الادراك

كلنا في هذه الحياة نمر بمواقف و هذه المواقف انا اشوف انها تخلق شخصيتنا ، كل شخص نشوفه كيف ما كانت شخصيته هي تمثل ما عاشه في صغره و ما واجهه في حياته و التجارب اللي خاضها سواء جيده او سيئة .

و في لحظة من عمرنا راح ندرك نفسنا و كيف احنا عايشين ،البعض و اللي راح اتكلم عنهم بيشوف نفسه مهمل نفسه ، علاقته مع ربه و  عيلته بيشوف انه شخص عايش بلا معنى ، لكن لو ناخذ الموضوع من ناحية ايجابيه ذا شيء مره كويس لانه بداية إدراكنا للحياة هذه بداية شيء جديد اسمه التغيير 

و انا اعتبر هذه اللحظة مهمة في حياة كل إنسان و مستحيل مافي شيء شخص مره بهذه الشيء لكن مو الكل يستغلها ؛  لان هذه اللحظة هي اللي بتحدد  كيف تبغا تكون وكيف الحياة اللي تبغا تعيشها في المستقبل. 

التغيير 

بعد ما دخلنا مرحلة الإدراك بنجي ل مرحلة انا أشوفها اصعب و اجمل مرحلة وهي التغيير صعوبتها هي في الأشياء اللي راح تتركها و تتخلى عنها ممكن تترك عادات سيئة او تتخلى عن ناس بتلاقي صعوبة في انك تتخلى عن حياتك القديمة و لكن مع الإرادة القويه بتكون قادر عليهم كلهم لما تبدا تترك شيء بسيط و تحس بالسعادة الكبيرة اللي راح تجيك راح تتحمس انك تكمل و بتحس بقوة كبيرة في داخلك ممكن هذه المرحلة تقعد شهور او سنه لانه انت بتغير أسلوب حياتك لكن اعرف اهم نقطة انك انت قاعد تغير افعالك وليس نفسك عشان كذا خذ وقتك و ابدأ  حبه حبه . 

نجي للشيء الثاني و الأجمل  هو تواصلك مع نفسك  راح تبدأ تتعرف على نفسك  أغلبنا يتوقع انه عارف نفسه و لكن معرفتك ل نفسك شيء عميق جدا يحتاج انك تتكلم مع نفسك في  ادق  التفاصيل و تسمح لنفسك انك تتحرر من كل المشاعر و الأفكار السيئة و أهمها ( انك شخص فاشل او مستحيل يتغير ) حرر نفسك من المشاعر اللي في قلبك اللي تحس انها خانقتك اذا فيه ناس اذوك بشيء روح كلمهم لا تسكت و اذا ما قدرت اهم شيء انك تطلعها من قلبك و لما يجي الوقت المناسب تكلم مع اللي حولك عن الأشياء اللي سببوها لك  ، صدقني اريح  و اجمل شيء ممكن يمر فيه الإنسان هو شعور الحرية من الأشياء اللي كانت ماسكته في الماضي و حابسته في قوقعة الحياة المملة. 

النمو  

بعد مرحلة التغيير راح تبدأ مرحلة النمو و هذه المرحلة جدا ممتعه بكل تفاصيلها ليه ؟ 

لانه راح تبدأ تكتشف نفسك و تطورها راح تجرب أشياء جديد بتخرج من منطقة الراحة  راح يتغير تفكيرك  ممكن أشياء كنت تشوف مستحيل تعيش بدونها بتتركها او شيء كنت تكرهه تسير تحبه ،  راح تكتشف مواهب و أشياء كنت تشوف نفسك مستحيل تتقنها  بتطلع بارع في أشياء كثير بتدخل في تجارب كثير راح تتعلم الحياة ممكن تاثر في اللي حولك بشيء إيجابي المهم انك راح تصنع التغيير و بتكتفي بذاتك  و الأجمل راح تكون الشخص اللي تبغاه و بتعيش الحياة الجميلة  اللي كنت تشوفها مستحيلة .. 

( التغيير بداية النمو و من غير الإدراك لا يحصل التغيير و بدون تغيير لا يحصل النمو )إبراهيم فقيه 

اخير  

( لا تنسى أنك إنسان عظيم و ابداعك لا حدود له) 

اتمنى كلامي ساعدك و لو بشيء بسيط.💙💙

الكلام من واقع تجربتي ..