دليلك الكامل للعبة بوكيمون قو (الجزء الأول)

بالأيام الأخير وبالتزامن مع العيد تقريباً، شركة نانتيك بالتعاون مع شركة نينتندو وغوغل أعلنت عن طرح النسخة التجريبية من لعبتها المنتظرة Pokemon GO. وفي ساعات فقط العالم كله تجنن والناس صاروا كلهم يمشون وعيونهم في شاشات جوالاتهم وكل يوم يطلع خبر عن حوادث طريفة أو مؤلمة أحياناً بسبب محبين اللعبة وحبهم لأنهم يجمعون البوكيمونات في الشارع.

لو أنت واحد من مهاوييس البوكيمون أو من الناس اللي يبون يستمتع بالتجربة مثل باقي ربعه، أو لو أنت من الناس اللي عندهم فضول عن اللعبة وحاب تعرف شلون تبدء رحلتك وتحقق حلمك في أنك تكون مدرب الوكيمونات الأقوى في العالم تابع معانا المقالة عشان تتعرف على طريقة اللعب. ولو عندك أسئلة تقدر تطرحها علينا في حساباتنا على تويتر والفيسبوك بأي وقت.

في هالدليل بنتكلم عن: 

• اشلون تنزل اللعبة؟ 
• اشلون تلعبها؟ 
• شنو ال Pokestops
• اشلون تلاقي بوكيمونات واشلون تمسكهم؟ 
• شنو الجيم واشلون تحارب فيه؟ 
• اشلون تطور بوكيمونك وتطوره؟ 
• شنو تسوي بالبوكيمونات المكررة؟ 
• اشلون تعالج البوكيمون بعد المعركة؟ 
• ونصائح مهمة Hints

شلون تنزل اللعبة؟

اللعبة للحين ما نزلت بشكل رسمي. موجودة بس فى أمريكا وأستراليا ونيوزيلندا. عشان تنزلها من أى مكان فى العالم اتبع الخطوات التالية:

أندرويد:

الموضوع بسيط، كل اللى محتاج تسويه تفتح اللينك من جوالك وتسويلها تحميل (داونلود).

ملاحظة: اللعبة محتاجة أندرويد كيت كات ٤.٤ على الأقل. لو جوالك أقل من هالنسخة للأسف ما راح تقدر تنزلها.

آيفون:

الموضوع أصعب شوي. اذا الـ App Store عندك موب على الستور الأمريكي، الاسترالي، أو الالماني، عندك ٣ خيارات: يا انك تحوله لواحد منهم، أو تسوي حساب يديد، أو تنطر الشركة تنزل اللعبة في ستورك بشكل رسمي (سواء القطري أو غيره).  

١- افتح الـAppstore وانزل لين تحت ودوس على تاب Featured.

٢- أنزل لين آخر الصفحة وبتلاقى الـApple ID حقك. دوس عليه واختار Sign out.

٣- بعدها روح على الـSettings واختار General> Language and Region وغير المكان لأمريكا أو أستراليا.

٤- الحين روح على الـAppstore ودور على Pokemon Go وبتلاقيها عادى، لو ما لقيتها لا تشيل هم، جرب تنزل أى برنامج مجانى، ولما يطلب منك تعمل Log in اختار Create new Apple ID وسوي أكاونت جديد.

٥- امشى معاه  بكل الخطوات بس في خانة الـBilling أختار none وحط عنوان في أمريكا أو أستراليا حسب اللى أنت اخترته.

٦- عشان العنوان يكون مظبوط وينقبل ممكن تجيب عنوان أى مكان فى أمريكا، تقدر تريح راسك وتحط بيانات بيتزاهت مثلاً:

Address: 1475 Country Club Dr، Madera، CA 93638، United States

Phone:+1 559-675-1000

٧- بعد ما تخلص من التسجيل، تقدر نزل اللعبة بشكل عادي وتبدء رحلتك مع الوناسة.

شلون تلعبها؟

اللعبة تعتمد بشكل كامل على الحركة والتنقل. يعني أنسى أنك تنسدح بالمجلس وتلعبها. أول ما تفتح اللعبة بتلاقي قدامك خريطة وأنت (شخصيتك) تمشي عليها. الخريطة ماخذينها  من خرايط جوجل ومركبين عليها عالم اللعبة. عن طريق الـGPS اللعبة بـتحدد مكانك وأنت لما تمشي بـتقابل بوكيمونات فى الطريق وبـتبدء تجمعهم.

فى البداية بتلاقى حولك (حول شخصيتك) ٣ بوكيمونات تختار واحد منهم تبدأ فيهم اللعبة، الثلاث بوكيمونات مشهورين : سكويرتل، تشارمندر وبلباصور. المطلوب منك تدوس على واحد منهم عشان تبدأ رحلتك وتجمع أول بوكيمون لك.

أول ما تدوس على واحد منهم بتلاقى كاميرا جوالك اشتغلت وبتشوف البوكيمون اللي أخترته قدامك في الشاشة، وبيكون معاك كورة بوكيمون بأسفل الشاشة. هدفك الحين أني ترمي الكورة على البوكيمون عدل عشان تصيده .. طلع مهارات القنص اللي داخلك.

خدعة: لو تبي تبدء ببيكاتشو أول ما تبدأ اللعبة ويطلعلك الثلاث بوكيمونات، طنشهم وامشى، وبعد ما تبعد  ويختفون أرجع مرة ثانية لنفس المكان(محتاج تتحرك بعيد عنهم عشان الـGPS)، كرر العملية هاي أربع مرات. فى المرة الخامسة بيطلعلك معاهم بيكاتشو! أختاره وأقنصه!

شنو الـ Pokestops؟

الحين بعد ما مسكت أول بوكيمون عندك صرت مدرب بوكيمونات رسمياً (الحلم صار حقيقة)، والحين جا الوقت عشا تبدأ المغامرة الحقيقية، طول ما أنت ماشى على الخريطة بتلاقى أماكن بهالشكل:

وبتكون بالعادة معالم مشهورة مثل مسجد أو منطقة سياحية أو مبنى مشهور. هاي أسمها Pokestops. المطلوب منك أنك تروح لعندها، ولما توقف داخل النطاق حقها (قدام المبنى أو المسجد أو المعلم اللي أنت تشوفه بالصورة).بتلاقى شكلها تغير، دوس عليها وبتفتح لك المكان، حرك أصبعك على الشاشة بسرعة ولف القرص اللى قدامك (من اليمين لليسار، كأنك تلف نص ريـال) بيطلعلك أغراض items دوس عليهم عشان تاخذهم. الأشياء اللي تلاقيها بتساعدك فى اللعبة، عشان تعرف كل غرض (item) عبارة عن شنو وفايدته واستخدامه شوف القائمة اللي تحت:

Pokeballs: هاي كور البوكيمون اللى تستخدمها عشان تمسك - تقنص - فيها البوكيمونات. تأكد دايماً من عدد الكور اللي عندك، عشان في لاعبين يتوهقون ويلاقون بوكيمون نادر أو قوي وما عندهم كور عشان يصيدوهم فيها.

Eggs: البيض فايدته أنك تحطه في حضانة Incubator (بتلاقيها في الـ items دوس عليه وبتعرف شلون) وبيفقس معاك بوكيمون بعد ما تمشى عدد كيلوهات معين (أحرق دهون المجبوس). البيض في منه ثلاث أنواع منه 2 كم/ 5 كم/ 10كم، كل ما كانت المسافة أكبر، كل ما كان البوكيمون أقوى، وهني صورة توضح شنو البوكيمونات اللي ممكن تحصلها من كل نوع: