أزاى تغير عاداتك للأحسن
أسامه و أحمد أتنين أصحاب شغالين فى نفس الشركه مع بعض، أسامه بيصحى كل يوم الساعه ٧ كل يوم الصبح و بيدأ يومه من بدرى يصلى و يفطر و بيلبس و بيقعد ربع ساعه قبل ما ينزل شغله كل يوم يقرا فيهم من أى كتاب بيحبه و متعود يعمل كدا بقاله سنه و بعدها بينزل شغله فى معاده الساعه ١٠.
أحمد صاحبه علطول بيصحى الساعه متأخر بعد ما بيكون سهران طول الليل بيجرى علشان يلحق يوصل شغله فى معاده علشان ميسمعش كلمتين ملهمش لازمه من مديره، بيلبس بسرعه و بيشرب كوبايه القهوه مع السجاره و هو متعصب و بيزعق لمراته علشان أتأخر، بينزل جرى و يوصل على ١٠ ونص و يسمعله كلمتين علشان أتأخر.
لو جينا نفكر أيه الفرق بين أسامه و أحمد هنلاقى الفرق فى العادات الى الأتنين بيعملوها يعنى أسامه بيصحى بدرى و بيقرا و بيوصل شغله فى معاده عكس أحمد الى بيصحى متأخر و مش بيلحق يعمل حاجه و يدوب بيوصل شغله.
الفرق بين العادات بتاعت أحمد و أسامه فرق بسيط و يمكن لو مسكنا عاده منهم هنقول أنها بسيطه و مش هتأثر على حياه الشخص بس أنت ممكن تحكم على اليوم بتاع أسامه و اليوم بتاع أحمد هيبقى عامل ازاى من مجرد السطرين الى فوق دول.
الى هيفرق حياتك عن حياه حد تانى و الى هيخلى حياتك تتغير و تمشى فى المسار الى أنت عاوزه هى عاداتك الى بتكون شخصيتك و بتعبر عنك.
علشان تقدر تعمل حاجات مفيده و تغيير فى حياتك حاجات غلط و علشان متحسش أن الموضوع فيه ضغط عليك و تيجى بعد فتره و ترجع زى ما كنت - زى ما أغلبنا بيعمل - يبقى لازم تحول الحاجه دى لعاده فى حياتك تعملها بشكل تلقائى من غير ما تفكر فيها. فى أربع حاجات هتاحتاجها علشان تعمل كدا:
المكاسب البسيطه: أبدأ بحاجه بسيطه و صغيره و بلاش تبدأ بحاجه كبيره علشان هتحس بأحباط و تعب و أنت بتغيرها أو بتضيفها لحياتك، يعنى لو هتقرا متقولش أنا هقرا كل يوم لمده ساعتين أبدأ بربع ساعه و بعدها زود علشان متزهقش.
التكرار: لازم تكرر الحاجه دى كتير جدا علشان تتحول لعاده بتعملها بشكل تلقائى، يعنى لو أنت مثلا عاوز ترسم يبقى أرسم كل يوم حتى لو فتره قليله علشان الرسم يبقى عاده بالنسبه ليك، التكرار تأثيره كبير جدا على المدى البعيد و ميه البحر بتقعد سنين كتير أوى تخبط فى الصخر بس بتكسره فى الأخر.
الأستمراريه: دايما التغيرات الصغيره مع الأستمراريه عليها بتحقق نتايج أنت مش متخيلها خالص، تخيل أنت بتقرا كل يوم ١٠ صفحات و مستصغير الموضوع دا طيب بعد سنه هتكون قرأت ٣٦٥٠ صفحه و لو فرضنا أن متوسط الكتب بيبقى ٣٠٠ صفحه يبقى أنت فى السنه دى قرأت حوالى ١٢ كتاب.
أسلوب حياه: لازم تحط فى دماغك أن الى بتعمله دا مش فتره و خلاص و لا هتعمله شويه و الموضوع يخلص، أنت لو بتاكل أكل صحى أو بتقرا أو بتذاكر فأنت بتعمل كدا علشان دا يبقى أسلوب حياتك الى هتعيش تعمله علطول.
لو جربت الموضوع دا هيحقق معاك نتايج كويسه جدا و هيخليك تعمل تغيير فى حياتك ممكن متحسش بيه علطول بس بعد فتره هتلاقى الناس بتقولك أنك أتغير فعلا و أنت هتلمس التغير دا فى حياتك كلها.
