أصلاً مهوش نافع
اصلاً
مهوش نافع
قلبي مهوش اسمنت
ولا من حجر صوان
لكن ما بينا حدود
صعب تعديها
المسألة بوضوح
الناس مهيش واحد
والطبع مش واحد
والاختلاف سنة
ساير عليهاالكون
واللي انتي نفسك فيه
مش هتلاقيه عندي
وانا قلبي قلب عنيد
ليه في الهوي مذهب
وعشان ما البي نداكي
لازم تهزيني
لكن انتي....
سامحيني
.................................
سامحيني انا أصلاً
معرفش اكون كداب
وعشان ما اقول حبيت
لازم تكوني بجد
عايشك وجوايا
لازم تكون طلتك
غاية لروح لهفانة
وبرؤيتك ترتاح
لازم تكون سيرتك
نشوة عبير فواح
لازم تكون بصمتك
جوا جدار الروح
لازم تكوني السر
واللغز والسرداب
لكن انتي.....
سامحيني
.....................
سامحيني ما قصدتش
اني اكون جبار
ادوس علي قلبك
او يتكوي بالنار
لكن انتي ما فهمتيش
كلام الأحبة عهود
لازم اكون قدها
لو قلت لفظ الغرام
لازم اكون مغرم
كلمة بحبك ميثاق
متدونة ومكتوبة
والشرع شرع الهوي
وعشان ما تبقي هوايا
لازم تكوني الدوا
واكون انا المعلول
لكن انتي ... .
سامحيني
