*المقال ملخص لكتاب " How to read a book By Mortimer J. Adler " ، بجانب إضافات تجربتي الشخصية في تطبيق الكتاب *
في المقال الي فات اتكلمت شوية عن القراءة وقولت بالنص الآتي:
"القراءة من أكتر المهارات الunderrated و misunderstood في ثقافتنا. لأن الناس بتعتقد إن القراءة هتعلمك معلومات جديدة بس مش هتغير في شخصيتك وطباعك وطريقة تفكيرك، صعب تحدد مدى تأثير كتاب واحد عليك من قبل ما تقرأه (خصوصًا لو كتاب كويس)، صعب تتوقع طريقة تفكيرك هتبقى عاملة ازاي بعد ما تقرأ 5 كتب في الفلسفة (غالبًا هيبقى عندك نظرة مختلفة تمامًا للعالم عن دلوقتي).تأثير الكتب الجيدة علينا مشابه لإضافة لون جديد لإدراك شخص عنده عمى ألوان. أعتقد تجربة زي قراءة 100 كتاب في سنة فيها شيء من الخطورة لأنها مش عملية خطية هتقرأ دة بعدين دة وخلاص، مش مجرد تحدي لطيف هيخليك شخص مثقف، دة هيخليك شخص مختلف ويستحيل تتنبأ الاختلاف دة هيكون عامل ازاي. القراءة (الحقيقية) هتفتحلك آفاق كتير للتطور مكانتش في إدراكك ومنها تقدر تنطلق وتبدع بقا في المستويات الجاية وفي شغلك عامةً."
فالقراءة من العادات القليلة الكافية إنها تحولك لشخص مختلف تمامًا وتغير مجرى حياتك ولكن فيه عقبتين عشان تحقق النتيجة دي
العقبة الأولى: فيه حوالي 150 مليون كتاب في العالم وبيزيدوا بمعدل أكتر من 2 مليون كتاب سنويًا، لو افترضنا إنك بتقرأ كتابين كل اسبوع بمعدل 104 كتاب سنويًا لمدة 50 سنة، فهتقرأ 5200 كتاب، بالكاد لا تعرف شيء في إنتاج الحضارة الإنسانية، ولكن المشكلة مش في عدد الكتب، المشكلة إن أغلب الكتب دي (Trash) مش هتضيفلك ولا تفيدك بأي شيء، فيه كم كبير من الكتب محتواها مكرر وكم كبير من الكتب مفيد بس مش ليك (كتاب عن قانون الضرائب في تنزانيا أو كتاب علمي للأطفال).
99% من ال150 مليون كتاب (كتب تراش)، ومن الكتب المفيدة دي هتلاقي حوالي 10-100 ألف هتفيدك أنت، آلاف معدودة ممكن تؤثر فيك، مئات وربما أقل من مائة الي ممكن نعتبرهم كتب عظيمة (الكتب الي ممكن تغير شخصيتك وتفكيرك وحياتك). فالعقبة ازاي تعرف ال100 كتاب الي هيغيروك وسط الكم المهول دة؟
العقبة التانية: إن لو أنت عرفت إيه الكتب المهمة الي تستحق القراءة، هل دة معناه إنك هتعرف تقرأهم..؟
الكتب المتاحة لمفكري وعلماء العصور القديمة والعصور الوسطى كانت قليلة جدًا ولكن طلع ناس زي (سقراط، أرسطو، آريليس، ديكارت، كانط، نيوتن، ابن رشد، ابن سينا، ابن النفيس، إلخ..)، أي حد حاليًا ممكن يقرأ كل الكتب الي قرأها أي فيلسوف أو مفكر قديم ولكن هل هيقدر يطور نفس قدرات التفكير والنقد ؟ غالبًا لاء..ليه لأن القراءة في حد ذاتها مهارة فيه ناس أحسن من ناس فيها، أنا وأنت ممكن نقرأ نفس الكتاب في نفس الفترة الزمنية وأنت تستفيد بشكل أكبر بكتير فكريًا وعمليًا من استفادتي لأنك قارئ أفضل مني. الكاتب زي لاعب كورة بيشوطلك أفكاره وأنت كقارئ المفروض تستلمها صح عشان أنت تجيب جول. فالاستلام مهارة (استيعاب أفكار الكتاب)، وإنك تجيب جول مهارة (تطبيق أفكار الكتاب). فالعقبة التانية هي ازاي تقرأ صح؟
العقبة الأولى (تقرأ إيه) محلها مقال آخر، العقبة التانية (ازاي تقرأ) .موضوعنا النهاردة...
زي ما قولت القراءة مهارة قابلة للتطوير والتحسين، من المفترض إنك لما بتقرأ كتاب معين (غير الروايات) بتبقى شايف إن المؤلف أفضل منك في شي ما وفيه فجوة معرفية/مهارية/فكرية بينكم، بعد ما تخلص قراءة كتابه فالمفروض الفجوة دي بتقل وبتكون قربت خطوات لمستوى المؤلف الفكري أو المعرفي.لو عرفت تقلل الفجوة دي بشكل كبير فلما تيجي تقرأله كتاب تاني هتلاقي فهمك أسهل وأسرع بكتير من الكتاب الأول فكدة أنت قارئ كويس جدًا، لو حجم الفجوة متغيرش بعد ما خلصت الكتاب فلما تقرأ كتاب تاني لنفس المؤلف هتحس إنك بتقرأ كتاب مختلف لشخص مختلف وهنا أنت يعتبر مفهمتش حاجة.
