الغزو الاحمر
صحيت كالمعتاد شربت قهوتي و نزلت ذ اي يوم
لقيت الناس لابسة احمر وانا عارفة ان الموضوع دابيتكرر كل فترة عشان يا الاهلي بيلعب يا مصر بتلعب
لقيت بتاع الورد حاطط كمية قلوب من الورد مش طبيعيه قولت الورد عندنا كمصريين ليه 3 معاني
يا حد اتوفي
يا حد في المستشفي
يا موسم وهيعلموا من الورد مربي
و لقيت ناس في السوبر ماركت ببوكسات حمرا و بيحدفوا فيها جرادل شكولاتة كانت كل احلامي اشد بوكيه من دول و اخد علبة من دول تحت دراعي كدا هون "معاملة الجرانين دي " بس العين بصيرة والايد قصيرة
و بعدين لقيت ناس كتير بتشتري ورد وعنيهم تقريبا بتطلع قلوب و كيوبد بيحوم حواليهم و لو كان بيحدف سهام بجد يبقي كان زمنهم متشرحين وبنصلي عليهم العصر في القائد ابراهيم
برده الكان في بيطلع الفلوس وهي صعبانة عليه وكأنه بيقضي واجب او بلاء و وجب وقوعه عشان ينام في سريره
ولقيت بنات وولاد كابل ماشيين وبحاول اابص الولاد شايلين ايه في ايدهم ولقيت البنات معاه بصتلي بنظرة كراهية كاني محصل النور بعد رفع الدعم حسستني ان الكوكب تم غزوه من سكان كوكب الزهرة
وفجاة جالي مسج بالغلط مكتوب فيها "هابي فلانتين يا بيبي متنساش ميعادنا"
وهنا بدات اجمع الفلانتين دا عيد شبه يوم الفلاح و6 اكتوبر كدا بس مش اجازة يعني مش مهم للعبد لله في اي حاجة
وبعد ما روحت
انا : هل تدري ان النهاردة الفلانيتن
اختي : اه اصل البنت في المكتبة كانت مصممة تبيعلي حاجات وتقولي الفلانتين قولتلها مفيش حد يستاهل
انا : ايه شغل المطلقين دا طيب مقولتليش هابي فلانتين
اختي : بلا عيد حب بلا عيد هلع دا عيد مفهوش اكل العيد عيد صغير كحك عيد كبير لحمة عيد غطاس قلقاس شم نسيم فسيخ ورنجة لكن دا مفهوش بركة قومي اغسلي المواعين دورك انهاردة "
اتجهت اختي للتجاهل التام وفي محاولة اني اعيد نفس السؤال وقفت تصلي وبصوت عالي "الله اكبر" ولما حد يقول الله اكبر كلنا عارفين ان ليها كذا معني
-مسمعش صوتكم
-وطي التلفزيون
-طلعي الفرخة من الفريزر
-الاكل العلي النار بيتحرق
-وقعتك سودا بعد ما اصلي
معني يفيد الشمول والعموم ولو كنت اتكلمت كلمة كمان كنت هنام في الصالون
فروحت لبابا
انا : اباااااااابا
بابا : نعم
انا : انت مش واخد بالك يا ان انهاردة الفلانتين و مقولتليش كل سنة وانا طيبة وشروق وحيد عندي فراغ عاطفي
"وبنظرة يعوض عليا عوض الصابرين"
بابا : كل سنة وانتي طيبة
طيب مقولتش لماما ليه ذي مراتك يعني
ماما : "ذي كل ام مصرية عريقة " ما انا الجارية بتعتكوا الابوكي اشتراها
"بنظرة هتبرا منك واحرمك من الميراث"
بابا : كل سنة وانتي طيبة
روحت لرفيق الدرب " عب سلام"
انا : بما اننا عشرة فين هدية الفلانتين
عب سلام : الستات عندنا بتاكل لما الرجالة بتموت
انا : طيب مقولتليش هابي فلانتين داي
عب سلام : مش جولتلك في مرة يا بيبي
ولما ياست واقتنعت ان الفلانتين دا معول لناس تانين قولت قررت اني انهي البدأته
وخدت القرار العظيم ودخلت نمت.
