قصائد بالشعرية (شعر ساخر مستوحى ... من واقع أكثر سخرية)
القصيدة الأولى : يا مبرطع
يا مبرطع اوي فوق كرسيك... وبساندوتش فول نرشيك... لابس كرفتة وعامل شيك ...واللي لينا عايزه ليك
يا مبرطع اوي فوق كرسيك
يا مبرطع مش مالي مكانك... تشوف مسئول تهز ودانك...فوق كده بقى من احلامك ...عمر الكرسي ماكان يوم ليك
يا مبرطع اوي فوق كرسيك
يا مبرطع كده اوي وملمع .... اخرك في البامية تقمع... ولا صيتك يوم هايسمع ...ولا يخرج من الشبابيك
يا مبرطع اوي فوق كرسيك
يا مبرطع يا ابو البراطيع....الدنيا معاك اكيد هاتضيع...لو فاكر نفسك يوم فزيع...بكرة نشيلك من رجليك
يا مبرطع اوي فوق كرسيك
يا مبرطع اه ياعالي الجودة.... شوف في دماغك كده كام حودة...ومركب في نفوخك فردة ...ليل ونهار عمالة تأذيك
يا مبرطع اوي فوق كرسيك
يا مبرطع لوماسك ايفون...لو ماشي توزع بونبون...لو حتى بقيت الاله امون... عمرنا يوم ماهنخضع ليك
يا مبرطع اوي فوق كرسيك
يا مبرطع دايما مهموم ... ومشاكل شغلك بالكوم...على كل الناس دايما بتلوم... وبتنسي ان العيب دايما فيك
يا مبرطع اوي فوق كرسيك
يا مبرطع امتى بقى النهاية؟...بجد زهقنا من دي حكاية...كل ده صبرا وكفاية... بس العيب علينا اكتر من عليك
يا مبرطع اوي فوق كرسيك
يا مبرطع هاتبقى ماضي... ولاحد عنك كان يوم راضي... اقولك ايه ما انت الفاضي...حتى من الفضا عاوز بريك
يا مبرطع اوي فوق كرسيك
