقه اللى إحنا بنشتغل بيها ، فقرر إنه يعمل الكتاب ده علشان ينقل لنا الخبره اللى إكتسبها. أول شغلانه إشتغلها كان بيصمم لوجو في نص ساعه وهو مش فاهم تقريباً هو بيعمل إيه وبيخبط وخلاص ، إشتغل ببلاش وخسر شغل كتير لأسباب غبيه.

الكتاب بيتكون من 135 صفحه في 10 فصول هتكلم عنهم تباعاً لحد إما يخلصوا إن شاء الله.

المصمم هو شخص بيحل مشاكل ، المشاكل حواليها مجموعه من القيود ، نوعية المشاكل هي اللى بتحدد نوعك كمصمم ، يعني مثلا لو إنت بتحل مشكلة إنك تصنع كرسي مريح يبقي إنت "مصمم أثاث" ، لو إنت بتحل مشكلة إنك تعمل موقع مش صعب ولا معقد وسهل في الإستخدام يبقي إنت "مصمم ويب" وهكذا ..

المصمم شخص بيدور دايماً علي الأهداف ، أى شغل بياخده دايماً بيدور علي هدفه.
أول مرحله من أى تصميم هو إنك تسأل نفسك السؤال ده ، ليه ؟. 
 دور علي الاجابه ولو الاجابه مش واضحه أو مافيش إجابه ماتكملش، فكر شوية وحدد إيه هدفك من التصميم وبعدين كمل .

المصمم شخص بيجمع معلومات ، أول ماتحدد أهدافك حاول تجمع معلومات عن التصميم اللي بتعمله ،  مين اللى إحنا بنصمم له ؟ ، هل هما محتاجين التصميم ده ؟ ، هل فيه حد قبلي حاول إنه يعمل التصميم ده ؟.
زي ما بظبط مش هتعرف تبني بيت من غير إما تدرس الأرض ، ماينفعشي تصمم من غير ما تبحث وتجمع معلومات.

المرحلة اللى بعد كده مرحلة التصميم وفيها  بتستخدم فيها المعلومات اللى وصلت ليها من المراحل اللى فاتت علشان توصل لخرج ودي المرحله اللى كل الناس عارفاها وبيطلقوا عليها "التصميم" علشان فيهاحاجه ملموسه زي الصور .

مش مهم قد إيه التصميم بتاعك جميل ، لو مش هتعرف تبيعه يبقي إنت ما كملتش شغلك. عرض شغلك علي العميل مهم جدا مش بس لإنك تقدر تقول للعميل إنت ليه قررت تعمل التصميم بالشكل ده ، ولكن كمان بتاخد ردود فعل مباشره من العميل عن شغلك.
كام مره جالك ردود من العميل وإنت مش فاهمها أو مش موافق عليها ؟ ، بمجرد إنك تكون مستعد تبيع شغلك يبقي وقتها ممكن تقول علي نفسك "مصمم".

الكاتب بينصح القراء لما يخلصوا  الكتاب يقرأوا كتاب Design for the Real World لـ Victor Papanek واللى ملخصه في الجمله البسيطه  :

  " أنت مسئول عن أى شئ  تصنعه في هذا العالم "

مهم جداً إنك تختار المشاريع اللى إنت بتشتغل عليها بعناية ، مهم إن شغلك يساعد في بناء عالم أفضل مما هو عليه ، مهم إنك تحسِّن حياة الناس وتخليها أفضل ، مش معني كده إنك تشتغل في منظمات غير هادفه للربح ، فيه مشاريع مربحه بِتحسّن حياة الناس ، إتأكد دايماً إن شغلك له قيمه وبيضيف حاجه ، المصمم مش ممكن يغير العالم ، المصمم واجب عليه إنه يغير العالم.

الفصل الثاني : الحصول على عملاء

الكاتب بيقول إن أكبر كدبه ممكن أكدبها عليك إني أقولك ما تقلقش من وجود العميل. إنك تلاقي عميل هو أكتر تحدي متعب ممكن يقابله أى مصمم وبالأخص المصممين اللي شغالين في العمل الحر .

قولتلي منين بقي أجيب زباين ؟

ترشيح حد ليك 

معظم الشغل بيجي عن طريق شخص بيرشحك ، غالباً مفيش حاجه هنا إسمها إبعتلي العرض بتاعك وأنا أقبله أو أرفضه ، كمان مش هتنافس حد. 
زي بالظبط لما تكون بتشتكي من ألم في أسنانك ومحتاج دكتور يعالجك، أول حاجه بتيجي علي بالك تسأل واحد صحبك كان بيشتكي من أسنانه وتسأله علي الدكتور اللى عالجه، وبالتالي هتروح لنفس الدكتور وده أحسن بكتير من إنك تدور علي دكتور ﻷن الدكتور ده مضمون.

وده بالظبط بيحصل معانا - مع المصممين - مش كل يوم واحد بيوظف مصمم  ، في المرات اللي العميل بيكون محتاج فيها مصمم ، بيتكلم مع أصدقاء له إشتغلوا مع مصمم ، والشخص ده بيكون مضمون جدا .

إزاى ؟

معظم الأشخاص دول بيجوا عن طريق أصدقاء ، زمايل في الشغل أو عملاء سابقين.

