ازاى اقولها من غير ما الشيخ يسمعنى ومن غير ما الظابط يفهمنى غلط ومن غير ما ابويا يتخض وامى تلطم؟ اقولها ازاى من غير ما ربنا يزعل منى ومن غير ما الشيطان يكسب؟
ازاى الحب موجود مع الخوف؟ وازاى الخوف موجود معاكى لو بحبك؟ انا جبان عشان انا جبان؟ ولا عشان الجبنا يقبلوني وسطهم؟
اقولها ازاى بصوت عالى؟ ويعنى ايه اقولها بصوت واطي؟ نفسى اقولها كتير من غير ما يقولولى ده كتير وانت بتجازف كتير. وخايف اقولها قليل تحسى انى بخيل.
عايز اقولها بكل اللغات. يمكن محدش حواليا يسمعنا. ويمكن يفتكرونا اجانب.
عايز اقولها بمليون طريقة غير الطريقة اللى هتحتاجنى اكون نفسى.
عايز اقولها من غير ما حد يحسسنى ان ده هيجيبنى ورا. ومن غير ما حد يحسسنى ان ده بس الطريق لادام.
عايز اطفو فى حبك مش عايز اغرق. بس اصلاً انا عالشط. مش عايز اغضب لما ترفضينى عشان هبقى بكره نفسى. ومش عايز اتبسط عشان هبقى كنت بكدب على نفسى.
عايز احبك من غير شروط. كدة كدة الشروط هما اللى هيحددوهالنا. مش هبقى انا وهما علينا.
هما ليه مخليين الموضوع صعب؟ عشان يبقى البقاء للاصلح واللى مكتوب له يحب وينجح؟ ولا عشان مش عايزين يعترفوا ان هما اللى فشلوا يتصالحوا ان الموضوع كان صعب عليهم؟ وعايزين يحسوا ان دى سنة الحياة؟
انا بفكر كتير وببص فى كل المرايات وانا عالطريق ايه اللى جاى من ورا...كله خوف ورعب وذنب سايقين عربيات قديمة وبيحاولوا يوصلولنا. كل املى ان عربيتى تبقى هى الجيل اللى هيبقي اسرع. والمراية تفضى والحاجة اللى فيها تبقى ابعد مما تبدو
انا راجل عجوز دلوقتى ودى رسالتى ليكي من المستقبل. الواد اللى قاعد ادامك في دماغه كل الحاجات دى وخايف يفتح الباب. متضيعيش وقتك معاه لحد ما يعمل هو كدة.
يا اما هيبقى اخره يبعت رسالة ليكى من المستقبل لوحده باللى كان جوة دماغه بضعف بعد فوات الاوان. المهم انه بيحبك.
اسف مضطر اخلص الرسالة دى دلوقتى عشان حاسس ان الناس بتقراها معاكى..سلام
