في كتير أسئلة ببالي.. احيانا الها اجوبة.. بس أغلبها تاركاني في حيرة من أمري
متل هل رح لاقي بكلة الشعر الي مرة ربطها بشعري واختفت في غياهب شعري المنكوش؟
او هل بطني رح يبطل يستعرض قدراته الصوتية لما يكون الكل ساكت بالمحاضرة :,)؟
ولكن في حاليا مجموعة من الاسئلة متعلقة بأغاني بحبها كتير
بعرف انو ممكن ما تكون مهمة.. بس الفضاوة مسيطرة عليّي!
اليكم بعض من الاسئلة الي أكلت مخي:
1- هل عاصي الحلاني لقى نصيبه بعد ما غنى "أنا يا طير ضيعني نصيبي" وبعدو حيران ازا هوي لأهله او لحبيبه؟
2- طيب.. ولما قال: "لوين تروح يا مسافر.." عرف وين مسافر؟ طيب جرب جوجل مابس؟ بلكي الي بحبو أخْوَت ومابيعرف يدل الاماكن صح!
3- لما وائل كفوري سئل "مين الي قلك مين عن حبنا غلطة" عرف مين الوغد الي قال عن حبهم غلطة؟
4- طيب وائل لما سئل المخلوقة "هالوقت كلو بهالقلب.. شو كنتي قاعدة تعملي؟" عرف شو كانت بتعمل؟ بلكي كانت بتزرع حشيش...الموضوع مش ماااشي.. لازم يفتح تحقيق!
5- ولما غنى لها: ياضلي ياروحي... ضلت ولا راحت؟ *شكلها ضلت.. ولما طردها عملت اشياء بهالقلب*
6- وائل -حبيب القلب- عمل لي ازمة بأغنية كيفيك ياوجعي.. ردت عليه ولا لأ ؟؟
*مش رح احكي عن أغنية معقول تشتي بآب* الاسئلة الي فيها بتنفع لـ من سيربح المليون! *هاد لو لقينا الاجوبة*
7- واليسا لما سألت مرايتها "قديش تغيرت" و"انا كم مرة خسرت".. المرايي جاوبت ولا انكسرت هاهاها *دمي تقيل بعرف*
8- اوكي.. خلينا نرجع لزمان شوي.. أصحاب العندليب... لقو حبيبه السواح وسلموا له عليه؟ ولا بعدو تايه في البلاد؟
9- طيب الحلو الي غنى له ناظم الغزالي "قلي ياحلو منين الله جابك" .. عرف من وين الله جابه؟ وشو البروسيس؟
10- المرحوم وديع اطربنا وقال "عالله تعود عالله"... عاد ولا بعدو داير ع حل شعره في بلاد الله؟ وهل وصله مرسال و اتطمن ع حاله و طرب الفؤاد كرماله... وسجد ع أبواب الله؟
في كتير اغاني مالهاا جوااااب!! بس هدول الي اكلو راسي حالياً!
نشكر لكم حسن القراءة.. والي عندو جواب ينوِرني..
