أتوظف وقت الدراسة؟

أبغى فلوووس بس أنا طالب وش أسوي؟

بروح أتوظف أهم شي تجيني فلوس وأشتري اللي أبي

بس أخاف يطيح معدلّي..أخاف ما أوفّي بينهم..

يا الله وش أسوي!!

هدّي بالك هذا الثريد يحل لك المسألة

بسم الله ..

المكافأة ما تكفي لزومك كطلاب

عشان كذا نحتاج نتوظف وتجينا فلوس ونرتاح ماليًّا

بس تعال ..

فيه شي اسمه ترتيب الأولويّات

هل المال في الوقت اللي أنت فيه طالب مهم لهالدرجة؟

غالبا لا، دامك عايش وأمورك الأساسية ماشية

يعني الدراسة أهم من الوظيفة في وقتك هذا

لا تخلّي ارتباط الوظيفة يشتتك عنها

أنا اشتغلت وقت الدراسة مع جهتين

وكلّها أثّرت علي ..

اشتغلت مع وزارة الإعلام لسنتين وكانت السنة الأخيرة مشتركة مع الدراسة

معدلي طاح وكنت أغيب كثير وأثّر على صحتي أيضّا

اطلع 6 الصباح وأرجع البيت 11 بالليل .. أيّام وعدت الحمدلله

أخذت بعدها قرار ..

أني ما ارتبط بوظيفة وقت الدراسة واستمريت سنة مركز على الدراسة بس

ولكن المصيبة ..

اشتغلت مرة ثانية هههههههههههههههه

مع جهة إعلامية وأثّر علي العمل جدا جدا جدا

ما كمّلت شهر ونص وطلعت ..

ثم بعدها خذت عهد ووقفة بيني وبين نفسي ما أتوظف وأنا أدرس لو ايش

فالإلتزام الوظيفي اللي يطلب منك حضور في وقت معين والخروج في وقت معين

ويأخذ منك جهد ما بين انتقال من جامعتك إلى عملك ما أنصحك فيه من واقع تجربة

بس ترى فيه حل إذا تبي فلوس وقت الدراسة

فيه منصة العمل عن بعد https://teleworks.sa/ar/

تلقى فيهم وظائف ارتباطها خفيف وعملها عن بعد

ما يأخذ منك وقت كثير بالغالب ولا يتعبك

بس رتّب المهام المطلوبة منك وحاول تخفّفها قد ما تقدر بالاتفاق معهم

أحد الزملاء اتربط مع جهتين عن بعد وهو طالب وما أثّر عليه

تقريبا ساعة باليوم أو سويعات بالأسبوع مجموع ما يعمل معهم

بس عن نفسي ما راح أعمل وأنا أدرس خلاص .. توبة ><

لا تستعجل على رزقك إذا أمورك ماشية

بس إذا عندك ظروف واحتجت أنصحك بالمنصتين هذي

لكن تذكّر دائمًا ( أي اتفاق معهم خلّه يكون على الورق عشان ما يضيع حقك)

بالتوفيق والله ييسر لكم جميع أموركم