أهم مفاتيح الحصول عليهم  

١- لازم تكون مرضي للعملاء وإنت بتتعامل معاهم في شغلك.
٢- تعمل شغل كويس.

إتعرف علي الناس اللى شغالين في فريق العميل وعاملهم كويس ، خليك دايما متأكد من إنهم جزء مهم في المشروع وصوتهم مسموع دايماً ، ولو المشروع ده مشي كويس ، الشخص اللى طلبك هيطلبك تاني.
وفي يوم من الأيام بقية الناس اللى بتشتغل معاهم هيسيبوا الشركه ويروحوا شركات تانيه ، والشركات دي هتحتاج لمصمم وساعتها هيقولوا عليك.

خليك صادق مع العميل ، الكاتب بيحكي إن فيه حد إتصل بيه بيقوله إن فيه واحد صحبي قالي عليك وقالي إنك مش هتخاف تقول إني غلطان واني لازم أسمعلك علشان المشروع بطلع بأفضل شكل. مفيش عميل بيوظف واحد ويدفعله فلوس علشان يكون صاحبه ويضحك عليه ، هو وظفك علشان تصمم له حل للمشكله.

أكيد طبعا لو إنت أفضل شخص في العالم في التعامل والناس مبسوطه بالتعامل معاك ولكن شغلك مش كويس مش هيوظفوك ، أعمالك مهمه لأنها هي اللى هتقنع العميل إنك تقدر تساعدهم وتحل لهم المشكله اللى بيوجهوها ، إختار مشاريعك بإهتمام ، وصمم تصميمات كويسه وإعرضها بشكل كويس .

شبكة العلاقات  

إتعرف علي ناس كتير هيفيدوك ، مثلاً إنهم يعرفوا شخص إنت عارف إنه محتاج مصمم. ولذلك مهم جدا إنك توسع شبكة علاقاتك ، ولو إنت مش شخص إجتماعي إتعلم ، لما تقابل شخص إبدأ تعرف هو بيشتغل إيه ، إتعرف عن إيه اللى يهمه، وإيه اللى بيشجعه، وحاول تدور علي حد ممكن يساعده ، ماتخافش من إنك تطلب من شخص يساعدك في إنه يكلم لك شخص علي شغل ، الناس بشكل عام بتحب إنها تساعد الناس وتوصي عليه خصوصا لو كان شخص متميز ويستحق.

خليك ظاهر 

في واحد نصح الكاتب وقاله إن مافيش حد هيعرف عنك أى حاجه طول ما إنت ما بتكتبش اللى بتفكر فيه ، الناس محتاجه تعرف إنت مين علشان توظفك. إكتب ، صمم علشان تعرف الناس بأفكارك.
الناس اللى عايزين يوظفوك مش عارفين إنت فين وإنت مين ، كل إما تكتب أكتر أو تصمم اكتر كل إما الناس قدرت توصلك بسهوله.

خليك دايماً علي تواصل دائم مع العميل ، مش معني إنك خلصت المشروع ده معناه إنك كده خلاص تقطع علاقتك بالعميل ، من مسئولياتك إنك تتأكد إن المشروع ناجح ، إنك تكون علي تواصل مع العميل دي وسيله للتأكد إن عندك معارف يقدروا يساعدوك ـ الموضوع مش صعب ، إبعت ليهم إيميلات كل فتره ، كلمهم تليفونياً كل فتره ، لو شركه من الشركات عملت إنجاز ، إبعتلهم ميل وبارك ليهم ، وشاركهم نجاحهم عندك عن طريق الفيس أو تويتر .

مش أى شركه أو عميل يجي لك عن طريق معارفك يكون مناسب ليك وتقبله علي طول ، لازم تاخد وقتك في التفكير وتفكر هل إنت الشخص المناسب للشغل ده ولا فيه شخص أفضل ، لو إنت مش الشخص المناسب قول للعميل إنك مش مناسب للمشروع ، وإبذل قصار جهدك إنك تقوله علي شخص تاني ممكن يساعده. سيب عنده إنطباع كويس ، يمكن في  يوم من الايام يكون عنده مشروع مناسب ليك أو يعرف حد محتاج واحد زيك ويقول عليك.

فيه حجات تانيه ممكن تجيبلك عملاء بس مش قوية بقدر النقط اللى فاتت. زي إنك تقدم طلب تاخد شغل من العميل ، الإعلانات "إنك تكون شركه راعيه لحدث " ، دايماً خليك موجود في أماكن إحتمال تواجد العملاء فيها كبير ، المؤتمرات مكان كويس إنك تقابل فيه العملاء أو تقابل فيه شركات زيك أو مصممين زيك ، إكتب في مدونتك عن المشاريع اللى حابب تشتغل فيها في المستقبل ، يعني لو مثلا بتحب ديزني إكتب عنهم ممكن المقالات دي ماتأثرش وماتجيبش لك شغل ولكنها مش هتأثر معاك لأنك بتكتب عن الحاجه اللى إنت بتحبها.

وأخيراُ ، مفتاح كل شئ ، وبالأخص إنك تلاقي العميل هو انك تكون واثق من نفسك ومن شغلك.

نكمل بقية الفصول في مقال جاي قريب إن شاء الله.