زمان وانا تقريباً لسه في الإعدادي اتعرضت لإصابة أدت الي كسر ايدي الشمال وترتب عليها تدخل جراحي وتركيب مسامير، أما بقا وانا في الجيش فاتعرضت لإصابة تانية في ايدي اليمين ، اختلفت أماكن الإصابات وأزمنتها لكن السبب واحد .. كرة القدم ..
وبجانب هذه الإصابات تأتي ايضا الإصابات الأقل خطورة والتي لا اعلم اسمها الطيبي ولكني سأطلق عليها الإصابات الرياضية كالشد العضلي والكدمات والتجلدات وغيرها وغيرها ..
وبجانب ايضا هذه الآلام الجسدية .. كان فيه آلام نفسية برضوا كانت بتتمثل في خسارة الفريق اللي بشجعه أو خسارة بطولة شاركت فيها ..
ورغم كل ده إلا اني لسه بحب كرة القدم ، بل بعشقها ، ولسه بشجع وانا عارف ان الفريق اللي بشجعه هيتعرض لخسارات تانية ، ولسه بلعب وانا عارف اني ممكن أتعرض لإصابات تانية !
الكام سطر اللي فوق دول خطروا علي بالي لما لقيت نفسي بتسائل .. هو ايه الحد اللي ممكن أقيس عليه حبي لأشخاص وحاجات تانية في حياتي ؟؟ بجانب اني تسائلت برضوا ماذا لو نصفي الاخر سألني مستقبلاً انت بتحبني قد ايه ؟! هل لو جاوبت وقولت بحبك كـ كرة القدم هيكون الجواب عادل ؟! من وجهة نظري شايف انه عادل جداً ، بس هل هيكون الجواب مُرضي ليها ؟! دا اللي لسه معرفوش ، بس اللي انا أعرفه كويس ومتأكد منه تماماً إن طالما فيه أشخاص وصل حبي لهم مساواة بكرة القدم .. فالأشخاص دول يعتبروا حجزوا مقاعد مهمة جداً في قلبي بلا مبالغة ؛
" فليحيا هؤلاء الأشخاص ولتحيا كرة القدم "
