نرجع لقصتنا، سيدنا موسى وقف أمام فرعون الظالم وسيدنا موسى كان معه 9 معجزات، بني إسرائيل كلهم شافوها بعينيهم، فسيدنا موسى أخذ بني إسرائيل واتجهوا ناحية فلسطين وفرعون وجنوده وراهم، وانتوا عارفين البحر الأحمر فيه من فوق زعرورتين الزعرورة الشمال اللي ناحية مصر ده البحر اللي كان قدامهم فربنا أمر سيدنا موسى إنه يضرب البحر بعصاه والبحر حصل فيه زي ممر عشان يعدوا منه.
يعني شافوا المعجزة العاشرة برضه قدام عينيهم فجيه فرعون وجنوده وراهم وغرقوا والقصة بقا انتو عارفينها، أصبحوا في سيناء مازال لم يصلوا فلسطين فلما دخلوا سيناء وجدوا قوم بيعبدوا الأصنام، فبني إسرائيل أول ما شافوا الكلام ده قالوا الله ايه الأصنام الجميلة دي، فقالوا لسيدنا موسى -اجعل لنا إلها كما لهم آلهة- بعد 10 معجزات *ده انتوا لسه شق البحر مفيش ايه ده ايه الغباء اللي بيجري في الدم ده!*
المهم سيدنا موسى عَقّلهم وترك معاهم أخوه سيدنا هارون ووصاه على بني إسرائيل، وتركهم وراح سيدنا موسى جبل الطور عشان له ميعاد مع الله وده الوقت اللي ربنا أنزل عليه الألواح فسيدنا موسى غاب 40 يوم، فبني إسرائيل ومعاهم سيدنا هارون كان فيه واحد في بني إسرائيل اسمه السامري الراجل ده وقت المعجزة بتاعت شق البحر كان سيدنا جبريل نزل فالسامري ده شاف سيدنا جبريل فأخذ شويه تراب من أثر فرس جبريل وخباهم معاه، فلما سيدنا موسى سافر، راح السامري لبني إسرائيل وقالهم انتو فاكرين الذهب اللي اخذتوه من مصر من الفراعنة واحنا خارجين، الذهب ده حرام وربنا هيغضب عليكم ولازم تعطوني الذهب ده عشان أخلصكم من ذنوبكم انتوا شايلين أوزار، قام مجمع الذهب سيحه (أذابه) وبنى بيه تمثال على شكل عجل وجاب شويه التراب اللي كان مخبيهم وراميهم على العجل، عارفين لما بيبقى فيه ماسورة أو حاجة فاضية من جوه فلما يعدي من جواها أي هواء فتعمل صوت الصوت ده اسمه نخير فالعجل ده كان كده كان كل ما تعدي ريح يطلع صوت، فالسامري جمع بني إسرائيل إلهكم اهو، قالوا له وسيدنا موسى قالهم إلهكم وإله موسى، *أكيد طبعا قالوا احنا مش هنفكر كتيررر يلاا نعبد العجل ازاي نلاقي فرصة نقدر نستغبى فيها ومنستغباش دي هوايتنا.*
طبعا أغلبهم عبدوا العجل ما عدا جروب صغير فضلوا مستنين سيدنا موسى، بعد ال40 يوم سيدنا موسى رجع وشاف الجمال ده فعاتب سيدنا هارون ازاي يسمحلهم بكده، فسيدنا هارون قاله انهم استضعفوه وكانوا هيقتلوه فهو خاف يعمل فتنة ما بينهم واستناه لغاية لما يرجع، *أنا بحكي القصص دي عشان أظهر لكم مدى غباء بني إسرائيل وتجرؤهم على الأنبياء.*
#يتبع...
- دُعــاء 
