كنت نقرا في واحد الكتاب تاع الأمثال الجزائرية، ولقيت العْجب، وتفكرّت بلّي اللّغة الدزيرية يخصّها برك عنصر-يسمّوه في علم اللّسانيّات الاجتماعية- "بالهيبة" باش تولّي لغة رسمية، ماعدا ذلك تتوفّر فيها كامل خصائص اللّغة: (خاصيتين جابهم Hudson، هذا عالم لسانيات اجتماعية، اللّي هوما الحجم والهيبة) والهيبة هاذي عندها علاقة غير بالقوّة والإرادة السياسية وفقط. 
هام ليك الخصائص: 
.
1. الحــجم: الجحم هو عدد المصطلحات اللّي كاينين في لغة معيّنة. 
.
والدارجة، خويا،  فيها رزمة تاع مصطلحات. مرّة رحت لجدتي تغرس الورد وبدّات تسّميلي في الأنواع واحد بواحد، افتجأت.  وزيد لوكان نرجعو للشّعر الملحون تاع بكري، تلقى فيه العجب، وزيد مع شويّة جهد ويتعممو المصطلحات على كلش. 
.
2. الأدب: باش اللّهجة تولّي لغة لازم يكون عندها أدب، ولا مؤلفات. 
 الدارجة فيها الأدب، المتمثّل في الشّعر الملحون، والقصائد، ولوكان تبدا تشوف كاين بزّاف مدونين في الفايسبوك يكتبو بالدارجة، الشيء اللّي يعني أنّك تقدر تكتب قصّة بالدارجة، وتكتب المقالات وتألف حتّى الرّوايات. واش راك تقرا ذك ماشي مقال؟ 
.
3. الوضوح المشترك (Mutual intelligibility): اللّي تقولك بلّي اذا ولّات اللهجة غير مفهومة من طرف متحدثّين لنفس نوع اللّهجة ميفهموكش معناها اللّهجة تاعك مولّاتش لهجة، ياو راهي ولّات لغة. 
والدليل تلقاه عند العرب، كي نحكيو مثلًا مع المصريّين ولا الفلسطينيّين ولا الأردنيّين، ميفهمو فيها ترانغ! مرّة كنت نمشي مع وحدة فلسطينية قلتلها "ذك راني نهدر بالدارجة" قاتلي، "واش معناها "ذك"، و"راني"، و"نهدر"؟  داخت!. 
4. الهيبة (prestige): هاذي عندها علاقة بالقوّة السيّاسية والاقتصادية  تاع اللّهجة باش تخلّيها لغة. معناها مول السلطة هو اللّي يقدر يطلّع اللهجة لغة، وهاذي واش خصنا. 


 مثلًا لهجة قريش كان عندها قوّة اقتصادية وسياسية، ولّات هي لغة العرب، وعندك ثانيك فالانجليزية لهجة شرق ميدلاند East Midland، ولّات هي اللّغة الرسمية وتطورت لتصبح جل الانجليزية اللّي نعرفوها اليوم، شرق ميدلاند هاذي كانت مركز للحكم هذاك الوقت. 
لذلك، انا نشوف بلّي الدارجة مشروع خصب لبناء هويّة جزائرية تساعد الواحد باش يولّي يعبّر على نفسو أفضل، وتخلّيه يحّس بالانتماء، وتسّهلّو من التعلّم التّاعو. 
قادر تقولي العربية لغة الدّين، وكذا من هُنا من لُهَيكْ، مبصح هام الفرس مسلمين ويهدرو بلغتهم، هام الترك مسلمين يهدرو بلغتهم، وهام الألبان، والبوسنيّين، الخ.  تقدر تكون مسلم، مبصح ماشي لازم تكون تهدر العربية. 
ومن جهة أخرى، الحّق الحّق اللّغة العربية لغة رائعة، انا واحد نحّب نكتب بيها، وتعلّمت بيها، مبصح كلغة ثانية، منحسهاش لغتي الأم، على خاطر منتواصلش بيها، وتلقى بزّاف ناس غير متفوقّة فيها بزّاف، وهذا يأثر على مستواك الفكري. ومستحيل أنّك تتقن لغة  تمام الاتقان كيما واحد تربّى بيها وكانت لغته الأم، تسّما ما رانا بعربية ما رانا بدزيرية،
.
بون، بالاك التطبيق تاع هاذ الفكرة ماهوش وقتو في هاذ اليامات، مبصح يبقى مشروع يستحّق الاهتمام، وتبقى فكرة نتناقشو فيها، ولّا كيفاه؟