مستويات القراءة الأربعة
فيه 4 مستويات للقراءة، كل مستوى فيهم بيفيدك بشكل مختلف ولكن يستحيل توصل لمستوى من غير ما تكون متقن للمستوى الي قبله، فالمستويات مختلفة ولكن مترابطة وهم (القراءة الأساسية، القراءة الفحصية، القراءة التحليلية، القراءة المقارنة).
المستوى الأول: القراءة الأساسية Elementary Reading
القراءة الأساسية هي المستوى الوحيد الي بنتعلمه في المدرسة ألا وهي القدرة على ترجمة الحروف والكلمات والجمل لأفكار المخ يقدر يستوعبها، بالتأكيد مش هتعرف تقرأ كتاب ما لو مش متقن المستوى الأول، فلو أنت عارف تقرأ المقال دة ومستوعب أنا بقول إيه يبقى أنت متقن المستوى، يبدو حاجة بديهية جدًا صح؟ مظبوط ولكن الوضع مختلف لو أنت بتقرأ بلغات غير لغتك الأم، لو لغتك الإنجليزية متوسطة هتقدر تقرأ الكلام سطحيًا ولكن مش هتستوعبه كله ومن ثم فأنت مش متقن المستوى الأول للقراءة بالانجليزي ومن ثم فمش هتقدر تنفذ المستويات الاعلى للقراءة، مش هتقدر تحلل أو تنتقد أو تبحث في أي كتاب باللغة الإنجليزية إلا لما لغتك تتحسن ولكن المفارقة إن مستواك مش هيتحسن إلا بالقراءة.. والموضوع هيبقى أصعب بالتأكيد لو بتحاول تقرأ بلغة أجنبية تانية لسة بادئ تتعلمها من فترة قليلة.
المستوى التاني: القراءة الفحصية Inspection reading
في المستوى دة، الهدف الرئيسي هو إنك تعرف هل أنت عايز تقرأ الكتاب دة ؟ هل يستحق قراءة تحليلية ؟ هل يستحق القراءة أصلًا؟ بتعمل دة في خطوتين.
-الخطوة الأولى: القراءة السريعة، بتحاول تشوف هيكل الكتاب وبنيته . افهم العنوان الرئيسي والعنوان الفرعي، اقرأ الفهرس، ومقدمة أو تمهيد الكتاب، اقرأ ملخص كل فصل لو متاح، واقرأ آخر 3 صفحات في الكتاب (في الأغلب أي مؤلف بيلخص كل أفكاره في آخر صفحات الكتاب). كدة أنت عرفت الكتاب بيتكلم عن إيه وكل أفكاره بشكل عام.
-الخطوة التانية: اقرأ النقاط الأساسية في كل فصل، مش لازمًا تفهم كل الي بتقرأه لأن لو الكتاب يستحق القراءة فهتقرأه تاني، ولكن اقرأ بسرعات مختلفة على حسب المحتوى وصعوبة وأهمية الفكرة. مش كل الكتب بيتم قرأتها بنفس السرعة، فيه كتاب 400 صفحة ممكن تخلصه في يوم، وكتاب 400 صفحة تخلصه في 3 شهور. وفيه فصل ممكن تخلصه في 5 دقايق، وفصل ممكن تخلصه في 3 ساعات. لكن بما إن القراءة الفحصية غرضها الأساسي إنك تعرف هل هتقرأ الكتاب دة ولا لاء مش إنك تفهم، فالموضوع المفروض ياخد منك في المتوسط 20 دقيقة، ولا يزيد أبدًا عن ساعة في حالة إنه كتاب ضخم وصعب.
لو لاقيت إن الكتاب يستحق القراءة، فأفضل طريقة لقراءته هي القراءة التحليلية، ولكن مش شرط تحلل بعمق كل كتاب تقرأه، يكفي إنك تقرأ الكتاب بجدية وتفاعل، مع العلم إن في حالة بتكن احترام للمؤلف فأفضل طريقة لإبداء احترامك هي إنك تاخد كتابه بجدية وتتفاعل معاه أثناء القراءة، ازاي؟
أول خطوة للقراءة الفعالة هي إنك تتفاعل مع الكتاب كأنه شخص وأنتم في نقاش مش بتحاول تثبت وجهة نظرك ولكن بتحاول تفهم الأول عن طريق إنك تطرح بعض الأسئلة أثناء القراءة، بعض من (وليس كل) الأسئلة المهمة الي ممكن تسألها كالآتي
-إيه هو الكتاب أصلًا، بيتكلم عن إيه، إيه موضوعه الأساسي (Theme)؟
-إيه القضايا والمقترحات والحجج الرئيسية المعروضة في الكتاب (main arguments) ؟
-هل المقترحات والحجج دي صحيحة؟ لو آه فصحيحة كليًا ولا جزئيًا؟
-إلى أي مدى المقترحات دي مهمة، مفيدة، وموسعة لآفاق تفكيرك (enlightening) ؟
-ممكن تبدي وجهة نظرك أو اختلافك أو اتفاقك أو انبهارك بأي نقطة ما عن طريق إنك تعلم في الكتاب (underlining) أو إنك تكتب ملاحظات أو تضع سؤال بجانب النقطة دي للبحث فيها بعمق بعد كدة، وجدير بالذكر إن أي مؤلف بيعتبر إنه وصل لقمة الإنجاز لو وصل للمرحلة دي (إن القراء يشوفوا أفكاره تستحق التسجيل والتدوين في ملاحظاتهم) .
هتكلم عن القراءة التحليلية بالتفصيل في الجزء التاني ، ونظرًا لأن المستوى الرابع متقدم للغاية فهنمر عليه مرور الكرام.
