النص التالي باللغة العربية العامية اردنية/ فلسطينية، وهو سيكربت فيديو عن اهمية دراسة الفلسفة
ليش لازم نتفلسف؟
واحدة من اكثر الجمل شهرةً الي بنسمعها دايما لما يكون واحد منا بيحكي رأيه او فكرته عن موضوع ما، هي جملة : بلّش يتفلسف.. او سؤال: ليش بتتفلسف؟ مهو آه بدي اتفلسف، حرة انا لازم اتفلسف.. لحظة خليني اروق بدناش نبداها بطوشة.. وهسا خلونا نفهم حبه حبة.. يا ترى : ليش بنتفلسف ؟؟؟؟
مبدئياً خلونا نعرف ايش يعني فلسفة؟؟
الفلسفة هي واحدة من اهم العلوم القديمة وفي المعنى الحرفي لها هو : -حب الحكمة- وكمصطلح عام توصف الفلسفة بأنها (السعي وراء المعرفة من أجل المعرفة) وهون بيجي السؤال: طيب هل انو اي معرفة بالدنيا لازم انا أسعى لأعرف عنها؟ فعلياً الجواب هو: اه صحيح، المفروض منا نحن كبشر نبحث عن كل شيء حولنا، في الفن في العلوم في الدين في الاخلاق… والخ.. طيب ليش يا ترى؟ لانو احنا عنا عقل وهذا العقل بس عندنا نحن بنو الانسان 'مع احترامي للحيوانات كلها '.... والنباتات كمان!
ومن وجهة نظري (بشرى) أنّ الفلسفة كان لا بدّ لها من الظهور طالما احنا وجدنا في مكان غامض وبدأ جسمنا يتغير ومشاعرنا تتبدل وعم نكتب ونتعلم وعايشين بمجتمع ووين انا ومين انا .. ايش في .. افتحو الضو…
واكيد كل واحد منكم فكّر قبل هيك وسأل نفسه: ليش انا عايش؟ شو لازم اعمل؟ وليش لازم اشتغل؟ وايش هاي العواطف؟ وليش بحتاج المال؟… وكثير من الاسئلة المختلفة الي بتخطرلنا خاصة في الحمام وما بعرف ليش بالحمام؟
وهون تكمن فايدة -الفلسفة- انه لو لقينا اجوبه مارح اقول (صحيحة)؛ لانو الموضوع نسبي، ولكن رح اقول مقنعة او منطقية النا، بالتالي احنا حنكون راضيين عن الحياة الي عايشينها وبالتالي قادرين على توجيه طاقتنا نحو الوضع الي نحنا حابين نكون عليه.
الفكرة انه كثير اشخاص (بخافوا) او نحكي ما عندهم الجرأة الكافية ليخوضوا نقاشات حول مواضيع معينة بتجرييد كامل لكل شي سمعوا عنه وآمنوا فيه، او فعلياً بكون المنطق السليم الي ولدوا عليه وتعايشوا معه مقنع نوعاً ما الهم وهم سعيدين فيه على جميع الاصعدة..
لكن فعلياً العقل البشري مشوش دائماً مثلاً لما انا بحب اسمع اغنية معينة كثير، بسأل نفسي: ليش بحب اسمعها؟ او مثلاً لما اكره مكان او زمان او شخص ما، برضو بسأل نفسي طيب ليش انا بكرهه؟ فعلياً نحن نفتقر القدرة على تحديد ماهية المشكلة واغلبنا ما عندو بصيرة، ولهيك بيحكي الفيلسوف العظيم سقراط كفكرة اولية عن الفلسفة: " يجب ان تعرف نفسك! "
عدا عن انه نحن كبشر مليانين عواطف متباينة، فكثرة هذه العواطف ممكن أن ترسلنا في اتجاهات خطيرة، فالفلسفة تعلمنا كيف نفكر بعواطفنا ونفهم مشاعرنا ونحللها وكيف تؤثر علينا بشكل بديهي وغير متوقع..
وفي نقطة مهمة لا بد من ذكرها وهي انه الفلسفة علم ليس دخيل على العرب بل انه من اهم من كتب بالفلسفة هم فلاسفة عرب منهم ابن خلدون والفارابي وابن الهيثم وابن النفيس وغيرهم كثير… ومن هذا المنطلق كان عندي دائما تساؤل حول مشكلة من أهم المشاكل الي بنواجهها نحن كمجتمع عربي، وهي تدريس مادة الفلسفة !
