انا اسمي في شهادة الميلاد كارما بابا بيقولي كرملة وماما كرومة وصحابي كركر بس المجتمع بيقولولي عانس بكتب الكلمتين دول عشان اسالك سؤال مهم محتاجة رايكوا فيه جدا في الاخر
مشكلتي بنسبالك مجرد قرار بس بنسبالي هي بلاعة من غير غطا المجتمع محاوطني بيها انا العديت ال30 ومش عايزة اتجوز بنسبالي وبنسبالك "so what"
لكن لاهلي وصحابي وعباس الضو "لاااااااااااا" مش هتخلفي عيال يملوا عليكي الدنيا ويشيلوكي في اخرتك ببقي نفسي اقولهم " guess what" ممكن يحطوني في دار مسنين عادي
لا وطنط اعتماد واخواتها "ياختاااااي" الكل ما تشوفني "مش هنفرح بيكي ؟ البت ذي الوردة لما تقعد تدبل وتبور ذي الارض " الهو يا طنط انا فرحانة بيا جدا تعالي افرحي معايا وادبل ايه دكاترة التجميل بيخلوا البوصة عروسة
ولو اجوزت "مفيش حاجة في السكة ؟" الهو معلش اتعصلج في الجمارك فهيتاخر شوية
و خلفت "مش هتخاويه ؟" كاني ارنبة ولا بشتري العيال من طائر اللقلق الفي الهايبر ماركت العلي اول الشارع
عمر ما حد سالني ليه ؟ تعالي اقولك ليه بقي
-يعني انا اذاي اتجوز واحد مشوفتوش 24 ساعة قدامي محدش يفهم غلط مش عيشة الاجانب اقصد ان لو طلعتوا مع صحابكوا سفر اسبوع هترجعوا بمشاكل لا متناهاية بسبب صدام الطباع انك تشوف حد ساعتين في اليوم ولا كل اسبوع وانت واخد ميعاد وداخل عليهم البيت ب2 كيلو برتقال حاجة وانك تعيش مع حد حمادة تاني هنا بنتصدم باختلاف الطباع والتفاصيل الصغيرة ومع تركمات كتير جدا بقت ناس تطلق ويكرهوا بعض من تركمات صغيرة جدا منها "في ميعادك بتظبط المنبه قبل الميعاد بساعتين ويفضل يرن كل 10 دقايق , بتفتحي النور وتعملي دوشة وهو نايم , انك لما بترجع مبتقدرش تكلم ولا تسال القدامك عن حاله بعض اليوم الطويل دا ولا تسمع القدامك حتي , انك كائن ليلي وهي نهاري , انك بترمي هدومك في كل حتة وهو شخص منظم جدا , انك بتنسي تشد السيفون كلها تفاصيل تافهة لما تتراكم ينتج طلاق او خلع
-خايفة علي الكرير بتاعي مفيش عريس قعدت معاه إلا و وشه بقي شبه الشراب المقلوب وانا بكلمه علي الدراسات العليا البحضرها ولا عن اهميه الكرير بتاعي بنسبالي نفسي ابقي حاجة ومش عارف افكر في فكرة الجواز والكرير سوا يعني شايفة الكرير طريق ودا طريق ديما وبخاف ابقي مربوطة في طاحونة والطرف التاني يجبرني اضحي مقابل انه ميحاولش يساندني
- لما باجي افكر المصاريف هتبقي النص بالنص بقي ونبقي اسرة سعيدة شبه العلي علب المربي الاقي ان معظم مشاكل علي التلفزيون وبتتبعت لصفحات السوشيل ميديا ياخدوا راي الناس ان الراجل والعربي تحديدا بيخبي كل حاجة عن مراته ويحبها معهاش فلوس بحجه انها هتتنطط ومش هتبقي محتجاله ومش هتبقي محتاجه فيحب يكسرها ويقعدها في البيت يا يخليها تصرف عشان ميبقاش معاها فلوس وتفضل الكائن الهش المربوط فيه لمجرد انه بيصرف عليها او انها متقدرش تشيل الدنيا من غيره !
علاقات رديئة جدا مش مبنية علي حرب وتخطيط يعني بتسند علي حيطة مايلة اذاي اشارك حد احتمال يكون بيفكر كدا
- هخلف اذاي عيال في البلد "atmosphere" فيها منيل كدا وكل حاجة بناكلها ونشربها تجيب المرض حتي المياه يا مؤمن دي والمدارس تعليم هييهيهيهيهيهي و عشان حياة طبيعية المفروض ادخلهم انترنشونال واحسن دكاترة الخ الخ ودا محتاج ان الواحد يكون شغال ديلر بالمنظر دا "سلامات يا بلد"
و لا اسيبهم ينزلوا الشارع خصوصا لو بنت وتتعرض للكل يوم البنت بتتعرضله من تحرش ومعاكسات واضطهاد في شغل كانها حاجة ثانوية لمجرد انها بنت قولت ادعي المولي عز وجل يرزقني باولاد لقيتهم بقوا يتحرشوا بالاتنين
-ومش قادرة اتخيل اني اكون ماما
اذاي اقدر اعمل التضحيات الماما بتعملها عشنا من انها تصحي عشان تصحينا وتطمن علينا وتقعد طول اليوم قلقانة لحد ما نرجع وتغسل وتمسح وتطبخ حتي وهي عيانة وتفتكر التواريخ المهمة بنسبالنا والتفاصيل الصغير الاحنا بننساها دا انا بفتكر اسمي بالعافية و لو متجوزة شخص مش مناسب ممكن تتعايش شخص مش متوافقة معاه عشان خاطر العيال الممكن يطلعهم مشوهين نفسيا وعشان المجتمع بيشوف المطلقة بكل نطاعة كانها عاهرة مش انسانة طالعة من علاقة مدمرة نفسيا وبتحاول تبدا من جديد حاجة "dirty" مع مرتبة الشرف
-اذاي الجواز بيكون نهاية كل حاجة حلوة مشاعر وكلام حلو وحياة كمان
- اذاي يكون معايا شخص مش بيساندني فكنا من هبل البيضربوا بعض بمخدات ريش ناعم انا لو عندي مخدة ريش نعام هحطها في النيش اساسا بس اذاي ملقيش حد يحطويني واحس بنفس الفراغ الداخلي وانا متجوزة
وفي الاخر تيجي واحدة تقولي انتي متجوزتيش وتمصمص شفايفها وتخمس لما تبصي علي جوزها وعيالها وتقولي "ربنا يسعدك" واسمعها بتتوشوش وتقول "يا عيني مسكينة ملهاش بخت فاتها القطر"
هل اكشفلها ان القطر داسها ولا اسيبها علي عماها ؟
