الTrend إيه النهارده ؟

فيه مصطلح في العامية المصرية الحديثة ، إسمه هري ..

الهري بإختصار شديد يعني الثرثره والكلام ع الفاضية والمليانه ، بداعي وبدون ... فاهمني طبعا ..

التريند علي السوشال ميديا .. هو المعني الحقيقي ، والتطبيق العملي لكلمة  هري  ..

كل  يوم بيطلع موضوع علي السوشال ميديا يشغلنا ، ونقعد نتكلم عنه طول اليوم ونعيد ونزيد فيه .. 

تاني يوم .. موضوع جديد .. يلغي اللي قبله ، ولا كأن كان فيه حاجه ، ونهري تاني في موضوع تاني ..

العجيب إننا ممكن نكون زعلانين جدا إمبارح ، وفجأه بدون أي سايق إنذار نبقي في قمة الحزن..

دا ممكن يحصل في الطبيعي في أيامنا العادية .. بس بيبقي مصطنع  ، وأوفر أوي علي السوشيال ميديا..

المواقع الإخبارية عندها نسبة متابعين كتير جدا .. بتستغل ده في إنها تعرض مايشغل ،  وليس مايهم الناس ، في إنها تتكلم عنه بطريقة سطحية علشان تعلي نسبة المشاهدة عندها وبالتالي تكسب من الإعلانات اللي علي مواقعها ..

طيب الناس كسبت إيه .. ولا حاجه ..

برغم إن ده مفيد للمواقع اللي بتعتمد علي نسبة المشاهده كمقياس لتحديد نجاحها من عدمه .. بس كقيمه للناس ، أو كشيء ينفع الناس .. ولا حاجه ...

لكن تعالي بص علي شهر ورا  ، وشوف كمية الحاجات اللي إنت تابعتها هتلاقي المحصلة في النهاية لاتذكر .. كام موضوع غير حاجه في حياتك للأفضل ، أو ساعدك تتطور في شغلك  ، أو حياتك .. مممم مش عارف ..

هي دي مشكلة التريند ، أو مايشغل الناس كل يوم ويتحدثون عنه ..

طب ليه التريند مش مفيد في كل الأوقات ..

أولا دا شيء مفروض عليك كل يوم .. لما تفتح التايم لاين وتلاقي صفحات الأخبار والمواضيع الكبيرة ..

فيه ناس بتحس إنها لو ما إتكلمتش عن موضوع الساعه ، وأدلت بدلوها فيه .. كده هيبقي كلامها بايت ، حتي لو ماكانش ليها أي علاقة من قريب أو بعيد بالموضوع .. 

مش عيب إن إحنا نعبر عن رأينا ، بس المشكلة بتيجي لما بنبتدي نهري لمجرد  الهري فقط لاغير ..