الوسواس القهري: ما أشهر أنواعه وكيف نتعامل معه؟!
أنواع الوسواس القهري: ⤵
👈🏻 بشكل عام الوسواس القهري ما بيخرج عن نوعين:
-فكري.
-فعلي.
الوسواس القهري مؤثر على تفكير الشخص بالحالتين🙄، فهو تعامل سيء مع الخيالات والإفتراضات الذهنية والخوف والقلق والثلاث أعراض هي تترافق مع بعضها ترافق دوراني متل السلسلة. 🔄
بحيث أن القلق ممكن يزيد الأفكار الوسواسية غالباً والأفكار الوسواسية حتزيد القلق والخوف وبالآخر ممكن تصل لنوبة هلع كاملة بعض الأحيان 😣.
ونوبة الهلع تزيد الخوف من الوسواس وتكبر حجم الوسواس إلى أكبر من حجمه بكتير وبتخليك ممكن كل ما تتذكر النوبة أصلاً تخاف وكل ما تحس حالك عم تجيك فكرة وسواسية تتذكر النوبة فتخاف.
وهاد الشي أنت أبداً ما حتكون حابب أنو يستمر.
لهيك لازم نعرف كيف نتعامل معه بشكل جدي لأنو الوسواس متل كرة الثلج كل ما تركته بيكبر.
اليوم بيبدأ معك باكل الأظافر وإغلاق الأبواب وممكن ينتهي بأشياء أكبر من هيك بكتير وأهم من هيك تنغص عليك حياتك.
من طرق التعامل معه:
• تجاهل الفكرة الوسواسية من خلال عدم الاسترسال معها وتحقيرها وعدم إعطائها قيمة ولا حتى محاولة الرد عليها أو فعل أي سلوك لإراحة النفس، ولكن بالمقابل إلهي حالك عن الفكرة من خلال التركيز على شيء آخر (أكثر أهمية) مو بس تغيير وضعية الجلوس ولا غيره.
• لا تحاول تناقشه حتى من باب التسخيف، ولا حتى تقول عبارات مريحة متل (انا مو قلقان أو تحاول تقول أي جملة لتطمئن نفسك، ((لا تستغفر بسببه)) كلنا منعرف انو الاستغفار شيء جميل بس مو هلق لا تخاف معذور، اعذرني لكن نحنا مضطرين نقول ان الاستغفار مو تجاهل، لا تقدم للوسواس أي قربان وما تساوي أي شيء لتشعر نفسك بالراحة، هي الراحة المؤقتة بتغذي الوسواس وبتخليه يستمر معك وقت أطول وهاد الشي اللي ما بدنا ياه 😌.
لأن هاد مو وسواس عادي ومو فكرة عابرة متل: (شو رأيك تاكل هي الشوكولاتة، لا لا أنا عامل دايت، لا تصلي أنت تعبان، استغفر الله امبلا رح صلي)
هذا مو وسواس قهري أبداً، هاد وسواس عادي بتقدر تستغفر منه أو تساوي أي شيء.
أما القهري فهو مختلف تماماً !
وممكن يتداخلوا الإثنين لكن بيبقى كل واحد مختلف عن التاني.
• واجه مخاوفك وحاول بكل قدراتك أنو ما تخاف ابداً، حاول كسر سلسلة (الوسواس > القلق > الخوف).
إذا واجهت الوسواس دون الاسترسال معه متل ما ذكرنا بالخطوة الأولى وبدون الرد عليه مع محاولة إنّك تشغل حالك وتلهي حالك فوراً بشي أهم وبده تركيز وعدم الخوف ، وكمان لازم تستسلم لبداية القلق إذا شعرت به!، بعرف إنّك مستغرب من هي النصيحة بس ركز معي:
تعايش مع هاد القلق أثناء نوبته
نعم أنا قلقان، وبعدين، شو يعني؟ هل حيضل القلق للأبد؟ لا طبعاً.
خلص ما رح موت بسببه. 😌
بقلك الوسواس حتموت؟ خلص تشاهد أو ساوي أي شي واستعد للموت، لا تخاف من الموت استناه بدون خوف (خليك شجاع).😇
حتدعسك سيارة، عادي لا تفكر بالموضوع قد ما حاول يعطيك تخيلات سيئة لا تخاف وإذا خفت ورجيه إنك عادي مو خايف من الخوف، أنا عملت اللي عليي وخلص، كتير ناس دعستن سيارة وعاشوا عادي حتى بأسوأ الظروف وعادي الحياة بتمشي.
نوبة الخوف؟ أنا خائف عادي الخوف يفيد أحياناً ما المشكلة؟😉
تروك حالك خايف متل ما بدو ولا تركز عالخوف، سلم نفسك أثناء النوبة لا تخاف من الخوف ولا تقلق من القلق. ☹
((اكسر السلسلة تماماّ))! 💪🏻
• لا تستلم للفكرة الوسواسية ولكن تجاهلها ولا تفكر بها ولا ترد عليها وفقط تعامل على إنّك ترفضها عملياً وانتهى (عاملها كأنّها غير موجودة وغير مهمة).☝🏻
بعرف أنو هي النصائح صعبة بالبداية لأنو هية أصلا عكس اللي بدو ياه الوسواس القهري تماماً بس لو قدرت تنفذها بالتدريج حتماً حتلاقي الوسواس صار ضعيف كتير وما عاد تنجح خططوا واختفى وبوعدك حتى ما رح يكون من الذكريات لأنو غالبية مرضى الوسواس بينسو أصلاً كتير تفاصيل من حالتن بعد التحسن.
بقلم✍🏻: #غيث_وليد
