هو ليه الحاجات الغير مفيده سهله و الحاجات المفيده صعبه ؟ يعنى ليه اللعب و الخروج و الفرجه على التلفزيون سهله و المذاكره و القراءه و التفكير حاجات صعبه ؟ ليه الأكل المضر طعمه حلو و الأكل الصحى طعمه وحش ؟ ليه العصبيه و الكلام على الناس حاجه سهله لكن التسامح مع الناس صعب و مرهق ؟ و ليه الأنتخه و قعده القهوه سهله و ممكن نقعد عليها بالساعات لكن أننا نلعب رياضه أو ننزل كورس صعب ؟
بعد شويه تفكير فى الموضوع طلعت بكذا سبب ممكن يكون من أسباب الموضوع دا:
- أول حاجه هى المتعه اللحظيه و أننا كبشر بنحب نستمتع و نتجنب الألم، الحاجات الى مش مفيده ممتعه لحظيا زى مثلا خروجه حلوه أو أكل حلوه أو فيلم أو حفله الحاجات دى كلها بتعملها و أنت مستمتع بيها على عكس ما تقرا كتاب أو تاكل أكل صحى أو تلعب رياضه الحاجات دى متعبه سواء ذهنيا أو جسديا و متعتها اللحظيه مش زى الحاجات التانيه خالص.
- تانى حاجه هى أن النجاح بيحتاج مجهود كبير علشان توصله و لازم تيجى على نفسك و تعمل حاجات كتير مفيده بشكل مستمر علشان تنجح و أحنا كبشر أصلا بنميل للكسل و الأنتخه فدايما هنتجه للحاجات السهله الى هى مش مفيده.
- تالت حاجه أن الناس عموما مش بتحب التغيير و بتحب تريح نفسها من فكره أنها تاخد قرار فبالتالى هيلجوا للحاجات السهله كبديل عن التفكير و اتخاذ قرار.
- أخر حاجه و دى خاصه بالمجتمعات الى زينا و هى فكره أن أى إنسان بيحب يبقى ضمن مجموعه أو كيان مش كائن متفرد لوحده كدا علشان يحس بالأمان، و فى مجتمع زى مجتمعنا دا الناس بتميل للحاجات الغير مفيده و بتبعد عن الحاجات المفيده و بيشدوا معاهم باقى الناس الى بتفكر تعمل حاجه مفيده أو تتغير.
طبعا فى ناس بتحب تعمل حاجات مفيده و بتستمتع بيها كمان بس الناس دى موصلتش للحاله دى علطول و تعبوا كتير على ما وصلوا لكدا.
أنا مش عاوز البوست يبقى طويل ف البوست الجى ممكن نفكر فى الطرق الى ممكن نعملها و تساعدنا نعمل الحاجات الى بنشوفها صعبه دى و فى نفس الوقت نستمتع بيها و نغير كتير من العادات الى ودتنا فى داهيه دى.
