ايش تشتغل في حياتك قرار مصيري يسبب للكثير التوتر.

الكل متوقع منه أنه يشتغل في وظيفة عشان يستفيد ويفيد. في الغالب، أي أحد خارج هذا القالب ينظر له بنظرة دونية.

يقال أن الكل يشتغل عشان يؤمن معيشته ويعيش حياة كريمة. لكن خلف هذه الحاجة عدة دوافع:

- الخوف: الكل يخاف من حياة صعبة يستحيل فيها تأمين المسكن والمأكل والترفيه. ويربط المال كالأداة الوحيدة للوصول لهذه الأشياء. في أغلب الأحيان الناس دول ما حيكونوا مشردين أو يموتوا من يجوع لو ما أشتغلوا. أغلب الأحيان تكون المخاوف زائدة عن اللازم.

رضى الناس المهمين حولك: في هذا الحالة إنت تعمل عشان ترضي ناس حولك. سواء الوالدين أو زوج/ة أو أصدقاء. مهم جداً لك إنك تكسب محبتهم ورضاهم. ما تخالف أحد لأنك تكره "المشاكل". غالباً تخبي شخصيتك الحقيقية عن الناس اللي تحبهم وتعيش حياة مزدوجة نوعا ما.

- المكانة: إذا تغلبت على مرحلة العمل بسبب الخوف ورضى الناس، توصل لمرحلة العمل من أجل المكانة الاجتماعية،  وكسبك لاحترام المجتمع بأكمله. وأرتفاعك في المكانة الاجتماعية. وممكن يخش معاه كسب مبالغ مبالغة من المال. الغرور بالنفس هو اللي يدفع التصرفات اللي زي هذه. هذا الشخص يعمل طوال حياته وهو يحاول إثبات شيء للناس اللي شاكة في قدراته. ويعيش وهو حاس إنه لازم يثبت أنه له قيمة. والشعور أحياناً ما يروح مهما عملت من انجازات.

-اللعب: صعب جداً إنك توصل لهذه المرحلة. لمن يكون العمل مجرد وسيلة للتسلية. والنية تكون صافية من الشوائب. ولا يهمك رأي الناس فيك ولا حتى رأيك في نفسك. إنت تعمل بسبب فضول وحماس شبيه باللي عند الأطفال. همك الكبير إكتشاف العالم والاستمتاع فيه بطريقتك. ولو كنت محظوظ، أحد يمول لك هذا الفضول. ممكن تكون نادل في مطعم أو سباك ويكون عندك هذا الشعور. ماهو شيء يختصر للفنانين أو الباحثين.

في الغالب في دوافع تانية ما ذكرتها. لكن هذا هي الأشياء اللي لاحظتها في نفسي وأنا بأفكر. ليش إنت تشتغل؟