المواجهة بالوعي
المرض اللي بينتشر في دوله او مكان معين و بيكون سريع الانتشار بيتقال عليه وباء زي اول ما ظهر فيروس كورونا في الصين كان وباء في الصين و لما ظهر في إيران كان وباء في إيران و هكذا
لكن
ال pandemic او الجائحه وضع مختلف .....
الجائحه هي انتشار المرض في نطاق جغرافي أوسع بكتير من الوباء و المصطلح ده بيستخدم لوصف اي مشكلة خرجت عن نطاق السيطرة .
المرض بينتشر في منطقة جغرافية واسعة جداً و بيأثر علي نسبة عالية من السكان بشكل استثنائي.
و طبعا بيصيب عدد كبير جدا من الناس و في الغالب بيكون الفيروس ده جديد و طبعا بيكون الحصانه عند الإنسان ضعيفة جدا او معدومة و ده اللي احنا بنقابلة دلوقتي مع فيروس كورونا او
sars_cov 2
covid_19
احنا فعلا في أزمة عالمية .
و كل المطلوب من الناس تحمل المسؤلية .
لازم ناخد بالنا كويس جدا من الإجراءات الوقائية المطلوبة مننا .
و اهم حاجتين هما غسيل الايدين و عدم الاختلاط .
انا بس عاوز اتكلم علي كذا حاجه .
اولاً
الوضع مرعب ؟؟
ايوة فعلا الوضع مرعب و ان شاء الله الفترة دي هتعدي زي ما قابلنا أمراض قبل كده و كانت مرعبه في الفترة اللي ظهرت فيها زي الطاعون و الملاريا و الكوليرا و السارس.
المسألة مسألت وقت و ان شاء الله العلاج هيكون موجود و الفترة دي هتعدي .
بس مش معني كده اننا نستسلم ... احنا فعلا في حالة حرب .
الفيروس ده عامل بالظبط زي الحيوان المفترس اللي بيتربص لينا و بيحاول يفاجئنا بهجومه علينا عشان يقضي علينا .
بس حتي مع الحيوانات المفترسة في نسبة للنجاة .
يعني الأسد اشرس صياد موجود في البريه بيفشل في ٧٥% من محاولات الافتراس بتاعته .
يعني في نسبة ٧٥% للنجاة من افتراس الأسد
ملك الغابة .
و طبعا مع الاختلاف في الوضع بس عاوز افهمكوا ان بعض الأفعال اللي بتعملها الفريسه زي الرفص و الهرب و الخوف اللي بتكون حرفياً مثيرة للشفقة بتكون هي دي سبب في نجاتها من الافتراس و الموت .
و زي ما بيقولوا موقف الافتراس بالنسبة للحيوان المفترس مجرد وجبة أخري لكن الفريسة الموقف بالنسبالها بيكون حياة او موت مش مجرد وجبة
و غريزة البقاء أقوي من غريزة الجوع .
يعني رغم الموقف المرعب اللي العالم كله فيه ده احنا لازم يكون عندنا ايمان بالله و امل عشان نعرف نعدي الفترة دي .
تاني حاجه .
إن طريقة انتشار الفيروس ده احنا درسناها في الرياضة و هي النمو الاسي و فعلا الأمراض المعدية في اولها انتشارها بيكون اسي .
اي حاجه بتتضاعف بعد مرور نفس المده من الزمن هي حاجه بتنمو بشكل اسي .
يعني مثلا لو المرض ده بيتضاعف كل ٣ أيام و ده اللي حاصل في بعض الدول حاليا زي ايطاليا مثلا .
تخيل عدد المصابين بيتضاعف كل ٣ ايام يعني في خلال شهر هتضاعف ١٠ مرات
مش هيزيد عشر اضعاف
لا
هيتضرب في ٢ عشر مرات
يعني لو في بداية شهر كان في حالة واحدة بس في مكان بعد شهر هتبقي ١٠٢٤ حالة و بعد شهر كمان هتبقي ١،٠٤٨،٥٧٦ حالة متخيلين الموضوع .
المرعب بقي ان قبل الشهر التاني ما يخلص و يوصل الرقم ده ب ٣ أيام بس يغني اخر تضاعف حصل كان الرقم وقتها ٥٢٤٢٨٨
متخيلين يا جماعة يعني الرقم كان نص مليون و في ٣ أيام اصبح مليون .
تزايد بشكل مرعب .
و ده السبب الحقيقي اللي مخلينا بنقول بلاش اختلاط خالص عشان نقدر نسيطر علي سرعة الانتشار الرهيبة دي .
يعني عدم الاختلاط هيفرق معانا جامد جدا و هيخلينا نساعد بشكل كبير اوي علي تقليل سرعة الانتشار للفيروس ده.
