امتي اتحول مجموعة الgeeks والnerds من bunch of losers اللي كان بيتقال عليهم freaks و منعزلين للشكل الcool اللي بيتضرب بيه المثل في القدوة والذكاء ولازم اي أب من شباب التمانينات وانت طالع يضرب بيهم المثل لأولاده ويبقى عايزهم يطلعوا على الشكل ده؟
الاجابة ببساطة لما بقى عندهم "ثروة" .. لما بقى الwebsite ولا الsystem ولا .. ولا .. اللي كانوا بيدفنوا نفسهم أحياء وسط سطور الكود على حبة ماكينات عشان يخترعوا او يعملوا workarounds جديدة بعيد عن تكنولوجيا عصرهم وأتحولت فجأة منتجات ال geeky skills دي ل market wants وبعدين market needs يعني المسألة دخلت فيها لعبة البيزنس بقوة
وللتقريب مثلا لو كمان ١٠-١٥ سنة بقت الناس اللي بتتخصص في رقصة "المجنونة يابا يابا ع اللمونة" لقت السوق االي يطلب راقص اللمونة ده هيبقى على سنة ٢٠٣٠ مثلا هو واللي زيه الناس الrole models اللي بِسْم الله ما شاء الله ابن طنط سوسو جارة الولية عمتي انطربرنور وبيقدم consultations في الخدمة دي بملايين .. ونلاقي اللي يتباهى بيهم برضه بعد ماكان بيتهكم عليهم
هو عالم مادي أصلا! 😌
ظهر عندنا تلات أنواع من الناس بعدها:
النوع الأول؛ هو النوع اللي بيشتغل وفاهم جداً _ماشاء الله_ لكنه مش بالضرورة يكون غني ولا حاجة وممكن تكون كل فلوسه ضايعة على إزاي يحقق الـ Bucket List بتاعته، يعني يعمل كل الحاجات اللي نفسه يعملها قبل ما يموت .. يروح الهيمالايا، ياكل محشي فوق شلالات نياجرا بقى، يعمل Skydiving من غير باراشوت وهو وحظه ...الخ .. الناس دي بتشتغل مش عشان تحط القرش على القرش يطلعوا قرشين والسحتوت ع السحتوت يطلعوا لوكشة، الناس دي بتشتغل عشان بتحب اللي بتشتغل فيه وما يهمهاش هيوصلوا لإيه من وراه.
النوع التاني؛ هو النوع اللي إمكانياته متوسطة وأحلامه متواضعة وعايز يوصل لجانب من الأمان الإقتصادي اللي يغينه عن الغير ويخليه يتجوز ويخلف ويجوز ويشوف أولاد أولاده بعد كده ومفيش مانع إنه يقعد يتنطط بين الشغلانات وبعضها أو يتعلم Skills جديدة عشان تخليه في السوق في المكان أو المكانة اللي تخلي المرتب بتاعه بيزيد بالجمع مع operators تختلف على حسب المجال والبلد من حيث الـ (+) أو (*) مقدار معين كل سنة مثلاً أو كل وظيفة جديدة ف شركة.
النوع التالت؛ هو النوع اللي عايش الوهم .. ياريت إمكانياته عالية أو متواضعة في المجال ده .. ﻷ ده عايش في جلباب أبيه Steve Jobs وعمه Bill Gates وأشباههم وفاكر إنه ف يوم هيوصل ويبقى زيهم، بتغره المظاهر وبيفتكر إن قصص النجاح دي كانت محض صدفة أو حظ أو .. أو .. ما يعرفش إن الناس دي لايمكن تكون عاشت حياة طبيعية وإن ممكن على ما يوصلوا للي هم فيه فقدوا أشخاص وأشياء ما تتقدرش بمال وماكسبوش شىء غير كام مليون ولا مليار في البنك لكنهم فضلوا حبيسي مراكزهم وعيون الناس عليهم وما بيتوقفوش عند حد للنجاح فبقى عندهم إدمان للنجاحات والمكاسب منعتهم من إنهم يعيشوا حياتهم بحق ربنا! المهم الناس الموهومين دول بيجيلهم وقت ويقعوا على جدور رقبتهم ويعرفوا إن الله حق أول ما يرشقوا في حيطة الواقع وإن مش المجال ده مع إمكانياتك دون المتواضعة دي اللي هتعمل اللي هتحلم بيه ولا حتى تخليك عايش بإكتفاء ذاتي .. لأن مع كل مرة بتكون في مكان محترم أو بيحاول يكبر هيقولك بره مش عايزين حد يعطلنا! جايز تكون الـ "بره" دي نقطة تحول في حياتهم وجايز ﻷ ..ماحدش يعرف!
فيه نوع بقى مش لازم يقع في التصنيفات دي .. هربان في النص مخفي ومش بيظهر إلا مع أول Buzz نجاح .. Buzz نتيجة لـ Innovation و Creativity عالية .. الناس دي ممكن تبقى عايشة عمرها في الظل، من الجايز يظهروا على الساحة ويرجعوا يختفوا تاني، الأكيد عند الناس دي إنهم "بشر" ماتحولوش لآلات ومكن ATM ولا إتحولوا لحبة حالمين بشوية أحلام يقظة في اليوم اللي هيبقوا فيه على Stage حاجة زي Disrupt مثلاً .. الناس دي بتعرف إمتى وإزاي ومع مين هيتنقلوا بين النوعين الأول والتاني وعمرهم ما بيرضوا يقعوا في المكان اللي بيحتوى النوع التالت ﻷنهم وببساطة مش سُذج ولا مضحوك عليهم .. دول فاهمين كويس أوي بس جايز وقتهم لسه ما جاش وجايز لما آوانهم ده ييجي يبقوا في مكان ومجال ومع ناس مختلفين تماماً عن مخططاتهم!
خلاصة الموضوع النجاح في كل مكان والفرص موجودة واللي بيفصل بينك وبين غيرك هو إستعمالك للشىء اللي محمى ف جمجمتك (العقل) مع الشىء اللي محمي ف صدرك (القلب) مع الشىء اللي محمي ف أسبابك للوصول للنجاح وهو "السعي"...
فوقوا وإوصلوا .. نفسي كل اللي أعرفهم يفهموا ويبقوا ناجحين .. وإن ما سبقتهمش ألاقيهم يفهموني عشان أقدر أبقى في مرتبتهم وأشرف نفسي قبلهم
