ازاي أخلى ابني يكرهني؟
خلينا متفقين ان الأم والأب مخلوقين بيحبو اولادهم لكن العكس غير صحيح، للأسف ممكن يوصل الابن انه يكره امه او ابوه. انا قرأت عن السؤال لكن بالعكس، ازاي أخلى ابني يكرهني؟
اولا وبدون ترتيب كسر كل الحواجز الشخصية للطفل، عدم الاعتراف ان في مساحة شحصية للطفل يمارس فيها حريته بشكل كامل. دا هيولد احساس ان الطفل مملوك وملوش لازمه. نستفيد من دا اننا نعمل مساحة آمنة للطفل يمارس فيه قراراته بحرية كاملة بدون نصائح او تدخلات من اي طرف.
ثانيا الاصرار على ان الأب والأم صح مئة بالمئة وكأنهم رسُل مُنزلة بالوحي. ودا غير صحيح والأيام والمواقف هتثبت للطفل ان دا غير صحيح عشان ببساطة كلنا بشر بنغلط لكن هل يجرؤ أب او أم انه يعتذر لطفله؟ العُرف العام بيقول ان النوع دا من الاعتذار هيكسر هيبة الأب او الأم امام الطفل ولكن العكس هو الصحيح، الاعتذار من اعلي وسائل التعبير عن التقدير والاحترام وهتخلي مكانة الأب او الأم ارقي واعلي من اي مكانة ثانيه.
ثالثا العطاء بشروط وقيود وكأن العطاء ضريبته ذل الابن، مفيش عيب إنك غير قادر العطاء ولكن يفضل عدم تحويل فرحة العطاء بكسرة نفس عدم التحكم فيه.
رابعا والأهم مصطلح "النفور من الاّباء". دراسة اتعملت على 740 بالغ من اسر منفصلة او غير منفصلة في عام 2014 , اتسالوعلي تقييم لطفولتهم وكانت النتيجة ان الطفل يطبق نقد الأب للأم او العكس عليه هو شخصيا، يعني لو الأم قالت ان الأب بخيل فالطفل بيتهم نفسه بالبخل لو قال الأب ان الأم مهملة فالطفل بيشوف ان أبوه شايفه مهمل زي أمه واكيد بيكرهه زيها، نتيجة لدا نفور وتفضيل البعد عن الأهل. نستفيد من دا اننا ننفذ خطة واحدة بردود افعال واحدة على تصرفات الطفل من تنسيق الأم والأب، ماحدش يستغل اخطاء الطرف الثاني لعدم تربية الكراهية في نفس الطفل بدون قصد.
حب الأبناء واهتمامهم لذات الأم او الأب رزق نتمنى ربنا يكرمنا بيه ولكن في أيدينا الابتعاد قدر المستطاع عن توليد أي مشاعر سلبية في نفوس أولادنا.
والله أعلم.
