سلام عليكم يا أهل الكلينكال الجدد..

البوست ده بإذن الله تعالى هيكون تفصيلي عن سنة رابعة كلها لأن فيه ناس كتير بتسأل فيه وفعلا هو يستحق لأن الكلينكال بيختلف عن الأكاديمي.. فاللي هيقرأ يكون نفسه طويل شوية أو ياخد منه اللي يخص كل راوند هيدخله.. ولو حد يعرف يوصله لغيره هيستفيد ولو النذر اليسير لأنه فيه الخلاصة الأقرب إلى الصحة إن شاء الله،،

اختلاف كلينكال عن نظري هو في نظام الدراسة لكن أنت عندك كتب وهتذاكر منها والمصادر هي الكتب بتاعت القسم خلينا متفقين على هذا الأساس من البداية أللهم إلا كام استثناء نادر.. كلينكال محتاجة مذاكرة أتقل لكن تنظيمها أسهل لأن يومك ماشي من 8-12 ولو بتحب تحضر محاضرات ففي قسمي الشرعي والكوميونتي هتوصل من 8-2.. ومعاك بقية اليوم امرح فيه كيف ما بدك:’D

،،

1-نبدأ بالتوكسو والشرعي وجه مدته شهر ودرجاته 150..

هتحضر من 9 ل12 راوند ومن 12 ل2 محاضرة وهنا أنصح بحضور المحاضرة أسرع وأنجز من التسجيلات.. مصدر المذاكرة الكتاب وشرح المحاضرات لو فيه إضافة..

ممكن تصور الكتب كلها لأنها أرخص ومفيهاش صور.. أي مصدر غير الكتاب يكون فرعي مش أساسي..

الشرعي مش هتكون زي كونان ولا شيرلوك هولمز أنت هتدرس حرائق وغرق وشنق وIdentifications كتير تحدد سن وجنس وكده وأسلحة نارية بتكوينها بأنواع طلقات.. كله دش بس فيه سيناريوهات لذيذة ده في الشرعي وعندك امتحان من 7 درجات تقريبا بعد أسبوع ونص كده سهل..

التوكسو بقى = فارما وعكس الفارما.. عارف الفارما اللي كنت بترميها وتقول طظ في الكام درجة غيرها أولى؟! أيوة جاتلك تاني وكل الأدوية زي مثلا الatropine , aspirin, beta blocker وغيرها.. بيشتغل ازاي وايه أعراض زيادته والتسمم من جرعة زايدة وتتعالج ازاي وتشخصها ازاي .. نظام ثابت لشرحهم كلهم، فلازم تحضر وتعمل key word لكل درس عشان ما تسيحش منك الدنيا وعشان الفاينال اللي هتلاقي كله على دماغك فحاول تذاكر أول بأول مش لامتحان الراوند بس.. لأن في امتحان الراوند بيحدد قبله شوية مواضيع لامتحان الراوند وفي الآخر فاينال تلاقيه كله على دماغك وركز في التوكسو جدًا.. وطبعا عندك أسيمنت خفيف.. وشفوي لذيذ برضه متقلقش منه.. ذاكر عملي كويس جدًا ونظري اللي داخل في الراوند لأنه امتحان الراوند بيعصر كل معلوماتك حرفيا فركز،

،،

2- الent..

وده شهر ب 150 درجة برضه.. حضوره بالبصمة وهو بتاع صورة السكراب بتاع العمليات اللي هتحطوها صورة بروفايل..

من 9-12 عدا أيام الأكتيفيتي اللي بتروح باستمارة بتستلمها أول يوم.. تحضر في عيادات وعمليات حسب توزيعة جدولك.. أهم شيء الإمضاء إنك حضرت،

هتحتاج اسكراب أو تأجره من القسم هناك عادي عشان تحضر عملية..

