بسم الله الرحمن الرحيم.. كل عام وأنتم بخير ويا رب تكون سنة سعيدة وتخرجوا منها سالمين فرحين.
،،
فكرة عامة كده..
عندنا في خامسة two main bulks هما النسا والأطفال.. كل واحدة منهم ب 500 درجة..
الباقي شوية اسبيشيالات خفيفة في النص حوالي 7..
،،
نبدأ بالنسا..
فيه جزئين كتاب نسا وكتاب توليد..
الأفضل طبعا تشتريهم من القسم.. لأنهم كبار وبصراحة يستحقوا وتحتفظ بيهم..
منهج النسا كبير بل هو أكبر راوند وكل محاضرة هتلاقيها في رينچ 20 أو 15 صفحة فلازم تنجز أول بأول..
والمحاضرات مش مرتبة خالص بس تابع معاها قدر الإمكان..
في التوليد obstetric جزئين.. Volume1 و Volume2 هيتاخدوا بسرعة جدا خصوصا الأول.. أما النسا gyna فعادي مريحة شوية..
مصادر المذاكرة.. فيه تسجيلات كورسات كتير وأشهرهم دكتورة شيرين.. أو تسجيلات المحاضرات لو عاوز تجري شوية.. أو تذاكر مع نفسك..
التوليد أصعب من النسا في الكم ولا سيما الجزء الأول لأن موضوعاته كبيرة شوية وفيها حفظ كبير.. ال gyna سهل جدا تذاكرها لوحدك لو عاوز.. أو تسجيلات محاضرات عادي لأنها سهلة الفهم..
عاوز تشتري مذكرات هتلاقي لكن الكتاب أوفى وأكفى ويا رب يعينكم عليه..
وطبعا في كلينكال ده هتاخدوه في الراوند.. ولو تقدروا تحضروا لوحدة 3 عادي مش بتمنع حد بالعكس وحدة عظيمة والدكاترة كل يوم بتشرح حاجة تقريبا..
امتحان الراوند من 250 درجة..
فيه امتحان كلينكال 40 درجة.. والشفوي 50 درجة.. وال osce 50 وده أصعبهم عشان وقته قليل.. وال mcq 100 درجة.
والكلينكال سهل مش كتير.. لكن ال osce ده مطالبين بكل صور الكتاب زائد الكلينكال في الراوند.. يعني فيه فايلات زي أيام الموديولات للعملي كده بتتذاكر وده لازم يتهضم كويس..
النسا محتاجة جهد وشغل وفهم خصوصا جزء الولادة الطبيعي والغير طبيعي..
ملحوظة: فيه كتاب دكتور علي خليف بدل الكلية ملخص شوية لكن الأساس كتب الكلية عشان الessay خصوصا..
،،
ناخد نفس بقى بعد النسا المكعبلة :"D
وبعد 9 شهور الست ولدت ونبدأ في راوند الأطفال..
الأطفال بقى كتاب وحيد مريح.. صحيح خطه صغير لكن ملوش بديل ولا بيطلع امتحان عنه عكس الجميع..
الأطفال كتابها تصوره زي تشتريه مفيهوش صور وأبيض وأسود كله..
الراوند حضوره مهم جدا عشان تشتغل بايدك لأنه عكس النسا اللي كلها نظري هنا الأطفال كلها عملي بقى وكل يوم تتعلم حاجة وده جميل..
عندك 100 درجة كلينكال..
Two long cases كل case ب 30 درجة..
حالات من المنهج هتاخدلها sheet كامل وتفحصها وتشخصها وتتناقش مع الدكتور ومتقلقش هتبقى شايف حالات زيها..
و4 stations كل واحدة ب 10 درجات حاجات هتبقى معروفة وسهلة يعني..
و40 درجة شفوي.. و100 mcq و10 أسيمنت هنا وفي النسا..
مصادر المذاكرة.. المحاضرات حلوة لكن لو عاوز بدماغك اسمع قدري ملخص شوية للدنيا بس مش هيفهمك أوي..
عاوز تفهم وتبقى برنس.. عليك تجيب تفريغات أبي الأسرار بتاع القصر العيني.. Pdfs عظيمة جدا ومتسمعش حاجة وهتفهم جدا.. بس تضغط شوية على نفسك..
الأطفال كثيرة التفاصيل لكن اللي هتذاكره هتلاقيه بالظبط راوند وفاينال..
حاول تظبط الأطفال عشان هي مفيدة عمليا جدًا واشتغل بايدك واسأل واتعلم.. وحصل درجات من الراوندات قدر الإمكان..
والفاينال راجع امتحانات السنين اللي فاتت عشان تعرف المهم واللي بيتكرر
،،
فك أعصابك بقى هندندن شوية في الحاجات اللذيذة..
الاسبيشيالات..
،،
Cardiothorax.
وده تخصص لذيذ 10 أيام و60 درجة كله.. عندك 30 راوند.. بين mcq و osce وشفوي..
سهل جدا ومصدره كتاب محدد ومواضيعه معروفة مشهورة لا خلاف عليها عند الدكاترة :"D
وطبعا ننوه تاني اهتم بالامتحانات القديمة بتكرر تاني..
،،
Neurosurgery
وده زي اللي قبله كتاب بس قيم جدا ومواضيعه المهمة محددة والامتحان مبيخرجش منه.. واستمتع بيه ده لذيذ جدا..
