اليوم قدرت اجلس مع اهلي و أكون الحاضرة الحاضرة، بعقلي و بروحي و بكل مافيني..
ابوي، امي، اخوي، اختي وأحفادنا الأعزاء
وفي وسط هذي الزحمة اللطيفة ، اكتشفت ان عندي مشاعر لطيفة وعميقة جداً لكل شخص فيهم، ما كان عندي وقت أحس فيها من قبل، عشان كانت عيني على جوالي طول الوقت، وتقريباً جوالي خلاني بعيدة كثيييير عن أهلي و عن كل لحظة يعيشونها "حلوة و مرة" و هذا يذكرني كلام أمي اللي دايم تقوله لي لما أستغرب حاجة جديدة حصلت في البيت او العيلة "دلال إنتي فاصلة ".
كنت أطنش الكلمة و أتجاهلها وكأني عايشة مرحلة المراهقة 🤔 بالضبط مراهقة متأخرة عشر سنوات 😂
اليوم كانت عندي الفرصة اني أتأمل ابوي وهو يلعب مع احفاده، وهو يتكلم معانا، وامي اللي تخاف علينا كلنا من صغيرنا لتكبيرها و تداري الصغار لا يروحون عند الكهرباء ولا يقعدون على الارض الباردة ويمرحون لا قدر الله.
والأحفاد اللي كل واحد منهم يحاول يثبت انه القارئ الفنان اللي يقدر يقرأ أي حاجة مكتوبة في كتالوج سوبرماركت "كبير ومعروف" 😜 .
واللي أصغر منهم يحاولون يُعلّمون بعضهم شوية حركات ومصايب 🙄
بعد الجلسة هذي،زاد إصراري على ترك الجوال فترة أطول، واحتمال كبير الغي الواتس آب لأنه حرفياً ماخذ جزء كبير من طاقتي الذهنية وذاكرتي.
اليومين هذي شهيتي للأكل قلّت بشكل كبير و صرت ما آكل إلا لما أحس بجوع رهيب مسيطر على كل تفكيري والسبب فيه إني من أسبوعين تقريباً جاتني حالة تسمم من أحد المطاعم المشهورة في مكة 😜 و قعدت تعبانة أسبوع كامل وهذا الشي خلاني نوعاً ما أكره الأكل السريع ، المهم ...
أهلي مش متعودين إني ما أطبّ في كل وجبة 😂 فأمس واليوم مثلاً أختي كانت عازمتني ع العشا و ما قدرت آكل لأن شهيتي مش مفتوحة زي أول ومش جيعانة، فتقولي " لازم نقرا عليك فيك شي انتي 😂 "
وأمي وأبويا عازميني على أكلة مرررره أحبها " المسقعة " لكن ما أكلت برضو وأهلي يطالعون في باستغراب 😂😂😂 وكأنهم يقولون في بالهم " بنتنا فيها شي 😂 "
الزبدة إني الآن كملت 52 ساعة بدون جوال و بطارية جوالي 57% 😎 دماغي فاضي منه قرابة الـ50% وهذا الشي خلاني أنزل المكتبة وأجيب بعض الأدوات عشان أشتغل على مشروع صغنطوط لأحفاد العيلة 😍
شكراً لك عشان وصلت لحد هذا السطر 🌷
انتهى.
