القصيدة الثانية : مصدر غيرمسئول
صرح مصدر غيرمسئول بياكل لحم اكتر من الفول
ان باله علينا مشغول اكتر من أهله وعياله
تصريحه جامد ابن الايه والكاميرات ملمومة حواليه
لو شوفت الخاتم اللي في ايديه تتأكد من ذمة ماله
وطنه عند سيادته كبير اكبر من القلى ومن الزير
علشان يحفظ سر في بير لازم بهدية تهديهاله
قلبه على بلده موجوع ولوالناس بتموت من الجوع
وعمره ماكان مسروع دايما هادي ومرتاح باله
عامل الناس دايما عكازه لحد ما يحقق انجازه
الناس لمن وراه فازه والفضل لمخه وخياله
الكل عنده اكيد درجات الصومال غير الامارات
يعرف منين تيجي الدولارات ولا يرضى لها بحد بداله
ليل ونهار يدلي بتصاريح بخبث و متحسهوش صريح
خايف يموت ويكون له ضريح والناس تستشهد بهلاله
علشان تعرف كدبه بجد بيصلي الجمعة يوم الحد
ولا يمكن مرة يساعد حد الا وياخد من اللي جاله
صعبان عليك بتقول يا حرام لساك حابب الأوهام
شوف ده باعك يوم بكام وانت بتتملى في جماله
اسمعني بقى وكفاية مهاترة الصحرا مبقتش معاه خضرا
ولا الصايمة بقت يوم فاطرة وده كله بفضل استغلاله
في بلدنا لو صرح مسئول انه كان بيلعب بالعقول
يرد عليه شوية عجول انه ما فيش اتنين في كماله