وعليه 25 راوند عبارة عن 15 شفوي و10 mcq و25 فاينال.. وبرضه نفس القاعدة الامتحانات القديمة احفظوها بقى عن ظهر قلب :"D
،،
Urology..
وده أسبوع بامتحانه وعليه 60 درجة..
30 راوند ما بين mcq وosce..
هتلاقي لغط هنا أذاكر من الباور بوينتس ولا ورق قدري؟
اجمع بين الاتنين وورق قدري أشمل وأحسن.. واحضر طبعا واهتم بالأساسيات.. لكن ممكن طبعا يخرج الامتحانات هنا بس عن شرح الكلية عادي عشان كده ذاكر من قدري أضمن.. قدري مش ياقوت عشان تحصل معلومة صح مش مغلوطة.
وعندك 30 راوند منهم 7 شفوي والباقي فاينال 30 برضه..
،،
Cardiology
وده 60 درجة ممتع برضه لكن لازم تذاكر بفهم شوية عشان امتحانه بيبقى تقيل شوية.. مدته أسبوعين.
كتاب القسم لا مناص عنه رغم إنه مش منظم ومش هيعجبك لكن لا مفر للأسف..
احضر محاضرات حلوة ولو مفهمتش أو عاوز بدماغك وتفهم جامد اسمع دكتور أحمد موافي من القصر العيني..
فيه كلينكال شفوي جزء في الكتاب على الvalves بس ده العملي عليه 12 درجة والباقي mcq في الراوند..
اتعلم ECG مع نفسك محدش هيفصلك الموضوع ومش هتفهمه إلا بنفسك.
،،
الجلدية بقى..
أتقل تخصص عشان الحفظ والصحيان البدري وتشديد القسم في الغياب زائد إنه وضعه مختلف هتحسه غريب بين كل التخصصات ودرجاته عادية 70 برضه بس متقسمة بقى.. 3 أسابيع
هتحضر بدري ده مهم والكتاب مصدرك ومعام اسكتشك اللذيذ تسجل كل الأسئلة والتجميعات لأنها لازم ييجي منها راوند وفاينال وشفوي..
تذاكر للأوسكي وتركز فيه لأنه كتير ومعه.. فيه تسجيلات كورسات لو حبيت لكن مش مهمة أوي في ظل المحاضرات.. مشكلة الجلدية اللخبطة والتشابه والتفاصيل الرفيعة.. فاهتم بها.
الراوند امتحانه كلينكال حالات زي اللي بتشوفها ودول 4 درجات مضمونين وosce صور على ال data show وmcq وشفوي.. يوم هيبقى صعب شوية بس هيعدي بإذن المولى.. قل يا رب :"D
،،
الصدرية...
سهلة جدا وكذا محاضرة صغيرين حوالي 12 بس احضرهم أو اسمعهم... والكلينكال كام حالة بتكرر وبتدخل لحالة شبههم الامتحان الكلينكال ب 10 درجات وفيه ورقتين osce نظري لل mcq بس وهتعدي الدنيا سهلة بإذن الله في أسبوعين و60 درجة كويسين إن شاء الله..
،،،
عارف إنكم تعبتم لكن خلاص تتر النهاية وبنسدل الستار على مشهد الخلاص..
ال neuropsychiatry واسمحلي أحط قلب جنبه لأني بحبه وبحب قسمه💚
وحقيقي هتحبه جدا ولذيذ أوي أوعدك هتفهم ليه حطيت القلب لأنك هتتعلم النيورو وكمان السيكاتري بكل سلاسة والدكاترة متعاونين جدا جدا والكتاب عظيم وسلس وهو أحسن كتاب اسبيشيالات من كل ناحية.. هتجيب hammer و torch وعيش اللحظة كل يوم بقى لمدة 3 أسابيع وده كريزة السنة.. عليه 70 درجة..
والكلينكال اللي هتتعلمه كله هيبقى عليه 7 درجات بس!
وعندك الامتحان محتاج فهم أكتر من الحفظ وكله من الكتاب واحضر مراجعة القسم وأهم محاضرة سيكاتري مقدمة دكتور هشام الششتاوي هتحل امتحان الراوند والفاينال بها.. هتلاقي السيكاتري كبير وحاجات مش هيهتموا بيها في الشرح فكك عادي مش مهمة، الأهم اللي هيتشرحلك..
حاول تستغل الفرصة واتعلم من سنة خامسة هي طويلة ومجهدة لكن لو عاوز تتعلم حاجة هتتعلم فيه فرص كتير.. قسم مجهودك ومتيأسش هتتعب وهتجهد وهتكتأب كتير جدا عادي وهتبقى أطول سنة في حياتك معلش لكن هتعدى أنا عديت منها وبحكيلك أهه وكنت أظن إن الزمن توقف عندها.. لكن صدقا الدنيا بتتحرك وكله بيعدي فخلي عندك أمل وطموح وعشم في وجه الكريم.
،،،
وأخيرا ده ملخص عام للدنيا آسف لو طولت أو سهوت عن شيء ربنا يوفقكم لما يحبه ويرضاه ويزللكم الصعاب.. ويا ريت تحتسب تعبك وجهدك الطويل في طلب العلم ده لله وحده فيعلو قدرك دنيا وآخرة.
دعواتكم بالخير.
