السؤال ده من اكتر الاسئلة اللي ممكن تشوفها على جروبات الفيسبوك حالياً اللي بتتكلم عن الألعاب, او حتى البرامج, بس الألعاب اكتر شوية, ناس كتير بتحب تعمل Crack للألعاب و البرامج عشان مش عايزة تدفع فلوسها او مش معاها اصلاً فلوسها, و فيه ناس تانية بتدفع و تشتري و شايفة انها كده Loyal للمنتج و واثق في نفسه كده, و فيه اللي هتلاقيه, بيشتري او يستخدم Crack (يكرك) على حسب اهمية و تمن الحاجة.
مبدأياً Photoshop او Windows (مثلاً) الاصليين او المتكركين, هيدوك نفس الحاجات بالظبط, يعني التحديثات و كل الخواص اللي في البرنامج هتكون متوفرة ليك, طب ليه الاصلي احسن؟
اول حاجة هي الدعم الفني, يعني لو حصل مشكلة عندك في Windowsالمكرك في الغالب هتحط نسخة جديدة متكركة و هتبوظ و تحط غيرها, دايرة مغلقة, اما الاصلية ففي الغالب التحديثات هتصلح المشاكل اللي بتخلي النسخة تبوظ, و فريق الدعم بتاع مايكروسوفت هيساعدك (بنسبة كبيرة, مش دايماً يعني), و ممكن تروح تقولهم انا دافع فلوس يا (اي شتيمة تخطر في بالك), مع انهم في حالة Windowsلو طلع مشكلة في السيريال هيدفعوك 40 دولار فوق ال 120 دولار اللي هو سعر Windows 10 Home, بس قشطة, ساعات التعويض بيكون مجاني.
ده غير ان في النسخة المتكركة, ممكن في اي يوم تلاقي ابد يت نزل, خلى النسخة مش متفعلة, هتقوم انت قالب الدنيا على كراك و تحس انك محترف, و هينزل ابديت بعدها بفترة ما و نفس الكلام يحصل, الميزة في النسخة الاصلية, ان انت ضامن ان نادراً ما هيحصل مشاكل, انما في المتكرك, فيه احتمالية اكبر ان يحصل مشاكل, و مع ذلك مش شرط يعني.
طب الألعاب, ليه الاصلي احسن؟ اول حاجة هتلعب اونلاين, الألعاب القديمة كان تخطي الموضوع ده سهل فيها, يعني انا كنت لغاية فترة قريبة جداً بلعب Age of Empires 2 عن طريق Voobly و مكنتش شاريها, و كان ممكن العبها عن طريق GameRanger او اختيارات تانية كانت متوفرة برضو, و مازال ممكن تلعبها بالطريقة دي على فكرة, انما دلوقتي الألعاب زي Battlefield مستحيل تلعبها اونلاين و هي كراكد, و فيه العاب تانية كده زي Counter-Strike: Global Offensive او GTA V, ساعات الناس بتعرف تلعب CS:GO اونلاين و هي متكركة, بس حاجة صعبة جداً.
كمان جودة اللعبة بتفرق, يعني لعبة زي Just Cause 2 مثلاً او Far Cry 3, مكنتش عارف العبهم, اللي عمل النسخة زي مسح او عدل الملفات فمش عارف اشغل اللعبة كويس, هي حاجة نادرة بس بتحصل, لعبة زي Hitman Blood Money, انا لعبتها كراكد, مكنش فيها و لا اصوات و Cut Scenes, مكنتش فاهم هو بيقتل الناس دي ليه, مع انه قاتل مأجور فالطبيعي انه يقتل في ناس ملهاش علاقة ببعض بس مش مقتنع, اشتريت اللعبة على ستيم, و طلع ان فيه ييجي 3 دقايق Cut Scene قبل كل مهمة على الأقل فهمتني القصة, ده بالإضافة ان فيه مهمة كانت محذوفة اصلاً.
الفكرة في كده, ان انت مش هتستمعت باللعبة زي ما المطور كان قاصد, لأن مفيهاش اونلاين و مفيهاش Cut Scenes مثلاً زي ما في Hitman Blood Money.
بالنسبة للاونلاين مش كل الناس بتحبه, و ال Cut Scenes مش بتكون مهمة لبعض الناس و مش بتتشال من بعض النسخ, بس مازال الشراء على خدمة زي ستيم احسن, على الاقل ضامن ان اللعبة هتشتغل الا لو عندك مشكلة.
ده غير ان اللي عمل كده انت تثق فيه ليه, يعني هو فريق زي Reloaded او Skidrow, بيحبوا الناس فبيكركوا الألعاب للناس, او الفريق اللي بيعمل KMSpico بيحب الناس برضو, اللي يعرف يفك حماية Software اكيد سهل له فك حماية جهازك, و هو ممكن يكون بالفعل زرع حاجة في جهازك و انت بتركب اللعبة او البرنامج, او بيحط برامج زي ال BitCoin Miners اللي بيتعبوا المعالج و بيكسبوا من وراها كتير.
كده انا حاولت اوضح ليه الاصلي احسن, و لك الاختيار, ان شاء الله هيكون فيه مقالة تانية قريب عن الموضوع ده برضو.
لو عندك تعليق ابعتهولي على تويتر على @AHelmi9
