تخاريف مصرية صباحية

لما يكون نومك تقيل، المفروض انك ما تعرفش تفصل بين الحلم و الواقع ..

تكون واقف في المحور الساعة ٢ الظهر والشمس فوق دماغك وإذ فجأةً ... تسمع صوت تخبيط على باب ..

تتلفت يمين وشمال عشان تلاقي مصدر الصوت في وسط المحور لكن للأسف ما تلاقيهوش ..

فعقلك يقول لنفسه " الله، الصوت ده شكله جاي من الواقع مش من المحور " يروح مصحيك من النوم عشان تاخد بالك ان في حد غلس بيخبط عليك الباب وبيصحيك من النوم .. او ممكن ما يكونش غلس عشان انقذك من زحمة المحور الساعه ٢ الظهر 😂

ايوا بالضبط، نبص للنص المليان من الكوباية ..

المهم ما علينا، الشيء ده مفيش منه قلق عشان ساعات بيكون سببه انك مش بتنام كفاية فلما بتنام بتروح ع المحور 😂 وساعات ما تقدرش تسمع صوت الباب اصلاً ولا حتى لو فجروا قنابل جنبك 😂 عشان جسمك مرهق جداً وعقلك قرر يجبرك ع الراحة .. " برنس العقل ده " 😂😎

انما لو بتنام ساعات كتير وبرضو مش عارف تصحى او تصحى مرهق فده ممكن يكون بسبب انك ما اخدت كفايتك من الأوكسجين وانت نايم، يا اما مشغل الدفاية وقافل الباب فالأوكسجين خلص وانت نايم، يا اما ساكن في اماكن نسبة الأوكسجين فيها اقل بشكل طبيعي ومش بايدك، يا اما عندك مشكلة في مجرى التنفس فلما بتنام بيبقى صعب عليك تتنفس كويس

كل ده ممكن يتحل انما لو بتنام على نفسك كل شوية في وسط كلامك مع حد مثلاً فده ممكن يقلق شوية، عشان ده احتمال كبير يبقى مرض اسمه Narcolepsy ولو هنترجمه حرفياً هيبقى اسمه "الخدار" يمكن عشان انت جسمك بيتخدر وتنام على طول 🤔 سبب المرض ده كان مش معروف لحد ٢٠١٧ وده تاريخ المقالة اللي قرأتها عنه لكن العلماء اللي بيدرسو المرض ده شاكين ان الموضوع له علاقة بالجينات الوراثية لبعض الاشخاص وهي اللي بتسبب لهم الحالة دي من النوم المفاجئ ..

الحالة دي بحسب ما شفت فيديو لوحدة عندها المرض ده، هي بيجيلها نوم مفاجئ ممكن جزئياً يشل حركتها عشان تنام لثواني او دقيقة وبعدها تصحى وترجع تنام بعدها بشوية فالموضوع نوعاً ما مش بايدها كمان بيجيلها دوخة وتقريباً صعب انها تفتكر كانت بتعمل ايه قبل ما تنام "ساعات" ..

برضو الناس اللي عندهم الحالة دي ما يقدروش يعملو بعض أنواع الرياضة زي السباحة مثلاً، عشان صاحب الحالة دي ممكن ينام وهو في المية ويغرق "لا قدّر الله"

ده فيديو عن حياة بعض الناس للمصابين بالمرض ده:

‏https://m.youtube.com/watch?v=m0e8N6zDuYE

هنا المصادر اللي جبت منها المعلومات :

- https://www.webmd.com/sleep-disorders/guide/narcolepsy

- https://m.youtube.com/watch?v=1PuvXpv0yDM

- https://m.youtube.com/watch?v=d41BfD21b48

-