مشهد بيتكرّر كتير بينّا كـ مُصممين :
باختصار :
سمع أنّ تصميم الجرافِيك مجال (واسع وفيهو قروش وترطِيبة) ! طوّالي اتوجّه أقرب مركز تدريب في السوق العربي ، اتعلّم "أساسيّات الفوتوشوب" في ثلاثة أيّام ! أخذ شهادة (مُعتمدة) ، كتب قبل اسمو في الفيسبوك كلمة "مصمم الفتوشوب .." ! ، وضع قوائم أعمال وأسعَار ، جاهو أوّل عميل وطلَب منه تصميم ! ، .. *طوااالي جرى لصاحبو (الـ شغّال في البرنامج من 10 سنين وعابر فيه ومَا عندُو فيهو أي شهادة) عشان يسألو : "أسوّي ليهو شنو" ؟!! -_-
من الطّبيعي جدًا انو نشوف مشاهد زي دي ، وبتكرّر في مجتمعنا السوداني باستِمرار ، ويمكن نلقى (أوضع وأتفه) ! ، إساءة - يمكن تكون غير مقصودة لمِهنة التّصميم - ! اعتبارها مجرّد هامشيّات وأمور جانبية ومصدر كسب سريع ومُختصر للمال !
زي دِيل - للأسف - ما بنقدر نقرّ أنّو ضررهم محدُود على أنفسهم ، باعتبار أنّه لو إنت عايز "مجهُوداتك بتفوق عوائد عملك كمبتدئ إنت حُر" ! إنّما الضرر بيتعدّى لـ مهنة التّصميم في حد ذاتها ! وإبخاسها بصورة مُبالغة ، بل بيتعدّى الضرر ليصل للمُجتمع الفنّي والنظرة العامّية للفنّ والتصميم تنعكس بعدين على مكانة التّصميم وأهمّيته في مجتمعنا بصورة كبيرة وسيّئة ، بتنتج بيها عقليّات زي :
" دا شغُل ليك ؟! ، ما عِندك موضوع ! ، ياخي كلّو شخابيط ساي ! ، ود اخوي بعمل أحسن منّها ! ، هسي دي بتاخد فيها قروش ؟ ، جرب اللون الأحمر مع الازرق السماوي وشوية اخضر ! ، عندي 50 جنيه داير لوقو احترافي -_- ، .. " !!
• مجال التّصميم خصوصًا والمجالات الإبداعيّة الذّوقية عمومًا ما من نوعيّة المجالات اللي بيُكتفى بتدريسها وتحصيل شهاداتها ، هو ثقافة متكاملة وأكتر ! ، دراسة النّاس ، أذواقهم ، عوامل جذبهم ، التّأثير فيهم ، تخطِيط وتطوير وتنفيذ وإبداع .. ، بيحتاج لأكتر من شهادة ! تسأل ، تلاحظ ، تتمعّن ، تغذّي بصرَك ، تحلّل وتعرف المشاكل ، مش مجرّد كبسة زِر ومسكَة ماوس ! من الطّبيعي أنّو أنفّذ ليك الفكرة في ساعة ، في حين أكُون وصلت ليها في ألف سَاعة ! ، دي مهنتي ، ودا أنا كمصمم ، هو أكتر من مجرّد برنامج أو إثنين أو ثلاثة .. مُمكن نقدر نفهم أن مصمّم شعار زي شعار قناة National geographic ما بياخذ لحَظات عشان يصمّم شعار القناة السّهل "الإطار الأصفر المستطيل" ! لكن هل عارفين كميّة الدّراسة والتّساؤلات والدّراسات "نسبة ذهبيّة ، اللون الجاذب ، .." الـ مرّ بيها عشَان يقدر يطلع بيهو بشكل متناسق ؟!
دا التّصميم باختصار شديد ، صناعة الفَن وتمكين الجمال ، فن التّخلص من القُبح !
مبدأ عملك إنت كـ مصمم : أنّو أي تصمِيم بعبّر عن جهة ، أو عمل فنّي ترسُمه في مرأى من النّاس ، وأي صُورة بصريّة تخلقها في مكَان ، أعرف إنّك حكمت على المكان إمّا (بالقُبح ، أو الجمَال) ! ربّما لعقود طويلة من الزمان ! عشرات السّنين ، .. هي أمانة تحفظها وترعاها
دا أنَا ، مُصمم الجرافيك باختصار ..
وللحديث بقيّة :)
