أنت بتصوم ليه؟ و بتذاكر ليه؟ و بتقرا ليه ؟ و تتشترى موبيل جديد ليه ؟ و بتصحى من نومك ليه ؟ و ليه بتجتهد فى شغلك ؟ و ليه بتعامل الناس كويس ؟ و ليه بتكتب ؟ و ليه بتنصح ؟ و ليه هتاخد الكورس دا ؟ و ليه عاوز تتعلم إنجليزى ؟
" ليه ؟ " من أكتر الأسئله الى واجب علينا نسألها لنفسنا قبل ما نعمل أى حاجه فى حياتنا لكن أغلبنا لا بيسأل نفسه و لا بيفكر " ليه ؟ " .. ممكن فى مره فكرنا لكن فى الغالب مش بنفكر " ليه ؟ ".
فى أغلب الأوقات بنعمل حاجات كتيره علشان لازم نعملها و علشان الناس بتعملها وعلشان دا البديهئ فى المجتمع بتاعنا علشان كدا بنعمل الحاجات دى و بيبقى عندنا أسباب بس أسباب ضعيفه جدا.
أى عمل بنعمله من غير ما نعرف بنعمله " ليه ؟ " يبقى بنسبه كبيره مش هنستفيد منه على المدى البعيد و على المدى القصير هنزهق منه و نبعد عنه. يعنى لو أنت مش عارف أنت بتقرا ليه و بتقرا كدا و خلاص على المدى القصير هتزهق لأنك مش عارف أنت بتعمل كدا ليه و على المدى البعيد هتحس أنك مشتت و قرأت فى أكتر من ۱۰۰ حاجه ملهمش علاقه ببعض.
لكن لو فرضنا أنك بتتعلم إنجليزى علشان تسافر بره و تتعرف على ناس أجانب يبقى ساعتها هتعرف أنك لازم تركز على المحادثه و مش هيفرق معاك قواعد اللغه و لا الكتابه و لا القراءه و هتوفر على نفسك وقت كبير جدا فى تعلم الحاجات دى، كل دا علشان عرفت أنت بتعمل كدا ليه.
فى ظل التطور الموجود فى العالم دا الأختيارات بقت كتير جدا و المصادر بقت أكتر منها لو هنمشى من غير قصد معين يبقى هنتشتت من كتر الفرص الموجوده، و الشخص الذكى هو الى يعرف يختار أيه و يضحى بأيه.
و يمكن أحسن حاجه ممكن أختم بيها الكلام هى المقوله دى:
“The essence of strategy is choosing what not to do.”
و معناها هو "إن جوهر الاستراتيجية هو اختيار ما لا تفعل."
أخيرا: علشان يبقى البوست مفيد فعلا لكل واحد قرأه، يا ريت تفكر فى حاجه أنت بتعملها و تسأل نفسك أنت بتعملها " ليه ؟ " و تشارك بيها ف كومنت :(
#خامس_يوم
#٣٠_يوم_كتابه
