الكويت مساحتها 17،818 كم2 , ومساحة أسكندرية 2,679 كم2

الكويت مرت بيومين أمطار رعدية , وهي بلد صحراوية ,يعني درجة الحرارة فيها بتكون أعلى من أسكندرية مرتين ,فتخيل كمية الميه الي كانت متخزنة في غيوم سماها , تخيل بقى أن حصل فيها نفس الي حصل في أسكندرية , ومستوى الميه بقى أعلى من نص دور أرضي , بس محدش مات , والدنيا مشيت , ومحدش اتشال من شغله ولا حاجة , ده حضرتك يرجع لأيه :

 في حاجة أسمها سبحان الله لجنة ارصاد جوية , دي فيها ناس أستغفر الله العظيم بتتدرس الجو , عالم كافرة مالناس دعوة بيهم , المهم أنها مطرت يوم الأربعاء أمبارح الفجر , امطار رعدية من النوع الي بيحصل معاه مشاكل , فتجنبا للمشاكل وكحل سريع مايوقفش البلد , ولكن يخف الضغط عليها بحيث الجهات المختصة الي هي شرطة ومطافي وكل جهة مخصصة للتعامل مع الوضع(مش الجيش ) تقدر تشتغل بشكل كامل , الوزارة أصدرت قرار الساعة 8:30 أجازة للمدارس والجامعات , وبكده أنت خفت نسبة زحمة أكبر من 50% , وفي نفس الوقت ماوقفتش البلد , واليومين الي خليتهم أجازة للمدارس والجامعات (عشان عطيت الخميس أجازة كمان , عشان لجنة الأرصاد الجوية الكافرة توقعت نفس الطقس وهو ماحدث ) اليومين دول بالتنسيق مع وزارة التعليم الي سبحان الله شغالة برضوا وماقلتش لأ هتعطلوا المنهج والنظام والخطة الموضوعة و,,,,,الخ , هتعوضعهم عادي جدا المهم أولا سلامة المواطن

انا مش بحب أقارن بين مصر والكويت , لأن ماينفعش أساسا تقارن أسكندرية نفسها بالكويت , لأن مساحة ال2,679 كم2 دول عايش فيهم فوق الاربعة مليون شخص , بينما ال17,818 كم2 مساحة الكويت عايش فيهم مايقارب الأربعة مليون , فأنت تخيل مقدرة دولة كاملة تقدر تتعامل مع وضع مناخي صعب , وتخيل مقدرة محافظة على التعامل مع الوضع

أنا أن قارنت هنا هقارن نظام عرف يتعامل مع الوضع , ونظام فشل تماما في التعامل مع الوضع , وأستعان بجهة من المفترض أن وظيفتها الوحيدة الحماية الخارجية ونزولها البلد بيبقى للأحداث الطارئة جدا , مش عشان الدنيا مطرت

فكرة المقارنة بين مصر وأي بلد تانية , هي فكرة متخلفة جدا , لأ ماينفعش تقارن بين فيلتك الي على البحر , وبين بيتك الي في المدينة , وبالمناسبة مصر هي البيت الي على البحر , بس بدال أنت مش هتعرف تحافظ على بيتك من الأمواج الي هتجيلك , وبتسيب الأمواج تنحت فيه واحدة واحدة , بتتنيل على عينك ليه وبتبني بيت على البحر

نظام الحكم نفسه في مصر منيل الدنيا , انت عندك 27 محافظة , يعني 27 محافظ , وفي محافظات في أحياء وليها رؤساء ,مالنش دعوة بيهم دلوقتي دول نايمين , وعندك33 وزارة , يعني 33 وزير , ورئيس وزراء , وعندك حوالي مايقارب ال600 مقعد ,مجلس النواب الي هو البرمان , الي 2% قصدي 26% بينتخبوه , أو مشاركين فيه في الجوالة الأولى , وعندك طبعا كبير الليلة دي كلها رئيس الجمهورية , لك أن تتخيل بقى أن مساحة ال27 محافظة الي مايقارب 1,002,450 كم2 الي عايش فيها حوالي  85,782,965 كم2 , بيمشي أمورها بدون حساب رؤساء الأحياء , والفرعيات الأخرى , حوالي 660 شخص , زاد رئيس الجمهورية ورئيس الوزراء (الي هما السلطة التفيذية على فكرة -معلمين البلد الكبار اوووي )يبقى المجموع 662 بني أدم لا حول لهم ولا قوة , بس حاليا هيبقى 660 واحد بس لا حول ولا قوة , لأن مرتضى وأبنه هيبقوا في البرلمان والبلد هتتعدل بأذن الله 

معلومة على الماشي : امريكا حوالي 48 ولاية , مساحتها حوالي 9.83 مليون كم2 , وشغالة رغم مشاكلها الداخلية وسياستها الخارجية متظبطة , وحاكمها واحد برضوا , ورغم ان الحاكم الحالي لمصر ساهم وبشكل كبير في تعديل الصورة الخارجية لمصر , بس ام أبراهيم , الي بتسيب ابراهيم يروح للمدرسة الصبح في المطر و مش مهتمة خالص ان يكون عندنا دبابات بتطير , هي عايزة ابراهيم يرجع البيت بس 

ونرجع للمشكلة الي بدأنا بيها الي هي المطر , وزي ماطرحنا الموضوع في بلد عربية شقيقة الي هي الكويت , وانا الصراحة أشيد بالجهات المختصة بتاعتهم والنظام المتبع , نرجع للعجز الواضح في النظام بتاعنا لوطنا العظيم مصر بدون تريقة 

زمان كانت كوميديا سودة بتضحك وتزعل , دلوقتي الي قاعد يضحك ده يبقى غبي , البلد دي بقت بتبكي , او بتوصل لمرحلة الاشعور الاأهتمام , الي يحصل يحصل أنا عايز أمشي بالنسبة لكثير من الشباب , وانا كشاب أبقى ماعنديش دم لو نصحت واحد وقولتله كلمه بلدك في منولوج الي المفروض انصحه في مايسفرش , ولا انزل أنتخب واتعب نفسك , عشان واحد هيمسك المايك يقول كلميتين غلابة ومصر , ويقعد على كرسي مالهوش حول ولا قوة , بس أكيد مش هينسى الي وقفوا جنبه وجبوله الناس بالفلوس زي الخرفان , علم علم أختار أختار , أقبض مع السلامة , ومستقبلا في مشكلة , لا حياة لمن تنادي 

بالمناسبة أنا من مواليد دولة الكويت بس عمري ماحبتها ,لأنها ببساطة مش بلدي , بس مؤخرا لما رجعت ليها زيارة وراجع مصر , أحترمتها لأن بعدت عنها حوالي سنتين رجعت لقتها في تطور وتحديث , بينما بلدي الي انا فيها بقالي فوق ال3 سنين في أسكندرية و نفس مشكلة المطر كل سنة , ونفس الكوميديا السودة الي أصبحت تقفل الواحد 

مصر بلد حضارة ال7000 سنة , بلد الصوت ب50 جنيه

مصر الشعب أبو دم خفيف , بقى بيبكي , الي بيضحك حكامه ونظامه 

مصر زي مابقول دايما , مالهاش حاكم , حكمها الوحيد ربنا , لأن لو شقة ولعت في شارع ضيق و عربية المطافي مش هتعرف تدخل الشارع , فربنا يستر

وللأسف الشديد كاتب هذا المقال عن بلده مصر ,غير راضي عن حالها , مصري الجنسية : محمد حميدو حمدان