ناس كتير بدأت تحذر بشدة من شراء أي عقارات تحت الانشاء خاصة مع انتشار مشاكل كتيرة متعلقة بالتزام الشركات العقارية سواء بمواعيد التسليم او المواصفات المتفق عليها في الوحدات او الاتفاقات المالية!

الحقيقة ان الكلام دا مظبوط تماما وصح ١٠٠٪؜ لأننا حرفيا زي ما ذكرت في موضوع "تقييم العقار" احنا بنشتري سمك في مايه ولو مش معاك صياد فاهم وأمين عُمر ما السمك ما هيطلع لوحده!! 

طب طالما الموضوع قلق بالشكل دا ليه أغلب الناس بيضطر انه يشتري عقارات تحت الإنشاء وليه بيدخل في مخاطرة بالشكل دا؟! ببساطة لان سعر العقار بيكون أقل والتسهيلات الموجودة بتكون أكبر وبالتالي في ظل الاسعار المرتفعة وصعوبة توفر كامل تمن الوحدة العقارية عند نسبة كبيرة من الراغبين في شراء العقارات سواء كانت للسكن او الاستثمار بيفضل خيار شراء العقارات تحت الانشاء مطروح بقوة. 

السؤال هل مفيش حل لمشكلة المخاطر العالية من شرا عقارات تحت الانشاء؟ الحقيقة هو مفيش حل سحري يخليك تشتري عقارات موجودة "على الورق" وانت مطمن وضامن ان الدنيا هتكون وردي وهتمشي زي الفل، لكن في خطوات ممكن تعملها تقلل من المخاطر دي نسبيا، أهم الخطوات دي: 

- اسمع الأول من الشركة المنفذة والمطورة للمشروع اللي هتشتري فيه عقارك - لما تسأل متسألش بس عن المشروع اللي عاوز تشتري فيه لكن اسال الشركة المالكة او المطورة والمنفذة للمشروع او للعقار عن المشاريع السابقة اللي نفذوها وسابقة وحجم الاعمال "المنفذة" وجودة اعمالهم ومدى التزامهم في مواعيد تسليماتهم 

- اسأل اصحاب التجربة والخبرة اللي تعاملوا مع الشركة خاصة الناس اللي "اشترت" و "سكنت" واعرف مدى مصداقية المعلومات اللي خدتها من الشركة "في النقطة الأولى” من خلال اصحاب التجارب الواقعية وحاول تتأكد ان الناس اللي بتسألهم "سكان" فعلا و"اشتروا" فعلا 

- أنزل بنفسك - النقطة دي مهمة جدا لازم تتعب شوية وتشوف الواقع في المشاريع اللي الشركة نفذتها والمشروع اللي انت هتشتري فيه وشوف جودة الخدمات والبنية التحتية - مينفعش تعتمد على مجرد السمع والكلام المكتوب وان كان طبعا بيكون مؤشر لكن مينفعش يكون أساس تاخد منه معلوماتك وتبني عليه قراراتك

- اعرف سلوك الشركة "بعد البيع" - في أغلب الاحوال جودة سلوكيات الشركة اتجاه المشتريين "بعد البيع" واهتمامهم بعملائها واستمرار الاهتمام دا بيكون مؤشر جيد جدا على قوة الشركة وجديتها. 
 
- اسال عن اصحاب الشركة نفسهم! للاسف في "بعض" الافراد اللي بيدخلوا في مجال التطوير العقاري او التنفيذ ونتيجة قلة الخبرة او نقص المعلومات عندهم "بافتراض حُسن النية" بيفضلوا يجربوا فالناس باسماء شركات مختلفة وبشكل عشوائي وبالتالي ممكن اسم الشركة ميكونش معروف لكن صاحب الشركة يكون اسمه مسمّع! والعكس صحيح طبعا 
 
- يُفضل تتعامل مع الشركات اللي ليها تاريخ وسابقة اعمال قوية في جزئية العقارات اللي تحت الانشاء عشان هيكون خايف على سمعته وهتكون خبرته اكبر لكن دا مش معناه ان الشركات الجديدة او الصغيرة عندهم مشاكل لكن معامل المخاطرة بيزيد شوية 
 
- اتاكد من الارض اللي عليها المشروع او العقار وضعها سليم قانونيا من الجهات المختصة "الجهاز او الحي" ووضع الشركة المطورة او المالكة مظبوط وواضح قانونيا 
 
- حاول تأمن موقفك في العقود والاتفاقيات ويكون في وضوح في بنود العقد واطراف العقد مذكورين بشكل واضح وابعد تماما عن اي كلمات مطاطية في العقود خاصة بمواعيد التسليم والدفعات النقدية ومواصفات الوحدة واعتقد ان وجود محامي يساعدك في النقطة دي واللي فاتت حتى لو صرفت عليه شوية هيكون اوفر كتير من الدخول في مخاطرات بملايين في مشاكل في اغلب الظروف بيكون المشتري هو الخاسر الاكبر. 
 
أخيرا فكرة انك تستنى لحد ما يكون معاك فلوس الوحدة كاش هي الفكرة المثالية لكن تطبيقها صعب في وسط الاسعار الجنونية للعقارات دلوقتي وقد تكون مقبولة نسبيا لو انت بتشتري عشان تسكن لكن لو هتشتري كاستثمار فالاستثمار بيعتمد عالفرص والفرص مبتستنتاش حد لكن المطلوب انك تكون حذر وتتعامل على ارض الواقع وتتعب شوية وتتحرك من أدام اللاب توب وتسيب الموبيل لأن أي تعب مهما كان قبل قرار الشرا لا يساوي ثواني من الضغوط العصبية والنفسية وخسارة الوقت والفلوس لو خدت قرار متسرع او مبني على معلومات عشوائية.