كلنا كأمهات , سواء كنتى ربة بيت أو أم عاملة بتحتاجى التجديد فى حياتك وفى يومك
بلاش تخلى كل الأيام عندك تمر شبه بعضها
بلاش توصلى لإحساس انهاردة زى بكرة زى إمبارح
الأم اللى قاعدة فى البيت بتعتقد أن الأم اللى بتشتغل أحسن حالا منها , لانها بتخرج وبتشوف ناس جديدة ,وبتغير جو البيت كل يوم
والأم اللى بتشتغل بتعتقد أن الأم اللى قاعدة فى البيت أحسن حالا منها لأنها عندها وقت تهتم بنفسها وبصحتها وبأولادها , ده غير انها بتاخد كفايتها من النوم , وبتخرج وبتروح أى مكان فى أى وقت عشان ماعندهاش ارتباطات أخرى غير بيتها وولادها
.
.
.
لكن فى الحقيقة ,, أن " كل ميسر لما خلق له " زى ما قال النبى (عليه الصلاة والسلام)
انتى ظروفك كدة لأن ده أنسب شئ لحياتك ولشخصيتك , وربنا وضعك فى المكان ده عشان عالم بيكى وعارف انك هتقدرى تتحملى وتتعايشى مع الوضع ده
ده أول حاجة لازم نستشعرها
وهى الرضا
الرضا بكل حاجة
بالزوج والاولاد والبيت والمكان والأسرة والرزق والعمل والأكل والشرب
ومش معنى الرضا , انك تقولى الحمد لله من ورا قلبك
لأ معناها انك تحمدى ربنا وانتى من جواكى شاعرة ان ده نعمة ربنا أعطاها ليكى , وفى كتير محروم منها , ولذلك لازم تكونى سعيدة ومبسوطة بيها
هو ده معنى الرضا
لو مش فرحانة أو مش مبسوطة
راجعى نفسك
مفيش حد ممكن يتدخل فى احساسك غيرك انتى
مهما شفتى من كل اللى حواليكى
لأن قرار السعادة ده قرار داخلى
قرار انتى اللى بتاخديه
أصحى من النوم انهاردة وبكرة وقررى قرار
أنا هاسعد نفسى انهاردة
بكل وبأى طريقة انتى بتحبيها طالما مش بتغضبى ربنا
البسى أجمل حاجة عندك فى (بيتك طبعا)
اعملى الأكلة اللى بتحبيها ( ما هو أنت اللى بتطبخى أصلا) ومش شرط تكون غالية ممكن طبق شوربة عدس لو بتحبيه هتحسى انك عملتيه لنفسك وهتكونى سعيدة وانتى بتاكليه
كلمى حد بتحبى تسمعى صوته , مش من باب شكوى ولا عتاب ولا أى حاجة , انتى عايزة تسمعى صوت صاحبتك أختك , مامتك , خالتك ,,,,براحتك يعنى ,
اتفرجى على برنامج بتحبيه (كارتون , برنامج طبخ , برنامج دينى)
العبى لعبة جديدة مع ولادك (استغماية ,شد الحبل , القطة العامية,,,,)
اقرى كتاب بتحبيه
نامى زيادة شوية لو حاسة انك مشتاقة للنوم
زورى حد بترتاحيله من جيرانك أو قرايبك ( برضه من باب الزيارة وصلة الرحم فقط)
وطبعا مش هوصيكى على قراءة صفحات قليلة من القرآن , ومداومة الذكر
وكمان حافظى على صلاتك وخشوعك فى الصلاة
ده كلها أفكار أو مقترحات للتجديد فى حياتنا
عشان العمر مايمرش بين ايدينا واحنا واقفين فى نفس المكان
لازم عجلة الحياة لما تجرى احنا كمان نجرى معاها
بل بالعكس ,,, لازم كمان نسبقها
#جددى_حياتك
#السعادة_قرار
#خواطر_للمرأة
#أسلوب_حياة
#يالا_نتعلم_صحة
صحة نفسية يعنى :)
