قبل سنه وخمس شهور شوفت الصورة دي وبكيت بكيت جداً ..بكيت عشان تهيألي ان كان ممكن اكون انا اللي بقرأها في المسجد وان اه الصورة معاها حق انا فعلاً مكنتش قريبة من ربنا او انا فعلاً عاصيه عشان كده ربنا مخلنيش اتقبل هناك 😅
انهاردة انا ببكي لسبب تاني بس مش حزينه او منكرة الوضع زي ساعت ما قريتها ، جه فبالي بدون ترتيب ان انا في مكان باخد فيه علم بردوا ،باخدوا بطريقه مناسبة ومن اشخاص عظيمين مغمورين يمكن مش ليهم نفس بريق علماء الفيزيا اللي شعرهم منكوش وعنيهم حادة وكلامهم واضح عاقل منطقي صعب يتحفظ لكنه كلنا قادرين نفهمه..
بس انا لما بشوفهم بحس بلمعان عيني انا وذهول اذني لِما تسمع ولِما تدرك ، عقلي غير مستوعب صغر حجم مكانته وسط الكون وغير مدرك البشر اللي بيفنوا عمرهم في جملة واحدة، جملة انت بتسمعها وتحسها بدييهيه. عالم أظن اني على حسب الخطة اللي كنت رسماها لحياتي كان ممكن افوته و اسقطة تماماً وانا مدركة اني اخذت منها الأهم والأرقى والأغنى معرفة، وكان يفوتني كل الجمال ده،جمال الإدراك وآلمه،جمال قصص التاريخ وحمق وذكاء البشر، جمال فالعلم وجمال مَن يعطوا العلم وهم محبين له ، مبسطين له ، غير مبالين بشيء غير انك تشوفوا نفس ما هما شايفين وتدرك دورك وتسعى فيه ومتستناش النتيجه بعدها ..
الحمدلله .. الحمدلله على كل نعمه اللي انا عاجزه اني احصيها وانا بشكره .. اغفرلي يارب كل سخطي وقصر نظري لنعمك.
١١/٢/٢٠٢٠
