"ليلة كان البدر بازغًا ورائعا كعروس شرقية ليلة زفافها ، نسيم في غاية الرقة محمّلا بالحب يمر علي وجنتيك لتغمض عينيك وتسبح في عالمك الخاص، كان الكون مهيئا لجلسة عامرة بالحب تتخللها مقطوعات للست أم كلثوم مع قدح من القهوة ويدك تلتحف عزيزها الخاص "

_ده شكله هيكون يوم هايل النهاردة، الله

_يا ندى يا حبيبتي ادخلي هيجيلك برد

_ياا ماما الجو جميل اوي النهارده، انا متفاءلة هيبقا يوم جميل اوي النهاردة..

" كانت تظن الصغيرة أن الطقس يبعث لها نبضات تؤكد لها إن كان اليوم سيئا أم مميزا، ولكن خانتها تلك المرة"..

على الناحية الأخري :

"في إحدى المقاهي التي يرتادها الكثير، يدور الحديث الآتي ويبدو أن الأمر في غاية الأهمية"

_ أنا حاسس اني بظلمها معايا، هي بتعرف تديني كل حاجه ، لاقيت معاها كل الحب ، وده مخوفني وخانقني أنا مش عارف أبادلها الحب،انا محدش اتعلق بيا وحبني زيها، بس انا مش قادر انسى" مها" مش قادر..

" يضع رأسه بين يديه، تلك الحركة السخيفة التي كنا نفعلها حينما كنا صغارا لعلنا نختفي، والآن نفعلها لنواري الحزن، نواري تلك الكسرة، نواري الألم "

_ اهدا بس كده وصلي عالنبي كله هيبقا بخير، انا شايف انك تسيبها، انت كده كده مش مرتاح ومش عارف تعيش، ولو فضلت معاها هتظلمها بالحب اللي مش موجود اساسا من ناحيتك ، انت غلطت يا صاحبي أما اخترت تبدأ علاقة ولسه جواك علاقة تانية مماتتش ، متفضلش عالغلط كتير.. سيبها يا صاحبي

“نظر إليه، لطالما كان يعلم أنه صديقه الوحيد، أنه الوحيد الذي سيتفهم كل ألمه بنظرة منه"

_هكسرها!

-احسن ما تعيش تخدعها، هيجي يوم وتكتشف كل ده،ساعتها مش هتقدر تسامحك ،واجهها الوجع دلوقت أهون

نظر إلى صديقه لعدة دقائق ثم تنهد بحزن وقال:

-هشوف كده ربنا ييسر اللي فيه الخير ، أنا همشي بقا، ابقا اشوفك بعدين

-لا خليك هنا شويه لسه بدري 

 _لا انا لازم امشي هكلمك بعدين

" بدأ يجمع ممتلكاته في فوضى لم يعهدها من قبل، لطالما كان منظما يفعل كل شئ بحساب بالغ"

" بدأ القلق يسري على ملامح صديقه"

_تحب أوصلك؟ تعال نتمشى سوا يلا

_لا خليك عاوز ابقا لوحدي، سلام

"لم ينتظر ردا واحدا منه،كان يهرب منه كما حاول الهروب كثيرا من الألم الذي يقطن يسار صدره ، تركه وسار وحيدا كعادته، لطالما كان كذلك ويبدو أنه لا نجاة من الوحدة، كان يستمع لبعض الأغاني ويحادث نفسه"

_ عاجبك كده؟ مرتاحه في البعد؟ انا مش عارف اعيش عملتي فيا ايه؟بقيت شبه الجثة، روحي ماتت، ليه عملتي فيا كده ليه؟

يووه انا هكلم نفسي..

......

أمسك هاتفه ليحادث " ندى"..

_آلو

_ايوه يا بيه دي مواعيد دي سايبني طول اليوم كده لوحدي؟ والله عال، بس تعرف؟ وحشتني اوي علي فكره

_ندي انا عاوز اشوفك دلوقت

"قطبت حاجبيها في قلق بالغ"

_فيه ايه مالك؟ فيه حاجه حصلت؟انت كويس؟

_انزليلي بس تحت العماره كمان ربع ساعه انا مستنيكي

_حاضر

_سلام

_سلام

.........

"ارتدت حجابها، وعقلها يدور من كثرة التفكير، تُرى ماذا حدث له؟، وعند دنو الوقت الموعود كانت تنتظره أسفل عمارتها"

ما أن رأت طيفه حتى تقدمت نحوه لتصل إلى منتصف الطريق والبدر يعلو كلاهما، يبدو ولأول وهلة مشهد في غاية الرومانسية، ولكن القدر له رأي آخر...

_ مالك فيه ايه؟طمني

_ انا كويس، انا كنت عاوز اقولك بس..

_تقولي ايه؟ احكي انا سامعاك طمني،  فيك ايه..

_انا مش قادر مش قاد.. مش قادر اكمل في العلاقه دي يا ندي، مش عارف، حاولت ومقدرتش، انا مش عارف الاقي راحتي هنا،حاولت كتير 

"نظرت له بصدمة بالغة لتبتعد عنه قليلا لتتدارك الموقف كما لو كانت تبني جدارا بينهما بعدما قال ما تفوه به ، كانت تحاول جاهدة ألا تهبط أحد أدمعها حتى لا ينكسر كبرياءها أمامه كما تهشم قلبها، واستجمعت قواها"

_يعني ايه كلامك ده

_انا حاولت كتير، بقالي كتير، كتير اوي وفشلت..

_اومال انت فضلت كل ده ليه؟جيت ليه من الأول وقسمت كل حاجه فيا على مقاسك ليه؟ عشان تقولي في الاخر مش عارف ومش قادر؟ قول كلام غير ده قول انك مش عارف تنساها ولا عارف تشوف ست غيرها، مش عارف تنسى حبك ليها مع انها سابتك، سابتك في نص الطريق وانا، انا اللي حبيتك واديتك عمري كله، في الاخر بتقولي مش قادر ومش عارف، طيب ما اناا سالتك كتير في الاول وقعدت تقولي لا انا نسيتها لا انا بحبك انتي راح فين كل ده؟

"نظر إليها والحزن داخل قلبه يبلغ عنان السماء"

_انا، انا مش عار.. مش عارف يا ندى كنت فاكر كده مش عارف ايه اللي حصل مكنتش اعرف اني هبطل احبك

_تبطل؟ انت محبتنيش اصلا انت خدعتني وخدعت نفسك، ظلمتني، ظلمت الانسانه الوحيدة اللي حبتك من كل قلبها، انا مش عاوزه اعرفك تاني..

" تركته وما عادت تحتمل أكثر من ذلك ، حتي تخطت عتبة بيتها ودخلت غرفتها وأخذت في البكاء، البكاء علي قلبها وحبها وكل شئ، كانت تنعي كل شئ، كانت تترنح بين ذكرياتهما سويا تذكرت كل شئ كل شئ حدث بينهما، كانت تئن كروح على وشك الرحيل، كان الألم قد بلغ ما بلغه حتى كاد أن يفتك بها"

أمسكت ورقة لتكتب..

"زرعت الحب ولم أحصد سوى وخز في يسار صدري كلما حضر طيفك أمام قلبي"

........

ويبقى السؤال الأبدي:

" ليه الحب مش بيدوم، ليه فيه طرف بيتخلى عن التاني؟

وليه الشغف بيموت ليه؟ "