مصدره هي المشكلة.. القسم ملوش مصدر معين وبيحط امتحانات أنت ونصيبك ناس سهلة وناس صعبة.. ناس معظم الأسئلة من جوا الكتاب وناس معظمها من برا الكتب والباوربوينتس.. ذاكر من الكتاب واكتب وراهم لازم.. والباور بوينتس مهمة هنا جدًا.. ورق خارجي من الشروق وغيره صفر ملوش لازمة كبر دماغك.. صور الكتاب او اشتريه عادي مش هتفرق..

ذاكر كله ومن كل المصادر وهييجي في الآخر يدخل دكتور يركز على الدروس المهمة.. كلامه صح وبييجي منها الامتحان بنسبة 80%.. متستغربش من المعلومات الزيادة وعدم الالتزام بالكتاب.. اعمل اللي عليك وخلاص،

مفيش شفوي.. لكن فيه أسيمنت من 9 درجات.. وهنا فيه spots وبتمتحن على جهاز كومبيوتر..

فلازم تذاكر عملي كويس.. ازاي؟ تشوف الباوربوينتس والصور اللي فيها ضروري وتهضمهم كويس جدًا..

،،

3- الرمد..

وده الوحش اللي بيقعد شهرين وشوية ودرجاته 200.. وده فيه عملي ونظري وosce وأسيمنت وليلة كبيرة أوي سعادتك..

عندك أول أسبوعين جراحة بدل الراوندات ومحاضرة كل يوم من 8-9 فحاول تذاكر أول بأول.. الجراحة هيتم توزيعك وهي حاجة ملهاش لازمة بشهادة الأقسام ودرجاته هتكون في سنة 6 وعليك خير.. ملهاش مصدر مذاكرة وأنت ونصيبك ممكن ما يتشرحش لك حاجة وتروح للغياب بس وممكن العكس.. فركز في الرمد..

هتذاكر رمد ازاي ومنين؟

هتذاكر من كتاب القسم طبعًا وكتاب الكلينكال بتاعه.. ممكن تصور النظري عادي لكن اشتري الكلينكال..

اسمع تسجيلات دكتور رامي السريع أو عبدالحليم الطويلة لكن بتفصل كل حاجة وبتفهمك كلمة كلمة.. ومعاك لازم أطلس أو اتنين أهمهم أطلس عبدالحليم عشان العملي وتثبيت المعلومة كمان..

فيه textbook اسمه kanski ده لازم تحمله هيفيدك جدا ولذيذ.. وفكك من أي ورق تاني.. فيه تسجيلات فيديوهات لدكتور أمجد دويدار في كل حاجة اسمعها هتظبط الدنيا في الشرح والمراجعة للنظري والعملي.. ولو عاور وعندك وقت احضر لدكتور أشرف مراجعته الأسبوعية بس لو مذاكر..

هتحتاج torch واتعلم ال practical في الراوندات الحاجات الأساسية زي pupillary light reflex أو ضغط العين أوتشخيص الحول squint.. ومعظم الحالات هتكون مياة بيضاء على العين cataract فلو عرفت تنزل عيادة اشطه جدًا وخصوصا مع دكتور هشام الملتحي اللطيف مش هيقولك حاجة ويساعدك..

الرمد لذيذ وبيتفهم لو ذاكرته.. وعندك شابتر اسمه الcornea ده 30 صفحة معقدة في الكتاب بيتشرح في ساعة ونص في الكلية.. ومحدش شرحها كاملة بإتقان فاعتمد على نفسك فيها حاول تتصفحه وهتحس بالمهم فيه وانت بتقرأه وهمش الباقي مجرد قراءة بس مش بيجيبوه ما تخافش لكن ركز في الأساسيات زي الulcers و inflammations أي معلومة مهمة فيهم.. جزء الretina اسمع تسجيلات دكتور أمجد هي والsquint هتفرق معاك جامد..

