المرة اللي فاتت قلنا ان تصرفاتك معتمدة بشكل اساسي على حاجتين:
- طبيعة شخصيتك
- نظرتك للموقف اللي انت فيه
وبما ان رؤيتك للعالم بتأثر على تصرفاتك بشكل كبير يبقى لازم نفهم ازاي الانسان بيشوف العالم
نظريا، فيه دافعين اساسيين بيأثروا على رؤيتك للعالم، احيانا بيبقوا عكس بعض، واحيانا لا
- المنهج الإدراكي
- منهج الاعتزاز بالنفس
الدافع الأول هو منهج الاعتزاز بالنفس - Self esteem approach:
وهنا انت كإنسان بتميل دايما انك تظهر في صورة حلوة في كل قصة وبتميل دايما انك تفسر الأحداث بشكل يخليك تظهر في أحسن صورة، او بتبقى عايز تحس انك شخص كويس
الدافع ده موجود عند معظم الناس بنسب مختلفة وبيأثر على تصرفاتهم بأكتر من طريقة زي انه بيخليهم يدوا لنفسهم دور اكبر من دورهم وكمان بيخليهم يميلوا لإنهم يبرروا تصرفاتهم معظم الوقت حتى لو غلط وده بيمنعهم من انهم يصححوا اخطاءهم - لأنهم شايفين انهم دايما صح :) - وده بيديهم شعور بالرضا عن النفس
تخيل مثلا انك اشتريت موبايل بسعر اغلى من امكانياته بكتير جدا
بدل ما تعترف بالخطأ ده وتقول انا اتنصب عليا، دافع الاعتزاز بالنفس هيخليك تبرر ده بإن الموبايل ده جامد جدا وهتبتدي تدور على اي ميزة فيه مش موجودة في الموبايلات التانية وتتكلم عنها كتير وممكن تقعد تتخانق عالفيسبوك لساعات عشان تبرر السعر ده وتثبت لنفسك انك متضحكش عليك
حسب دراستين اتعملوا سنة ١٩٥٩،١٩٦٦
العلماء لقوا ان كلما كانت خطوات الانضمام لمجموعة معينة اصعب واكتر خطورة، كل ما كان الشخص اكتر انتماءا للمجموعة دي
لأنه بيحاول يبرر لنفسه انه معرضش حياته للخطر عالفاضي، او مبذلش مجهود عالفاضي وان الناس دي يستحقوا التضحية من اجلهم فعلا
على سبيل المثال المجموعات اللي زي عبدة الشيطان وبعض مجموعات الكهنة الوثنيين أيام الفراعنة وفي اوروبا كانوا بيعملوا شروط صعبة جدا للانضمام ليهم زي ان الشخص يشرب جرعات من السم او يرمي نفسه في النار مقابل الانضمام ليهم أو يقدم قرابين وغيره عشان يضمنوا ان الشخص ده هيبقى اكثر ولاءا للمجموعة بعد كده، وبالفعل اعضاء المجموعة كان بيقدموا ولاء خيالي ليها بعد كده!
تاني دافع مهم بيأثر على نظرتك للمجتمع هو المنهج الإدراكي - Cognitive approach:
المنهج الادراكي في التعامل مع الاحداث هو انك بتحاول دايما تبقى دقيق قدر الإمكان في التعامل مع الواقع وبتحاول تفسره بأكثر صورة عقلانية ممكنة بدون مبالغات وده أحيانا بيبقى عكس الحافز الأول اللي اتكلمنا عنه فوق .
المنهج الادراكي ليه آليات كتير معقدة هنتكلم عنها بالتفصيل في فصل لوحده بعد كده، وكمان فيه دوافع تانية كتير بتأثر على ادراكك زي الحب والجوع والعطش.. الخ، هنتكلم عنها في فصول جاية ان شاء الله
الورقة الجاية: كيف تتم الأبحاث؟
