ساعات لما بنوصف احساسنا اننا تعبانين وحسين ان احنا بنموت احنا فعلا بنبقي حسين بكدا حتى لو ماكنش في سبب واضح او كبير يخليك تحس بالإحساس دا
كل الحكايه ان الفكره كلها بتكمن في احساسك بالعجز العجز بانك مش عارف تحقق احلامك العجز بانك مش عارف تفرح نفسك العجز بالحفاظ على اشياء زى وظيفه او مشروع جواز او حب عمرك و فلوس او صحه بتوصل لمرحله انك بتبقي عاجز حتى تعيش وتعمل الوظائف الحياتيه العاديه
اكتر ناس سعاده هما اكتر ناس بسيطه وأحلامهم بسيطه وينتقد نضرب بيهم المثل واد ايه الناس دى سعيده وراضيه بحالها وياسلام على نعمه الرضا على الرغم ان الكلام دا مش زى ما انتوا متخيلينه الفكره انهم مش بيحسوا بالعجز اهدافهم في الحياه بسيطه اكل وشرب ونومه وحاجات بسيطه جدا بينجحوا انهم بيحققوها فمش بيحسوا بالعجز بالعكس بيحس دايما انه انسان ناجح
علشان كدا نلاقي مثل مصرى شهير على قد لحافك مد رجليك اى على قد امكانياتك احلم وحط أهداف
نوضع الفكره اكتر عن الالم النفسي لما تبقي ماشي كدا وسليم و فجاءة تروح متكعبل واقع على وشك هوب ايدك مكسورة وساعتها بتحس بالم فظيع نفس الموضوع النفسيه بتكسر قبتتعبك وتتالم
كل دا بيحصل مع كل الناس مع اى خبطه او وقعه في مهام الحياه والأهداف بتحس بالم نفسي
بس برغم كل دا هيفضل اسمه الم نفسي اومال ايه الاكتئاب إلى كل ماحد يزعل يومين يقولك انا مكتئب
الاكتئاب
دا مرض نفسي عضوى .... نعم . مرض عضوى ازاى يعنى ؟!!!
بكل أسف دى الحقيقه إلى ماحدش فاهمها الجسم عموما بيفرز هرمونات ومواد في الجسم مع كل احساس معين بتحسه يعنى حضرتك لما تيجى تحس بالخوف جسمك بيفرز هرمون الادريالين بكميات معينه لما تحس بالسعاده جسمك بيفرز هرمون السيرتونين وهكذا
طب ايه إلى بيبوظ الماده دى إلى لما بتقل افرزها جدا عن المعتاد بيبسبب الاكتئاب !!!!!
الموضوع بالظبط شبه لو انك فضلت تاكل كل يوم مخلللات كتير اوى وحاجات حادقه بكميات كبيره ومابتشربش مايه كتير كميه الأملاح والحوادق إلى عمال تدخلها لجسمك ومافيش قدمها مايه بعد مده هيحصل تكون حصوات وممكن يحصل فشل كلوى او قصور في وظائف الكلى لان كميه الملح إلى داخله الجسم مش قادر يواجها او زوت جسمك بالسكر كل يوم كل يوم بعد فتره هتطخن جدا وممكن يجيلك سكر
نفس الموضوع بالظبط كل يوم زعل وحزن واحساس بالعجز والدونيه وحاجات تانيه كتير الجسم يفضل مش قادر يواجه كميه المواد إلى بتتغير في الجسم حاجات بتتفرز بكميات كبيرة وحاجات تانيه بكمبات قليله فالماده إلى مسؤله عن المزاج الجيد يحصل فيها خلل ويحصل اكتئاب
طب ولما يجيله اكتئاب هيحصل ايه ؟!!
هيبدا يحس انه مش بس عاجز لا دا ولا ايه اى اهميه أو ان الدنيا وحشه اوى طب انا اعيش فيها ليه مش بس كدا بيبدأ يفقد شغفه بكل حاجه حواليه حتى الحاجات إلى كانت بتفرحه مابقتش تفرحه يبدأ دماغه تروح في حته تانيه هو اصلا انا عايش ليه عايز ايه ولا حاجه
ايه إلى هيحصل بكره يعنى ؟
ولا حاجه كل حاجه عظيمه وجميله بتفقد معناها والى كنت بدور عليه مش بتبقي عايزه ولا حاسس بيه حتى لو جالك
الموضوع دا بيتزايد لدرجه انه بيوصل للانتحار 😳 ها 😮 ايه ؟!!!
ايوة زى مابقولكم كدا كل ٤٠ ثانيه في شخص بينتحر على مستوى العالم و قدام كل محاوله ناجحه من دى في ٢٠ محاوله محاوله للانتحار
اقولكم على حاجه هتستغربوها جدا أغلب حالات الانتحار تسجل في الطبقات العليا والى المفروض حالتهم كويسه بس المشكله ان زى ما اتفقنا كل ما سقف توقعاتك وطموحاتك تعلى كل ما تبقي معرض الاكتئاب اكتر
في الاونه الاخيره حصلت اختلافات كتير وكلام كتير على موضوع الانتحار وليه بقي باين ومنتشر اكتر في مصر اليومين دول وبمنتهى البساطة ان السبب ان ظروف البلد مش سامحه ان الشباب يبقي حاجه بمنتهى البساطة الشاب يبص يلاقي نفسه ولا عارف يشتغل ولا عارف ييجوز ولا عارف يحقق اى حاجه
فبيحصل ايه بقي بيحصل عجز يبص يلاقي نفسه عاجز لو بصينا على الشباب إلى عندهم اكتئاب او النسبه الاكتر في الانتحار او الموت المفاجئ من الزعل هما الشباب إلى متفوقين اكتر و عايزين يحققوا أحلام كبيرة لكن الشباب التافه دا هتلاقيه سعيد وزى الفل
طب انا دلوقتى بقيت متلغبط اعمل ايه ؟ ماحلمش ابقي تافه عشان مايجليش اكتئاب؟
لا حضرتك احلم واسعى وخطط لحلمك بس وانت بتحلم وبتحط أهدافك حط معاك مكملات غذائية وفيتامين عشان لما تقع تعرف تقوم تانى
ايه بقي الفيتامين دى؟
تقرب من ربنا
تحط أهداف كتير مش هدف واحدا
تحاول تخلى الأهداف كلها متساويه في الاهميه لان الهدف الأكثر اهميه هو الأكثر هدم لنفسيتك لو ماتحققش
اوعه تستسلم لللحزن واطلع منه في اسرع وقت
خروج لازم مره في الاسبوع
رياضه او حتى شويه تمشيه
افتكر دايما روشته الحياه ابعد بكل جوارك عن السلبي وقرب من الاجابي وافتكر دايما على قد لحافك مد رجليك 😉