ولما نيجي نسألهم ليش؟ بقلك بسبب تفضيل تدريس فروع العلوم الطبيعة والرياضية عن الفلسفة، وفي دول بتكون متخوفة منها لكونها تهدد الدين او العقيدة الي بتمشي عليها الدولة.. وهذا الكلام من وجهة نظري (بشرى) ممكن تكون وجهة نظرك كمان هو كلام خاطئ، وانه الفكر الفلسفي لازم نبدأ نعلمه للطفل من هو صغير، يعني بأي أسئلة بطرحها نحاول نناقشه فيها، ولازم نتعلم كيف نناقش هذه التساؤلات بطريقة تناسب تفكير ووعي الطفل!
أزمة الفلسفة من ناحية التدريس والإنتاج ما بتقتصر على الأقطار العربية إنما هي ازمة عالمية، فمن وجهة نظر المسؤولين ان علوم الفلسفة والفنون هي علوم ثانوية لا يحتاج لها الطالب، وبوجهة نظري هي قضية ملحّة يفرض وجودها عدة شروط منها: اول شي: ضرورة بناء عقول ناقدة واعية منفتحة على العالم، تحديداً في سن المراهقة، لانه بهالمرحلة تكثر الأسئلة حول الإنسان والدين والله والوجود؛ عدا عن انه الفكر الفلسفي يجعلنا نحارب التطرف والعنف الديني والأصولية والإرهاب، خاصة في البيئات الاجتماعية المتحيزة لعقائدها. كما انه الفلسفة ضرورة إنسانية .. لانك بعد دراستها رح تشعر انها تضفي معنى على حياتك، فهي تساعد في إشباع حاجاتك المعرفية حول ذاتك والعالم الجديد الي تجتاحه الثقافة الرقمية والتكنولوجية الي وللاسف تساعد في تهيمش الوجود الإنساني.
وفي نقطة مهمة لازم نعرفها انه الفلسفة كانت دائما مرادف للفكر، مثل ما بيحكي الفيلسوف الالماني هيجل:" ان الفلسفة هي تاريخ الافكار".. بالتالي عشان نعرف الفكر البشري لازم ندرس الفلسفة ومن هذا المنطلق تُسمى الفلسفة( ام العلوم) فالعلوم ما انفصلت عنها الا على فترات متباعدة.. كيف يعني.. مثلا في القرن السابع عشر انفصلت الفلسفة عن الفيزياء.. وفي القرن التاسع عشر انفصلت عن البيولوجي.. وفي القرن العشرين عن السيكولوجي… وهكذا… ولحتى ندرس اي تخصص، لازم ندرس الفلسفة قبل.. وحتى التخصصات الحديثة مثل الذكاء الاصطناعي.. لازم عشان اتعلمه ادرس المنطق.. وعشان افهم المنطق كويس لازم ادرس ارسطو كويس كمان.. وعدا عن انه كثير منا بيكونو بيتعلموا وبيفكروا بفكر فلسفي من دون ما يحسوا..إذن فجميع المناهج العلمية اليوم بحاجة ماسة إلى فرضيات فلسفية حتى تقوم، فكل علم يعتمد على جملة من المعاني الأولية الي تعد أساساً لها، زي العلوم الرياضية مثلا تعتمد على معاني الوحدة واللانهائي والنهائي وغيرها... والعلوم الطبيعية تعتمد على معاني المادة والقانون والقوة والحركة إلخ… ، والعلوم الإنسانية كمان بحاجة إلى معاني جوهر الإنسان وأصله ومصيره، وما له من حقوق وما يفرض عليه من واجبات، ودور الفلسفة يكمن في انها تكشف لهذه المعاني حقيقتها وقيمتها.
اذن فالفلسفة ضرورية في حياة الإنسان على المستوى الشخصي وعلى المستوى الاجتماعي ولو بدنا نتوسع أكثر فـ على المستوى الأممي الإنساني والفكري والعلمي والثقافي والحضاري….
وانا متأكده انه كل شخص سمعني لحد هون، اكتشف انه سبق وفكر في كل شيء قلته، وانه جواته فيلسوف... فيلسوف صغير هيك قاعد وصافن ونحن بنحاول نتناسى وجوده ونكبحه.. ليش انا متأكده من هالكلام؟ لانه الفلسفة ظاهرة فطرية طبيعية في الإنسان..فهي مش شيء دخيل على الإنسان، ولأن حياتنا عبارة عن حلقات متصلة من الفكر والتأمل.. وما رح نقدر ـ حتى لو أردنا ـ أن نجعل عقولنا تكف عن التفلسف ، لأننا لو عملنا هيك رح نكون متل الي يقود الأشياء ضد طبيعتها، أو يحاول منع الحياة من الحركة والنشاط .
وعشان هيك… اتفلسفوا.. لانه لازم تفلسف…
سلام..
