أفهم نفسك
المقوله دى لفتت أنتباهى جامد أوى و لما ركزت فيها حسيت قد أيه هى فعلا بتعبر عن مجموعه كبيره جدا مننا و هى الناس الى نفسهم و أحاسيسهم و طباعهم بتقودهم فى حياتهم من غير ما يبقى ليهم أى تحكم أو سيطره على الحياه دى.
"Until you make the unconscious conscious, it will direct your life and you will call it fate."
يمكن أهم حاجه ممكن تعملها فى حياتك هى أنك تستكشف نفسك و تفهم ايه بيدور جواك و تفهم مشاعرك و بتحب ايه و بتكره ايه و ليه بتحب دا و بتكره دا و ايه هى هواياتك و ايه هى الحاجات الى بتخليك سعيد و حاجات تانيه كتيره أوى.
بس ليه لازم تعرف نفسك و تحاول تستكشفها ؟
- لو فهمت نفسك هتقدر تحدد الحاجات الى أنت بتحبها و الحاجات الى بتخليك مبسوط و ساعتها هتقدر تتخصص فى شغل بتحبه أو تمارس هوايه بتحبها.
- لو فهمت مشاعرك و أسبابها و الدوافع وراها هتقدر تتحكم فى فيها و تسيطر عليها بسهوله.
- مينفعش تهزم عدو أنت متعرفوش، نفس الكلام عمرك ما هتعرف تغير حاجه فيك غير لما تفهمه كويس الأول.
- هتقدر تحسن علاقاتك بالناس الى حواليك و الناس الى متعرفهاش و بنفسك.
- هتتحسن جامد فى فهم الناس الى حواليك و هتقدر تتفهمهم و تتعاطف معاهم بشكل أحسن بكتير.
بس الأهم هو أزاى تكتشف نفسك و تفهمها أكتر ؟
- أحسن طريقه لأكتشاف نفسك هى الأسئله، أسأل نفسك و دور على الإجابات جواك، أسأل نفسك أنا أمتى ببقى مبسوط ؟ أيه هو أكتر وقت ببقى مستمتع فيه ؟ أيه أكتر موقف عصبنى و ليه عصبنى ؟ أنا بحس بأيه لما بنجح فى حاجه معينه ؟ الأسئله من النوعيه دى بتحتاج تفكير و وقت علشان تطلع بإجابات عليها بس هتفهمك حاجات جواك كتير أوى عمرك ما بصيت عليها.
- جرب حاجات جديده كتير، كل ما هتجرب حاجات جديده كل ما هتحس بالحاجات الى بتشدك و الحاجات الى بتبعد عنها هتحس بالحاجات الى بتعرف تعملها و الحاجات الى بتيجى على نفسك علشان تعملها.
- أطلب المساعده من الناس القريبه منك، الناس دى هتقدر تساعدك بشكل كبير جدا فكر معاهم و شاركهم أفكارك و هتندهش أن عندهم وجهه نظر مختلفه عمرك ما فكرت فيها.
- أكتب، أشترى نوت و سجل فيها كل يوم حاجه سواء حاجه عجباك أو حاجه فرحتك أو إنجاز فى حياتك أو وجهه نظر جديده و بعد فتره هتلاقى أن كتاباتك بتعبر عنك و هتساعدك تفهم نفسك أكتر.
- أعمل أختبار شخصيه و دا ممكن يساعدك تعرف نوع شخصيتك و أبدأ أقرا عن النوع دا و هتتفاجئ أن فى حاجات كتيره فعلا فى شخصيتك - مش شرط كل حاجه تطلع صح المهم تستفيد من المعلومات دى - و دا أختبار للشخصيه للى حابب يجرب:https://goo.gl/pE4jDf
لازم كل واحد فينا يفكر و يحاول يكتشف نفسه لأن جهلنا بنفسنا هو واحد من أهم أسباب أننا تايهين و مش عارفين أحنا عاوزين أيه، أحنا بنلف فى دواير متشابهه و مكرره و مش هنعرف نخرج منها غير لو فعلا فهمنا نفسنا و عرفنا جوانا فيه أيه.
