شُفت النجوم سبحة

ماسكَها بإيديكى

بيسبحوا ليكى

و انتى مبتسامحيش

و بيطلبو الغفران

من الكذب و من الطيش

و يقدموا لروحك

الملح ويَّا العيش

و بردوا يا غالية

انتى مابتغفريش

و قولتلى علشان أغفر

و ارجَّع الماضى

و نبقى زى زمان

تبقى السبح ألوان

بدم مصراوى

شقيان و غلبان

مقتول فى كل مكان

محروم يكون إنسان

و يشوفوا بعينهم و يسمعوا بودنهم

فى كل لحظة صفا

قلبى مع الكروان

يتمنى غفرانى

جايز ساعتها أسامح

و نبقى زى زمان