صحوة ضمير
في نور
ونازل مالسما
واصل لقلب عليل
حبل و متين
لكنه رحمه ولطف
والطرف واصل للوتين
لمس الفؤاد قام خف
أصل الفؤاد كان ماخور
مسكون بالف شيطان
والف شهوة خبيثة
غير الجفا والغل
تابع ذليل لهواه
يطلب ويتمني
نفسه في كل النسا
مُشتاق لحُمر النعم
وبيدعي بالجنة
ظابط اموره تمام
هيتوب قبل الممات
ربك غفور ورحيم
سامح اللي قتل ميه
هيسامحه في اللي مضي
والرك عالنية
والعمر لسه كتير
والدنيا لسه براح
قبل ما ييجي المعاد
هيكون علي استعداد
هايلحق في أخر المدة
ويندم علي اللي كان
يستغفر الرحمن
ويركب في اخر القطر
قبل ما يتحرك
يلحق له اخر مكان
ويظفر بجنات نعيمه
بالرحمة والغفران
.............................................................
والروح سجينة الجسد
عمالة تصرخ وحيدة
الذنب كبّل إيديها
وصاحبها سايق في غيّ
والقلب مليان سواد
اصله اتحرم ماالضي
وهو ولا دريان
ماشي ورا رغبته
وناسي هدوء ذاته
بالرخص باع السكينة
لاجل ملزاته
ولهث ورا الزينة
عيل ولهيان في مولد
وف لهوته ضل تاه
ساب ايد ابوه الحنونه
وانغمس
في اللهوه حتي سكر
طعم الغواية نبيذ
بيسحر الألباب
واما سكر قام نسي
انه خليفة الرب
والكون ده كله عشانه
متسخر بأمر الكريم
اللي خلقه بإيديه
ساب الشرف والخير
وما شافش غير الزينة
الزينة حُرمة لعوب
بتغوي اجدع جدع
شراك خفي وخدّاع
والقلب كله طمع
وروحه واقفة هناك
لساها بتصرخ
لساها بتعاني
وهو متحير
يطيع سلطان هواه
و لا لرشده يعود
ويتوب ويتغير
دي الدنيا منفاته
وفي ثانية ييجي الموت
يكسر انوف العتاة
ويحطم الجبروت
وفي ثانية يبقي مكانه
حفرة في بطن الأرض
وجبة و ياكلها الدود ‘.........................................
أنا في حماك يارب
يا مُطلع عالسر
يا خالق الأكون
بهتف بإسمك السكينة تحل
وتحت عرشك قلبي ساجد في وجل
لو ضاقت الدنيا عليا
رحمتك ربي أمل
القرب منك شفا
والبعد عنك اغتراب
باستقوي بيك علي العدا
ومن نوايب الدهر
ولو الذنوب بالكوم
ما بيتقفلش الباب
مهما المعاصي تزيد
رحيم علي عبيدك
اغفر ما تم وحصل
يارب يا غفار
واجعل ختامنا جميعاً
جنة تحتها أنهار
