رقية وطن
أرقيكى برب الكون
وبآية كتاب مكنون
من عين بانت
على عيبها
وعين حالفة
لتخربها
وعين جاية
تقلبها
وتقلبها
فارغة
بلا مضمون
وعين باتت
شياطينها
تكيد ليكى
تخليكى
يفيض بيكى
تبكيكى
وأبكيكى
ألف الكون
كما المجنون
على رقية بتشفيكى
وفجأة لقيتنى برقيكى
بشربة ميه من نيلك
بقرآنك وانجيلك
لقيت إيدى على راسك
ودمعه نازلة من عينك
تلات ألوان
أحمر بلون دمك
بلون همك بلون الغم
غرقانة وسط اليم
أبيض بلون قلبك
أسمر بلون ليلك
أشباح على خيلك
بيردموا ف نيلك
بيطفوا قنديلك
وجاى شيطان يواسيكى
يناديكى
يقوم ليكى
ويسقيكى شراب السم
وانا بشرب كاسات الهم
وأبكيكى.
أقوم وأتوضا من تانى
وكل دموعى غلبانى
وأرقيكى
اللى عليكى زهق
بكلمة واحدة نطق
أناغصب عنى ف نفق
معرفشى رايح فين
قالولى خود قرشين
والبس بلون الطين
قناع وليك وشين
وش جميل مصرى
داريته من بدرى
ووش مش وشى
معرفش جالى منين
مهمة كات سهله
حالا مفيش مهله
أروح على الميدان
و ف وسط لمة كتير
أضرب وف المليان
هيقولوا طرف تالت
أويمكن عيار فالت
أو حتى مندسين
يامين يطلعنى
بره جسد آمن
ومين هيرحمنى
ومين بقى الضامن
كات
طوبه معطوبه
نفسى بقى ف توبه
وكفاية دى النوبه
حرمت أخد قرشين
*******