و ده طبعا غير الخطط الموضوعة من منظمة الصحة العالمية لمنع الانتشار و حصر الاعداد المصابة
عن طريق التقسيم
A . B . C . D
و دي تالت حاجه عاوز اتكلم عليها
في كتير مش فاهمين الموضوع ده و اد ايه هو مفيد لينا كلنا في الوضع ده .
رمز A هو الشخص حامل العدوي
رمز B دي الأشخاص اللي اختلطت مع حامل العدوي بدون اي معرفه بينهم يعني اتقابل مثلا مع حامل العدوي في مواصلة او مول او نادي و مفيش اي معرفه بينهم و عشان كده الفئة دي مجهولة تماماً
رمز C الأشخاص المخالطين لحامل العدوي بطريقة مباشرة و دول الحمد لله معروفين زي القرايب و الاصحاب و الجيران و عن كريق التتبع بيوصلوا ليهم بسهولة لان المريض بيكون عارفهم و بيدل الدولة عليهم بسهولة
رمز D الأشخاص العادية جداً اللي مفيش عليهم اعراض و المفروض انهم اصحاء ان شاء الله
التقسيم ده بيساعد الدولة علي حصر الاعداد الصحيحة الموجودة في البلد و عن طريقة نقدر نسيطر و نقلل انتشار الفيروس
ازاي ده بقي
الحظر و الالتزام بالتواجد في البيت و عدم الاختلاط هيخلي الأشخاص المجهولة (B) هتظهر عليها الأعراض و هنقدر نوصلها و في الوضع ده مابقاش مجهول و اتحول من الرمز (B) الي شخص معلوم حامل العدوي و كده بقي رمز (A)
و طبعا مع الالتزام بالحظر بشكل صح هيبقي الدورة الجديدة بتاعت الشخص اللي لسه مكتشفينه ده مفيش فيها حد مجهول (B) و ده ببساطه لانه التزم و قعد في البيت و متعاملش مع اي حد غريب عنه و كده حتي لو هو نقل العدوي لحد هيكون من المخالطين ليه بطريقه مباشرة (C) و دول سهل جدا الوصول ليهم و بكده نبقي قدرنا نوصل للاعداد الصحيحة و نقلل انتشار الفيروس بينا
مهم جدا فعلا يا جماعة اننا نفهم الموضوع ده كويس
لان اكيد كلنا سمعنا عن المريضه ٣١ في كوريا الجنوبية اللي اتسببت في نقل الفيروس ل ١٢٠٠ شخص من اصل ٩٠٠٠ شخص اتعاملوا معاها في أيام قليلة جدا بسبب انها ما التزمتش بعدم الاختلاط
تخيلوا بقي واحدة اتسببت في مرض ١٢٠٠ واحد ارقام فعلا مرعبة بسبب عدم الوعي و اللامبالاه و عدم تحمل المسؤلية و عشان كده انا يأكد ان كل واحد فينا عليه مسؤلية كبيرة جدا كمان و أظن الكلام ده باين و واضح من الأرقام دي .
رابع حاجه و اخر حاجه
اوعي تستهون بغسيل الايد بالميه و الصابون
لأنه حرفيا بيحميك من فيروسات و بكتيريا كتير جدا
و ده مش كلامي
ال CDC
مركز التحكم في الأمراض و الوقاية منها
واحد من أكبر هيئات الصحة العامة في العالم
بيعتبر نضافة الايد واحدة من أهم أسس الصحة العامة .
و كمان بيقتل فيروس كورونا
اه بيقتل الفيروس
احنا قدرنا نوصل لشكل الفيروس و مكوناته
و عارفين انه بيكون حوالية طبقة دهنية
الصابون قادر انه يفتت الطبقة الدهنية دي و يقضي علي الفيروس تماما بس لازم الغسيل بالمية و الصابون يستمر لمده ٢٠ ثانية علي الاقل و ده عشان عملية التفتيت تتم صح و تقدر تقضي علي الفيروس الموجود علي ايدك و تحمي نفسك من العدوي بالفيروس ده .
في الآخر بوجه كل الشكر للجيش الأبيض
اللي بيواجه بكل قوة و شجاعة
الدكاترة و التمريض و الفنيين و كل العاملين في هذا المجال .
الأبطال اللي بيحاربوا بكل قوة عدو غامض غير مرئي
بيحاربوا شبح
بيحاربوا و مفيش معاهم أسلحة
بيعرضوا حياتهم و حياة اقرب الناس ليهم للخطر عشان خاطر ينقذونا احنا و يحافظوا علي سلامتنا
كل الاحترام و التقدير و العرفان بالجميل للجيش الطبي الشجاع .
و ياريت احنا كمان نفهم اننا جزء من الحرب دي
و مسؤليتنا اننا نقدر حجم الخطر و ناخد كل إجراءات الوقاية بمحمل الجد .
ربنا يسترها علينا و ان شاء الله هنعدي المحنة زي كل مرة اذكي و أقوي من الاول .
Rami karram