اتعلم عملي كتير زي ما قولتلك عشان امتحان الشفوي والاوسكي بيكون صور تقريبا مش بتتعامل مع مرضى.. اجتهد في الرمد لأنه معلوماته كتيرة لكن امتحاناته سهلة.. واحضر المحاضرة لو قدرت.. والورق برضه المختصر ملوش لازمة خالص هنا

،،

4- الكوميونتي.. 150 درجة.. شهر ونص..

هتشتري الكتاب هنا.. وهتحضر من 9-12 مع وجود استثناءات من 8-12 وده وقته كامل وسكشنه طويل ولازم تحضره عشان تحل امتحان الراوند بييجي من زياداته وشرحه كاملا.. ومحاضرات أحبذ حضورها لو تقدر من 12-2

كل الامتحان من الكتاب بس وزيادات الراوندات الصبح..والباوربوينتس للرواندات كذلك..

حاول تلمه كله في الإجازة عشان هتاخد جزء تذاكره لوحدك self-learning فانجز فيه عشان بييجي منه كتير فاينال..

الامتحان بيكون طويل ووقته قصير وفيه مسائل فاهضم المعلومات كويس مرة وقت الشرح وفي المراجعة للمواضيع المحددة.. وفيه شفوي لذيذ جدًا..

بس محتواه صعب وبيتنسي والessay فيه تقيل جدًا فركزوا وراجعوا لو عندكم وقت حصوصا اللي هيبدأ بيه..

،،

5- الأورثو

في مستشفى ناريمان من 75 درجة ..

وده هتشتري كتابه اللي هيتكر كله في 5 أيام كل يوم 50 صفحة وبعدين تدخل راوندات فلا تتصدم وعادي وذاكر من الكتاب حلو.. بلاش ورق هيشتت تركيزك ويخلقلك فوضى من المعلومات.. الكتاب مش كله مشروح هم بيقولوا الزتونة ركز انت عليها هي ديه اللي بتييجي فعلا..

الامتحان اختياري وصور تتعرف عليها برضه فحاول تذاكر الفايل بتاع العملي هيفيدك جدًا..

الامتحان برضه هنا غير مقيد بالكتاب في الغالب فأنت ونصيبك.. وحل ورق عمرو ياقوت فيه ذاكرته كويس جدًا لأنه فيه معظم بنك الأسئلة وبييجي منه نصًا كتير..

وهيمشي مصطلح ORIF كتيرهتعرف معناها بعدين لما توصل..

،،

6-التروبيكال وده من 75 درجة برضه ومدته شهر محاضرات تروبيكال (بارا) عن الديدان والبكتيريا وكده.. وراوندات أسبوعين تروبيكال عن الhepatitis و البلهارسيا وكده.. وده امتحان العملي بتاعه ب 14 درجة و6 أسيمنت كل بياخدهم.. بس استفادوا منه جدًا رغم كده لكنه أكتر راوند مفيد.. وهتذاكر المحاضرات من ورق قدري عشان فيها زيادات فلازم تسمع تسجيل المحاضرة

عشان بييجي في الامتحان الزيادة أو ذاكر من كتاب الكلية برضه عادي،

وأسبوعين باطنة وأنت وحظك حسب قسمك ودرجاته بتنضاف ل6 برضه زي الجراحة.. وده عندك ورق قدري برضه ملوش مصدر تاني..

امتحان الراوند بتاع التروبيكال ذاكر من ورق ياقوت أسئلة للمحاضرات للراوند ككل وشرح للراوند أثناء الأسبوعين بتوع عملي التروبيكال لأنه فيه كل البنك تقريبا للفاينال حتى كمان..

،،

فيه فترة أليكتيف وديه بتكون زي إجازة بتنزل أماكن لها علاقة بالكلية وتحضر ساعة ولا حاجة وتروح فاستغلها كويس متضيعهتش..

طولت عليكم ربنا يوفقكم.. ولو حد عنده سؤال يتفضل عادي،،

بالتوفيق..